ދަރިންނަކީ ހެޔޮލަފާ، ކިޔަމަންތެރި ބަޔަކަށް ހަދަން އީދު ޚުތުބާގައި ގޮވާލައިފި

ދަރިންނަކީ ހެޔޮލަފާ، ކިޔަމަންތެރި ބަޔަކަށް ހަދަން މަސައްކަތްކުރުމަކީ އެންމެންގެ މަސްއޫލިއްޔަތެއް ކަމުގައި ހެދުމަށް މިއަދުގެ އީދު ޚުތުބާގައި ގޮވާލައިފި އެވެ.

އީދު ޚުތުބާގައި ބުނީ ހައްޖުގެ އަޅުކަމުން ހަނދާންކޮށްދެނީ ނަބީބޭކަލުންގެ ބަފައިކަލުން އިބްރާހިމްގެފާނުގެ ވާހަކަތައް ކަމަށާއި އެކަލޭގެފާނާއި އެކަލޭގެފާނުގެ ދަރިކަލުން އިސްމާއިލްގެފާނު ގެފުޅުގެ ބިންގަލުގެ މަތީގައި ގެފުޅު އަލުން ބިނާކުރެއްވި މަތިވެރި ޒިކުރާ ކަމަށެވެ. އިބްރާހިމްގެފާނު މުސްކުޅިފުޅުވީ ދުވަހު ލިބިވަޑައިގަތް އެ ލޮބުވެތި ދަރިކަލުން ގުރުބާންކުރެއްވުމަށް މާތްﷲ ކުރެއްވެވި އަމުރުފުޅަށް އިޖާބަދެއްވި ގޮތް ޚުތުބާގައި ފާހަގަކުރި އެވެ.

އިބްރާހިމްގެފާނާއި އިސްމާއިލްގެފާނު ވެސް މި ތާނގައި މާތްﷲ އަމުރުފުޅަށް ކިޔަމަންވެވަޑައިގަތް ކަމަށް ޚުތުބާގައި ބުންޏެވެ.

ޚުތުބާގައި ބުނީ އެއީ މާތްﷲގެ އަމުރުފުޅަށް ކިޔަމަންވެވަވަޑައިގަންނަވާ މިންވަރު ބެއްލެވުމަށް އެ ދެބައިކަލުންނަށް ކުރިމަތިކުރެއްވި އިމްތިހާނެއް ކަމަށާއި ކޮންމެ ކަމަކަށް މާތްﷲ އަމުރުފުޅު ކުރެއްވިޔަސް، އެކަމަށް ފަސްޖެހިވަޑައިގަތުމެއް ނެތި އެ އަމުރުފުޅު ތަންފީޒުކުރައްވާނެކަން ދެއްކެވި ނަމޫނާ ހާދިސާއެއް ކަމަށެވެ.

"މި އީދުގައި އުޟްޙިޔާ ކަތިލުން ޝަރްއުކުރެވިފައި ވަނީ މިހެންވެގެންނެވެ،" ޚުތުބާގައި ބުންޏެވެ.

ޚުތުބާގައިި ބުނީ އިސްމާއިލްގެފާނު ދެއްކެވި ކިޔަމަންތެރިކަމަކީ ޒުވާނުންނަށް ލިބިގެންވާ ހެޔޮ ނަމޫނާއެއް ކަމަށާއި މައިންބަފައިންނަށް ކިޔަމަންގަންނާން ޖެހޭ މިންވަރުގެ ދިރިހުރި މިސާލެއް ކަމަށެވެ. އެއީ އިސްމާއިލްގެފާނަށް ލިބިވަޑައިގެންފައިވާ ތަރުބިއްޔަތުގެ ރަނގަޅުކަމާއި ހެޔޮކަން ކަމަށް ޚުތުބާގައި ބުންޏެވެ.

"އަހަރެމެންގެ ދަރީން މައިންބަފައިންނަށް ނުކިޔަމަންތެރިވެ، ބަސްނާހާ ވާހަކަ އަޑު އިވެ އެވެ. އަހަރެމެންގެ ދަރީން ހެޔޮލަފާ ކިޔަމަންތެރި ބަޔަކަށް ހަދާން މަސައްކަތްކުރުމަކީ އެންމެންގެ މަސްއޫލިއްޔަތެއްކަމުގައި ހަދާށެވެ،" ޚުތުބާއި ބުންޏެވެ.

ޚުތުބާގައި ބުނި ގޮތައި، މިއަދުގެ އީދު ފާހަގަކުރާއިރު، އިބްރާހިމްގެފާނާއި އިސްމާއިލްގެފާނު ވެވަޑައިގަތް މަތިވެރި ގުރުބާނީން އިބުރަތް ހާސިލްކުރަން ޖެހޭ ކަމަށާއި އެއީ މާތްﷲ ކިޔަމަންތެރިވުމާއި ކެތްތެރިވުމުގެ ދަރުސެކެވެ.

"އިސްލާމީ އުންމަތް ނިކަމެތިވުމުގެ އެންމެ ބޮޑު ސަބަބަކީ މާތް ﷲ އާއި އެކަލާނގެ ރަސޫލާ ﷺ ގެ އެންގެވުންތަކާ ދުރުހެލިވުމެވެ. ވެރީންނާއި މައިންބަފައިންނާއި ބޮޑުންގެ ބަސްނޭހުމެވެ،" ޚުތުބާގައި ބުންޏެވެ.

ޚުތުބާގައި ބުނީ ކީރިތި ރަސޫލާ ﷺ ގެ ސަހާބީންގެ ކުރިފުޅު މަތީގައި ދުނިޔެ ތިރިވެ، ކުޑަކަކޫ ޖަހައި، ކިޔަމަންގަތީ އަދި އިސްލާމްދީނަށް ފައުޖުފައުޖުން މީސްތަކުން ވަނީ އެ ބޭކަލުންގެ މުއްސަނދިކަމަކުން ނޫން ކަމަށެވެ. އެ ބޭކަލުންގެ ހަށިކޮޅުތައް ވަރުގަދަކަމަކުން ވެސް ނޫން ކަމަށާއި އެކަމަކު، އެ ބޭކަލުންގެ އިހުލާސްތެރިކަމާއި ކިޔަމަންތެރިކަމުގެ ސަބަބުން ކަމަށް ޚުތުބާއި ބުންޏެވެ.