ދެ މީހުން ފިހުނުއިރު ކޮޓަރީގައި ރޮލެއް ނުވޭ!

އއ. ރަސްދޫގައި ފިހުނު ދެމަފިރިން ސަލާމަތްވާނެ ކަމުގެ އުއްމީދު ކަނޑާލާފައިވާއިރު، އެ ހާދިސާގައި އެ މީހުންގެ ކޮޓަރީގައި އެހާ ބޮޑަށް އަލިފާން ރޯނުވާ ކަން "މިހާރު" އަށް އެނގިއްޖެ އެވެ.

ރޭ ދަންވަރު ހިނގި އެ ހާދިސާގައި، ގައިގައި އަލިފާން ރޯވެ ފަރުވާދެމުން އަންނަނީ އުމުރުން 31 އަހަރުގެ ދެމަފިރިންނަށެވެ.

އިތުރު ފަރުވާ އަށް އެ ދެ މީހުން މާލެ ގެނެސް ފަރުވާދެމުން އަންނަނީ އައިޖީއެމްއެޗުގަ އެވެ. އަންހެންމީހާ އަަށް ފަރުވާދެނީ އައިސީޔޫގަ އެވެ. އޭނާ ފަރުވާދެނީ ވެންޓިލޭޓަރުގެ އެހީގައި ކަމަށް ވާއިރު، ފިރިހެންމީހާ އަށް ފަރުވާދެމުން އަންނަނީ އިމަޖެންސީ ރޫމުގައި ވެންޓިލޭޓަރުގަ އެވެ.

ފިރިހެން މީހާ، އައިސީޔޫއަށް ބަދަލުނުކުރެވި ވަނީ ޖާގަ ނެތިގެން ކަމަށްވެ އެވެ.

އައިޖީއެމްއެޗުގެ މީޑިއާ އޮފިޝަލް "މިހާރު" އަށް ވިދާޅުވި ގޮތުގައި ފިރިހެން މީހާ ވެސް އައިސީޔޫއަށް ބަދަލުކުރުމުގެ މަސައްކަތް އަންނަނީ ކުރަމުންނެވެ.

އުމުރުން ފަސް އަހަރުގެ ކުއްޖަކު ވެސް ހުރި ދެ މީހުން ވެސް ވަނީ 80-90 ޕަސެންޓަށް ފިހިފަ އެވެ. އެ ދެ މީހުން ވެސް ސަލާމަތް ކުރެވޭނެ ކަމުގެ އުންމީދު ޑޮކްޓަރު ވަނީ ކަނޑާލާފައި ކަމަށް އާއިލާގެ މީހަކު ބުންޏވެ.

އެނގިފައިވާ ގޮތުގައި މި ހާދިސާގައި އެ ދެމަފިރިންގެ ކޮޓަރީގައި މާބޮޑަށް އަލިފާން ނުހިފަ އެވެ. ރޯވެފައި ވަނީ ކޮޓަރީގެ ދޮރު ފޮތިގަނޑެއްގައި އެކަންޏެވެ. އެކަމަކު އެ މީހުންގެ ގައިގައި އެހާ ބޮޑަށް އަލިފާން ރޯވި ގޮތެއް ސާފެއް ނޫނެވެ.

ހޮސްޕިޓަލުގައި ފަރުވާދެމުން އަޔަސް ޑޮކްޓަރުން އުއްމީދު ކަނޑާލާފައިވާތީ ރަށުގައި ތިބި އާއިލާގެ ގިނަ ބަޔަކު ވެސް މާލެ އައުމުގެ މަސައްކަތް އަންނަނީ ކުރަމުންނެވެ.

ދެމަފިރިންގެ ގައިގައި ރޯވި މައްސަލަ ފުލުހުން އަންނަނީ ބަލަމުންނެވެ. އެކަމަކު އަދި ރަސްމީ ބަހެއް ނުލިބެ އެވެ.