ސަން އައިލެންޑުގައި ޗުއްޓީ ހޭދަކުރާ ދިވެހިންނަށް ޚާއްސަ ފޮޓޯ މުބާރާތެއް

މި ފިތުރު އީދުގެ ބަންދު ތެރޭގައި ސަން އައިލެންޑްގައި ޗުއްޓީ ހޭދަކުރާ ހުރިހާ ދިވެހިންނަށް ޚާއްސަ ފޮޓޯ މުބާރާތެއް ފަށައިފި އެވެ.

ރާއްޖޭގެ އެންމެ ބޮޑު ރިސޯޓުގެ ޖެނެރަލް މެނޭޖަރު ޑރ. އަބްދުﷲ މައުސޫމް މިއަދު ވިދާޅުވި ގޮތުގައި މި މުބާރާތް ކުރިއަށް ގެންދާނީ ފޭސްބުކް، އިންސްޓަގްރާމް އަދި ޓްވިޓާ ގަ އެވެ.

ސަން އައިލެންޑްގައި ޗުއްޓީ ހޭދަ ކުރަމުންދާ ކަމުގެ ފޮޓޯއެއް ފޭސްބުކް، އިންސްޓަގްރާމް އަދި ޓްވިޓާގެ ތެރެއިން ކޮންމެވެސް އެއް ވަސީލަތެއްގައި ހިއްސާ ކުރުމުން މުބާރާތުގައި ބައިވެރިވެވުނީ ކަމަށް މައުސޫމް ވިދާޅުވި އެވެ.

"އެއިން ކޮންމެވެސް އެއް ޕްލެޓްފޯމެއްގައި ޝެއާކޮށްގެން އެންމެ ގިނަ ލައިކްސް އެ ފޮޓޯ އަކަށް ހޯދަންވީ. ކޮންމެ ޕްލެޓްފޯމަކުން އެންމެ ގިނަ ލައިކްސް ލިބޭ މީހަކު މޮޅުވާނީ،" މައުސޫމް ވިދާޅުވި އެވެ.

އޭނާ ވިދާޅުވީ އަންނަ ޖުލައި މަހުގެ 10 ގެ ނިޔަލަށް ކުރިއަށް ގެންދާ މުބާރާތުގައި އެންމެ ގިނަ ލައިކްސް ހޯދާ މީހަކަށް ސަން އައިލެންޑުގައި އިތުރު މީހަކާ އެކު ދެ ދުވަސް ވަންދެން ހިލޭ ޗުއްޓީ ހޭދަކޮށްލުމުގެ ފުރުސަތު ލިބޭނެ ކަމަށެވެ. މައުސޫމް ވިދާޅުވި ގޮތުގައި މި މުބާރާތުގެ ބޭނުމަކީ އެ ރިސޯޓުގައި އުފާވެރިކަމާއެކު ޗުއްޓީ ހޭދަ ކުރާ ކަން އެކިއެކި ގައުމުތަކުގައި ތިބި މީހުންނާ ހިއްސާ ކުރުމެވެ.

މުބާރާތުގައި ބައިވެރިވާނެ ގޮތް:

- ސޯޝަލް މީޑިއާ ޕްރޮފައިލްތަކަށް ލައިކް ދިނުން SUNISLANDMV@

- ސަން އައިލެންޑްގައި ޗުއްޓީ ހޭދަކުރަމުންދާ ކަމުގެ ފޮޓޯއެއް ޝެއާ ކުރުން

- ޓެގްގެ ގޮތުގައި EID2017SUNISLAND# ބޭނުންކުރުން

- ޓެގްގެ ގޮތުގައި SUNISLANDMV# ބޭނުން ކުރުން

ސަން އައިލެންޑުން ވަނީ ދިވެހިންނަށާއި ރާއްޖޭގައި މަސައްކަތްކުރާ ބިދޭސީންނަށް ކުޑަ އަގެއްގައި މި އީދު ޗުއްޓީ ހޭދަކޮށްލެވޭނެ ގޮތް ހަމަޖައްސައިފަ އެވެ. އީދާ ދިމާކޮށް އެ ރިސޯޓުގައި ތަފާތު ކުޅިވަރު ހަރަކާތްތައް ހިންގުމަށް ވެސް ވަނީ ރާވައިފަ އެވެ.