ޝަލަބީ: އީދުގައި ހޯރަފުށިން ލަންކާއާ ހިސާބަށް

މޯލްޑިވިއަން އައިޑޮލް އިން ޝަލަބީ އިބްރާހީމް ވިދާލި ހިސާބުން އެންމެ ބިޒީ އެއް އާޓިސްޓަކީ އޭނާ އެވެ. ހާއްސަކޮށް، ކޮންމެ އީދެއްގަ އެވެ. ކުރިއަށް އޮތް އަލްހާ އީދުގައި ޝަލަބީ އާއި ޓީމް ރާއްޖޭގެ އެކި ހިސާބުތަކުގައި އަދި ރާއްޖޭން ބޭރުގައި ވެސް ޝޯ ދޭނެ އެވެ.

މި ޝޯތަކުގައި، މި ފަހަރު މޯލްޑިވިއަން އައިޑޮލް އިން ވިދާލި އެހެން ބައެއް ފަންނާނުންނުން ޝަލަބީ އާއި އޭނާގެ ބޭންޑް ހައުސް އޮފް މިއުޒިކާ އެކު ބައިވެރިވާނެ އެވެ. އެއީ އައިމިނަތު ސައިނާ، މަރިޔަމް މައިޝާ އަދި ހަސަން އިރުފާން (ޒަކިއްޓެ) އެވެ. ޝަލަބީ، ސައިނާ އަދި ޒަކިއްޓެ އާއި ހައުސް އޮފް މިއުޒިކް އީދު ފަށާނީ އަވަށްޓެރި ސްރީ ލަންކާގައި ދޭ ޝޯ އިންނެވެ.

އީދުގެ ދެ ވަނަ ދުވަހު ކ. ހިންމަފުށީގައި ޝޯ ދޭނީ ޝަލަބީ އާއި ހައުސް އޮފް މިއުޒިކާއި މައިޝާ އަދި ޒަކިއްޓެ އެވެ. އޭގެ އިތުރުން ތަޖޫބެގެ މަޖާ ހަރަކާތްތައް ވެސް ފެނިގެންދާނެ އެވެ. އީދުގެ ތިން ވަނަ ޝޯ ހއ. ހޯރަފުށީގައި މި ގްރޫޕުން ދޭއިރު އެ ޝޯގައި އެރަށަށް ހާއްސަ ބައެއް ލަވަތައް ވެސް ކިޔަން ވަނީ ނިންމާފަ އެވެ.

ޝަލަބީގެ ޓީމް އީދު ޝޯތައް ނިންމާލަން ހަމަޖެހިފައިވަނީ މި އަހަރު އެންމެ ބޮޑުކޮށް އީދު ފާހަގަކުރާ ނ. ވެލިދޫގަ އެވެ. އީދުގެ ހަތަރު ވަނަ ދުވަހު ދޭ އެ ޝޯގައި ބައިވެރިވާނީ ޝަލަބީ އާއި މައިޝާ އަދި ޒަކިއްޓެ އަދި ހައުސް އޮފް މިއުޒިކް ބޭންޑެވެ. އެ ޝޯގައި ވެލިދޫއަށް ހާއްސަކޮށްފައިވާ އަމިއްލަ ރާގުގެ އާ ލަވައެއް ކިޔަން ވެސް ވަނީ ހަމަޖެހިފަ އެވެ.

މިދިޔަ ފިތުރު އީދުގައި ޝަލަބީ އާއި މައިޝާ އެކުގައި ދިން ޝޯތަކަށް ވެސް ހޫނު ތަރުހީބެއް ލިބުނެވެ.