ވަކީލުގެ ގޮނޑި ދަށުން ރެކޯޑަރެއް ފެނުނު މައްސަލައިގެ ތަހުގީގު ނުނިމޭ: ފުލުހުން

ދޫނިދޫގައި ހައްޔަރުކޮށްފައިވާ އުއްތަމަ ފަނޑިޔާރު އަބްދުﷲ ސައީދާ ބައްދަލުކުރަން ވަޑައިގެންނެވި އިރު އެ މަނިކުފާނުގެ ވަކީލު ހިސާން ހުސައިން އިށީންނަވަން ހުރި ގޮނޑީގެ ދަށުގައި ރެކޯޑަރެއް ހަރުކޮށްފައި ހުއްޓައި ފެނުނު މައްސަލައިގެ ތަހުގީގު އަދިވެސް ނުނިމޭ ކަމަށް ފުލުހުން މިއަދު ބުނެފި އެވެ.

މާޗް މަހުގެ 14 ވަނަ ދުވަހު، އުއްތަމަ ފަނޑިޔާރާ އެކު ދޫނިދޫގައި ހިސާން ބޭއްވި ބައްދަލުވުމުގައި ހިސާންގެ ގޮނޑި ދަށުން ޓޭޕް ރެކޯޑަރެއް ފެނިފައިވާ ކަމަށް ވިދާޅުވެ އެ ކަން މީޑިއާގައި ފަޅާއަރުވައިލީ ހިސާނާއި އެ ދުވަހު ދޫނިދު އަށް ވަޑައިގެންނެވި އެހެން ވަކީލުންނެވެ. އެކަމަކު އެ ދުވަހު އެ މައްސަލަ ދޫނިދޫގައި ތިބޭ ފުލުހުންގެ ސަމާލުކަމަށް ގެނައުމުން ފުލުހުން އެކަމާ ގުޅޭ ގޮތުން އެއްޗެއް ނުބުނި ކަމަށް ހިސާން ވިދާޅުވި އެވެ.

ހިސާންގެ ގޮނޑި ދަށުން ރެކޯޑަރެއް ފެނުނު ކަމަށް ބުނާ ވާހަކަ ފުލުހުން އެ ދުވަހު ދޮގު ކުރި އެވެ. ފުލުހުން ބުނި ގޮތުގައި، އެއީ ފުލުހުން ބަދުނާމު ކުރުމަށް ދައްކާ ވާހަކައެކެވެ.

ނަމަވެސް ފަހުން ހަމަ އެ ދުވަހު ފުލުހުން ވަނީ އެ މައްސަލަ ތަހުގީގު ކުރަމުން އަންނަ ކަމަށް ބުނެފަ އެވެ.

ފުލުހުންގެ ތަރުޖަމާން އަހުމަދު ޝިފާން މިއަދު ވިދާޅުވީ އެ މައްސަލަ އަަދިވެސް ކުރި އަށް ދާ ކަމަށެވެ. އިތުރު އެއްވެސް ތަފްސީލެއް ނުދެއްވަ އެވެ.

ހިސާން ވިދާޅުވީ އެ މައްސަލައާ ގުޅިގެން ފުލުހުން އެއްވެސް ކަމެއް އޭނާ އަށް މިހާތަނަށް އަންގާފައިނުވާ ކަމަށެވެ.

އުއްތަމަ ފަނޑިޔާރު އަބްދުﷲ ސައީދު ހައްޔަރު ކޮށްފައިވަނީ މިދިޔަ ފެބްރުއަރީ މަހުގެ ފުރަތަމަ ދުވަހު ސުޕްރީމް ކޯޓުން ނެރުނު އަމުރާ ގުޅިގެން، އެ މަހުގެ 5 ވަނަ ދުވަހުގެ ރޭ ކުއްލި ނުރައްކަލުގެ ހާލަތު އިއުލާން ކުރުމަށް ފަހު ހަމަ އެ ރެޔެވެ. އެ މަނިކުފާނުގެ އިތުރުން ސުޕްރީމް ކޯޓުގެ ފަނޑިޔާރު އަލީ ހަމީދާޢި ކުރީގެ ރައީސް މައުމޫން އަބްދުލް ގައްޔޫމް ވެސް އެރޭ ހައްޔަރުކުރި އެވެ. އެ ބޭފުޅުންގެ މައްޗަށް، ރިޝްވަތާއި ގާނޫނާ ޚިލާފަށް ސަރުކާރު ވައްޓާލަން އުޅުމުގެ ތުހުމަތު ކުރެ އެވެ.