ބަޣާވާތާ ގުޅޭ ބޮޑު ޝަރީއަތަށް 500 މީހުން ކޯޓަށް

އަންކާރާ (އޮގަސްޓް 2) - ތުރުކީ އަށް މިދިޔަ އަހަރު ގެންނަން އުޅުނު އަސްކަރީ ބަޣާވާތުގައި އެންމެ އިސްކޮށް ތިބި ކަމަށް ބެލެވޭ މީހުންގެ ޝަރީއަތް އެ ކަމަށް ޚާއްސަކޮށްގެން ހެދި ކޯޓުތަކުގައި ފަށައިފި އެވެ.

ތުރުކީ ސަރުކާރު ވައްޓާލަން އުޅުނުކަމުގެ ކުށުގައި އިއްޔެ ކޯޓަށް ހާޒިރުކުރި 500 މީހުން ވެސް ތިބީ ބިޑިއަޅުވައިފަ އެވެ. ކޮންމެ މީހަކާ އެކު ސެކިއުރިޓީ ދެ އޮފިޝަލުން ތިއްބެވެ. އޭގެ އިތުރުން ސިފައިން ހަތިޔާރާ އެކު ފޯރިމަރަމުން ދިޔަ އެވެ.

ޝަރީއަތް ކުރިއަށް ގެންދަނީ އަކިންސީ ވައިގެ މަރުކަޒުގައި ހެދި ޚާއްސަ ކޯޓުތަކެއްގަ އެވެ. އަންކަރާ އިން ބޭރުގައި ހުންނަ މި މަރުކަޒަކީ ބަޣާވާތް ކުރަން އުޅުނު މީހުންގެ މައި މަރުކަޒެވެ. ބަޣާވާތް ކުރި ރޭ ތުރުކީ ސިފައިންގެ ވެރިޔާ ޖެނެރަލް ހުލުސީ އަކާރާއި އެހެން ސީނިއާ އޮފިޝަލުން ވެސް މި މަރުކަޒުގައި އެތައް އިރެއް ވަންދެން ރަހީނުކޮށްފައި ބޭތިއްބި އެވެ.

ބަޣާވާތް ކުރަން އުޅުނު މީހުންގެ މައްޗަށް ވަނީ ރައީސް ރަޖަބް ތައްޔިބު އުރުދުޣާން އަވަހާރަކޮށްލަން އުޅުމުގެ ދައުވާ އުފުލައިފަ އެވެ. މިއީ ބަޣާވާތާ ގުޅިގެން ކުރިއަށް ގެންދާ އެންމެ ބޮޑު ޝަރީއަތެވެ. ކުށް ސާބިތުވާ މީހުންގެ މައްޗަށް އުމުރު ދުވަހުގެ ޖަލު ހުކުމެއް އަންނާނެ ކަމަށް ބެލެވެ އެވެ. ތުރުކީގައި 2004 ވަނަ އަހަރު ވަނީ މަރުގެ އަދަބު ދިނުން އުވާލައިފަ އެވެ. ނަމަވެސް ރައީސް އުރުދުޣާން ވަނީ މަރުގެ އަދަބު އަލުން ދިނުމާ ބެހޭ ގޮތުން ރައްޔިތުންގެ ޚިޔާލު ހޯއްދެވުމަށް ހުށަހަޅުއްވާނެ ކަމަށް ވިދާޅުވެފަ އެވެ. ބަޣާވަތަށް ފަހު ތުރުކީގައި މަރުގެ އަދަބު ދިނުން އަލުން ފަށަން އެ ގައުމުގެ ގިނަ ބަޔަކު ތާއީދު ކުރެ އެވެ. އެކަމަކު އީޔޫ އިން ބުނެފައި ވަނީ ތުރުކީގައި މަރުގެ އަދަބު ދޭން ފަށައިފި ނަމަ އެ ގައުމު އެ ޖަމާއަތުގައި ބައިވެރިވާން ކުރާ މަސައްކަތް ހުއްޓުމަކަށް އަންނާނެ ކަމަށެވެ.

މިދިޔަ އަހަރުގެ ޖުލައި މަހު ތުރުކީ އަށް ގެންނަން އުޅުނު ބަޣާވަތުގައި އާއްމުންގެ 249 މީހުން މަރުވެފައިވެ އެވެ.