ބިދޭސީ މީހާގެ 44 ޕަސެންޓު ވަނީ ފިހިފައި: ހޮސްޕިޓަލް

ށ. ފުނަދޫގައި މިއަދު ހިނގި އަލިފާނުގެ ހާދިސާގައި ބިދޭސީ މީހާގެ ހަށިގަނޑުގެ 44 ޕަސެންޓް ފިހިފައިވާ ކަމަށް ށ. އަތޮޅު ހޮސްޕިޓަލުން މިރޭ ބުނެފި އެވެ.

ފުނަދޫ ބަނދަރު ހަދަން އެ ރަށަށް ގޮސް ހުރި ބަންގްލަދޭޝްގެ އެ މީހާގެ ގައިގައި ހުޅު ހިފީ، ގޭސް ލީކުވެފައި ހުއްޓާ އުނދުން ރޯކުރުމުންނެވެ.

ށ. އަތޮޅު ހޮސްޕިޓަލް ހިންގުމާ ހަވާލުވެ ހުންނެވި ހަސަން އިސްމާއީލް ވިދާޅުވީ ބިދޭސީ މީހާގެ ދެ އަތުން ބަޔަކާއި ފައިގެ ކަކުލުން ތިރި އަދި ކަނދުރާ އާއި މޫނު ފިހިފައިވާ ކަމަށެވެ. އެކަމަކު އޭނާގެ ހާލު މި ވަގުތު ސީރިއަސް ނޫން ކަމަށް އޭނާ ވިދާޅުވި އެވެ.

"އޭނާގެ ހާލު ސްޓޭބަލް. އެކަމަކު ފިހިފައި ތިބޭ މީހުންނަށް މި ތަނުން ފަރުވާ ދެވެން ނެތުމާއި ހަށިގަނޑަށް ގޭހުގެ އަސަރުކޮށްފައި ހުރެދާނެތީ ޓެސްޓްތައް ހަދައިގެން ބެލުމަށް މާލެއަށް ފޮނުވާލެވޭތޯ މިހާރު މި ބަލަނީ،" ހަސަން ވިދާޅުވި އެވެ.

އޭނާ ވިދާޅުވި ގޮތުގައި އަލިފާން ރޯވީ އުނދުން ރަނގަޅަށް ނުނިއްވައި ހުރުމުން، ގޭސް ލީކުވެގެންނެވެ. އަދި އެހާ ބޮޑު ގެއްލުމެއް ނުވެ ނުވެ ސަލާމަތްވީ ގޭސް ފުޅި ބަދިގޭ ބޭރުގައި ބަހައްޓާފައި ހުރުމުން ކަމަށް ވިދާޅުވި އެވެ.

"ގޭސް ފުޅި އުނދުނާ ގުޅާފައި ވަނީ ފާރުގައި އަޅާފައިވާ ލޯވަޅަކުން. އެހެންވެ، ގޭސް ލީކުވެފައި ވަނީ އުނދުނުން. އުނދުން ޖެއްސުމާއެކު މުޅި ބަދިގޭގައި ހުޅު ހިފި ނަމަވެސް އެއްވެސް އެއްޗަކަށް ގެއްލުންވެފައެއް ނެތް. ހަމައެކަނި އަނިޔާވީ ބިދޭސީ މީހާ އަށް،" ހަސަން ވިދާޅުވި އެވެ.