18 ފަހަރު ބައިގެން ދިޔަ މީހަކަށް ދަރިއެއް ލިބިއްޖެ

އަށާރަ ފަހަރު ބަލިވެ އިނދެ ބައިގެން ދިޔަ މީހަކަށް ދަރިއަކު ލިބިއްޖެ އެވެ.

އުމުރުން 48 އަހަރުގެ މި މީހާ ދަރިއަކު ހޯދަން އައިވީއެފް ހަދަން މިހާތަނަށް 80،000 ޕައުންޑް (105،000 ޑޮލަރު) ވަނީ ޚަރަދު ކޮށްފަ އެވެ.

އިންގްލެންޑްގައި އުޅޭ ލޯރެން ވޯންފޯޑް އާއި އޭނާގެ ފިރިމީހާ މާކް، 55، ދަރިއަކު ހޯދަން މަސައްކަތް ކުރާތާ 16 އަހަރު ވެއްޖެ އެވެ. ކޮންމެ ފަހަރަކު ވެސް ބަލިވެ އިނދެ ބަނޑަށް ވަކި ދުވަހެއް ވާއިރަށް އަމިއްލައަށް ކުއްޖާ ބައިގެން ދަނީ އެވެ. ޑޮކްޓަރުންނަށް ލޯރެންގެ ބަލި ދެނެގަނެވުނީ މި ހާލުގައި އޭނާ އުޅޭތާ 16 އަހަރު ފަހުންނެވެ.

ލޯރެންގެ މައްސަލައަކީ ދަރިފަނި މަރާލާ ސެލްތަކެއް އޭނާގެ ހަށިގަނޑުގައި ހުރުމެވެ. ކުއްޖާ ގަރުބަގަނެގެން ހަފުތާތަކެއް ވުމަށް ފަހު ފެންނަނީ މަރުވާ ތަނެވެ. އެހެންވެ މި ދެމަފިރިން ވަނީ ދަރިއަކު ހޯދަން މަސައްކަތް ކުރުން ހުއްޓާލަން ވެސް ބައެއް ފަހަރު ވިސްނި އެވެ.

ލޯރެން ބުނި ގޮތުގައި ކޮންމެ ފަހަރަކު އޭނާ ބަލިވެ އިނދެ ބަނޑަށް 14 ހަފުތާ ފުރޭއިރަށް ދަރިފުޅު ވެއްޓެނީ އެވެ. އެހެންވެ ދަރިއަކު ހޯދުމުގެ ޚިޔާލު ދޫކޮށްލައިގެން ފަސް އަހަރު ވަންދެން ލޯރެން ހުއްޓެވެ. އޭގެ ފަހުން އަނެއްކާވެސް އަދި އެއް ފަހަރު މަސައްކަތް ކޮށްލަން ނިންމި އެވެ. އެގޮތުން 2015 ގައި އެ މީހުން ވަނީ އެމްބްރިޔޯ ޑޮނޭޝަން އެއް ހަދައިފަ އެވެ.

ނަސީބަކުން އެ ފަހަރު ހަމަ ވަރަށް ފަސޭހައިން ބަލިވެ އިނދެ 37 ހަފުތާގައި އެމީހުންނަށް ވަނީ ދަރިއަކު ލިބިފަ އެވެ. އެއީ ދަރިއެއް ހޯދަން މަސައްކަތް ފެށިތާ ބަރާބަރު 18 އަހަރު ފަހުންނެވެ. މި ދެމަފިރިންގެ ދަރިފުޅު ވިލިއަމް އުފަން ވެފައިވަނީ މިދިޔަ އަހަރުގެ ޖޫން މަހު އެވެ.

މި ދެމަފިރިންގެ އުމުރު މައްޗަށް ގޮސްފައި ވާތީ ދަރިފުޅާ އެކު އުޅޭއިރު މީހުން ހީކުރަނީ އެއީ އެ ދެ މީހުންގެ ދަރިއެއްގެ ދަރިއެއް ކަމަށެވެ.