ޕޯސްޓް މޯޓަމުން ދެއްކީ އަތުހަރު މަރުވީ ދަންޖެހިގެން ކަމަށް: ޕޮލިސް

އަންހެނަކު ރަހީނުކުރި މައްސަލާގައި ފުލުހުންގެ ބަންދުގައި ހުއްޓާ އާދަމް އަތުހަރުގެ މަރުވީ ދަންޖެހިގެން ކަމަށް އޮޓޮޕްސީން ރިޕޯޓުން ދައްކާފައިވާ ކަމަށް ފުލުހުން މިއަދު ބުނެފި އެވެ.

ވަޅިން ބިރު ދައްކައި އަންހެނަކު ރަހީނުކުރި މައްސަލާގައި އަތުހަރު ދޫނިދޫ ޖަލުގައި ބަންދުކޮށްފައި ހުއްޓާ އަމިއްލައަށް ދަންޖެހެން ކުރި މަސައްކަތަށް ފަހު ހާލު ސީރިއަސްވެގެން އައިޖީއެމްއެޗްގެ އައިސީޔޫގައި ފަރުވާ ދެމުން ދަނިކޮށް މި މަހުގެ ދެވަނަ ދުވަހު އެވެ.

އަތުހަރު މަރުވި ގޮތް ބަލަން ފުލުހުން އޭނާގެ ހަށިގަނޑު އިންޑިއާއަށް ފޮނުވައިގެން ޕޯސްޓްމޯޓަމް ވަނީ ހަދައިފަ އެވެ.

އަތުހަރުގެ މަރުގެ ސަބަބަކީ ދަންޖެހުން ކަމަށް ޕޯސްޓަމް ރިޕޯޓުން ދައްކާފައިވާކަން ހާމަކުރުން ފިޔަވައި އިތުރު ތަފްސީލެއް ފުލުހުން ނުދެ އެވެ. ސަބަބެއް ކަމަށް ބުނީ މިއީ ނެޝަނަލް އިންޓަގްރިޓީ ކޮމިޝަނާއި ހިއުމަން ރައިޓްސް ކޮމިޝަނުން ތަހުގީގުކުރަމުންދާ މައްސަލައެއް ކަމަށް ވާތީ އެވެ.

އަތުހަރު ހައްޔަރުކުރީ އޭނާގެ ލޯބިވެރިޔާގެ ކަރުގައި ވަޅި ޖައްސައި ރަހީނުކޮށް ސައިކަލެއްގައި ދަނިކޮށް ފުލުހަކު އޭނާގެ ފަހަތުން ގޮސް މުގުރުން ހަމަލާދީ، ބިންމައްޗަށް ވައްޓާލުމަށް ފަހު ފަހުގަ އެވެ. ފުލުހުން މުގުރުން ޖެހުމުން އޭނާގެ ބޮލާއި މޫނަށް އަނިޔާ ވެފައި ވިޔަސް، ސްކޭންތަކާއި ޓެސްޓުތަކުން ސީރިއަސް އަނިޔާއެއް ފާހަގަނުވާ ކަމަށް ފުލުހުން ކުރިން ބުނެފައިވެ އެވެ. އޭނާ ޖަލަށް ގެންގޮސް ބަންދުކުރީ ވެސް ހޮސްޕިޓަލުން ދޫކޮށްލުމުން އެ ޒަހަމްތަކާ އެކުގަ އެވެ.

ހޯމް މިނިސްޓަރު އަލީ އިހުސާން ވަނީ ނޫސްވެރިންނާ އެކު، އިސްކަންދަރު ކޮށީގައި ބޭއްވި ނުރަސްމީ ބައްދަލުވުމެއްގައި އަތުހަރު ގޮޅީގައި ދަންޖެހޭތަން ފެންނަ ސީސީޓީވީ ފުޓޭޖެއް ނޫސްވެރިންނަށް ދައްކާލައިފަ އެވެ.

އެ ވީޑިއޯއިން ފެންނަ ގޮތުގައި އަތުހަރު ބަންދުކޮށްފައި ހުރި ގޮޅި ފެންނަ ހިސާބުގައި ފުލުހަކު ނެތެވެ. ނަމަވެސް، އެ ގޮޅި އެއްކޮށް ފެންނަ ގޮތަށް ކެމެރާ ހުރީ ހަރުކޮށްފަ އެވެ. އެ ކެމެރާގެ ފުޓޭޖުން ފެންނަ ގޮތުގައި އަތުހަރު އޮތް ގޮޅި އަށް ފުލުހުން ވަދެފައި ވަނީ އޭނާ ދަންޖެހުނުތާ ބައިގަޑިއެއްހާއިރު ފަހުންނެވެ.

އަތުހަރު ދަންޖެހުނު ގޮތާއި އެކަން ކުރި ގޮތް ސީސީޓީވީ ފުޓޭޖުން ވަރަށް ސާފުކޮށް ފެނެ އެވެ. އަތުހަރު އޮތް ގޮޅި އަށް ފުލުހުން ދިޔައިރު، އޭނާގެ އެއްވެސް ހަރަކާތެއް ނެތެވެ. ނަމަވެސް އޭނާއަށް ގޮޅީގައި އަވަަސް ފަރުވާދޭން ފުލުހުން އޭރު މަސައްކަތް ކޮށްފައެއް ނުވެ އެވެ.