ޓޫރިޒަމް ޕްރޮމޯޓްކުރަން ހަ ގައުމެއްގައި އެޖެންސީތަކެއް ހަމަޖައްސައިފި

ރާއްޖޭގެ ތަސައްވުރު ރަނގަޅުކޮށް، އަންނަ ޓޫރިސްޓުންގެ އަދަދު އިތުރުކުރުމަށް ހަ ގައުމެއްގައި ޕީއާރު އެޖެންސީތަކެއް މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ) އިން ހަމަޖައްސައިފި އެވެ.

އެ ކުންފުނިން ނެރުނު ނޫސްބަޔާނެއްގައިވާ ގޮތުން ރާއްޖެ ޕްރޮމޯޓްކުރަން އެޖެންސީތަކެއް ކަނޑައަޅާފައި ވަނީ ޗައިނާ، ޖަރުމަން، ޔޫކޭ، ފްރާންސް، އިންޑިއާ އަދި ކޮރެއާގަ އެވެ. ޕީއާރު އެޖެންސީތައް ކަނޑައަޅާފައި ވަނީ އަންނަ މަހުގެ އެއްވަނަ ދުވަހުން ފެށިގެން އެއް އަހަރު ދުވަހުގެ މުއްދަތަކަށެވެ.

ޗައިނާގެ އެޖެންސީއެެއްގެ ގޮތުގައި ހަމަޖައްސާފައި ވަނީ ޓްރެވަލް ލިންކް މާކެޓިން ކޮމްޕެނީ އެވެ. ޖަރުމަނަށް ކައުސް މީޑިއާ ސާވިސަސް، ޔޫކޭއަށް މެކް ކްލަސްކީ އިންޓަނޭޝަނަލް، ފްރާންސްއަށް އިންޓަފޭސް ޓޫރިޒަމް ފްރާންސް، އިންޑިއާއަށް ތިންކް ސްޓްރޯބެރީސް އަދި ކޮރެއާއަށް އެސް މާކެޓިން އެންޑް ކޮމިއުނިކޭޝަން ނީ އެޖެންސީއެއްގެ ގޮތުގައި ކަނޑައަޅައިފަ އެވެ.

އެމްއެމްޕީއާރުސީން ބުނީ ޕީއާރުސީ އެޖެންސީތަކެއް ހަމަޖެއްސުމުގެ ބޭނުމަކީ އެ ގައުމުތަކުގައި ރާއްޖޭގެ ތަސައްވުރުު ރަނގަޅު އެ ތަންތަނުން އަންނަ ޓޫރިސްޓުންގެ އަދަދު އިތުރުކުރުން ކަމަށެވެ.

ތަފާސްހިސާބުތައް ދައްކާ ގޮތުން ޗައިނާ އަކީ މިހާރު ރާއްޖެއަށް އެންމެ ގިނަ ޓޫރިސްޓުން އަންނަ ގައުމެވެ. އަދި ޖަރުމަނާއި ޔޫކޭ އަދި ފްރާންސް އަކީ ޔޫރަޕުން އެންމެ ގިނަ ޓޫރިސްޓުން އަންނަ ގައުމުތަކެވެ.