ފަރާގެ އާ ޝޯއެއް؛ އާންޓީ ކިސްކޯ ބޯލާ!

ބޮލީވުޑްގެ މަޝްހޫރު ޑައިރެކްޓަރު/ކޮރިއޯގްރެފާ ފަރާ ޚާންގެ ކައްކާ ޝޯއަށް ލިބުނު ބޮޑު ތަރުހީބާއެކު އޭނާ އާ ޝޯއެއް ގެނެސްދޭން ނިންމައި އެކަން އިއްޔެ އިއުލާންކޮށްފި އެވެ.

ފަރާ އަލަށް އިއުލާންކުރި ޝޯގެ ނަމަކީ "އާންޓީ ކިސްކޯ ބޯލާ" ކިޔާ، އަންހެނުންނަށް ހާއްސަކޮށްފައިވާ ޓެލެންޓް ޝޯއެކެވެ. އެ ޝޯގެ ފުރަތަމަ އެޕިސޯޑު މިއަދު ގެނެސްދޭން ވަނީ ނިންމައިފަ އެވެ.

ފަރާގެ ޔޫޓިއުބްގެ ޗެނަލުން ގެނެސްދޭ އެ ޝޯގެ ފުރަތަމަ އެޕިސޯޑުގެ މެހުމާނުންނަކީ ގޯވިންދާ އަންހެނުން ސުނީތާ އަހޫޖާ އާއި ފަރާގެ ކޮއްކޮ އަދި ޑައިރެކްޓަރު ސާޖިދު ޚާން އެވެ.

ފަރާ އޭނާގެ ގޭގައި ގެންގުޅޭ ކައްކާ ދިލިޕްއާ އެކު ގެނެސްދޭ ސިލްސިލާ ކައްކާ ޝޯއަކީ އިންޑިއާގެ ޔޫޓިއުބުގައި މިހާރު އެންމެ މަގުބޫލު ކައްކާ ޝޯ އެވެ. އެ ޝޯގެ ޔޫޓިއުބް ވީޑިއޯތަކަށް ވަރަށް ބޮޑު ސަމާލުކަމެއް ލިބެ އެވެ. ހާއްސަކޮށް ދިލިޕްގެ ހުންނަ ސަކަ މިޒާޖަށް ގިނަ ބައެއްގެ ލޯބި ލިބިފައިވެ އެވެ. އިންޑިއާގެ މަޝްހޫރު އެތައް ފަންނާނުންނެއް އެ ޝޯއަށް ގެސްޓުންގެ ގޮތުގައި ވެސް ދެ އެވެ.

"މޭ ހޫ ނާ" އާއި "އޯމް ޝާންތި އޯމް" ކަހަލަ ދިވެހިންގެ ތެރޭގައި ވެސް މަޝްހޫރު އެތައް ފިލްމެއް ޑައިރެކްޓުކޮށްފައިވާ ފަރާގެ ކައްކާ ޝޯގެ އެޕިސޯޑެއް މި އަހަރު ރާއްޖޭގައި ވެސް ނަގާފައިވެ އެވެ.

މި އަހަރުގެ ބޮޑު އީދާ ދިމާކޮށް ފަރާ ރާއްޖެއަށް ކުރި އެ ދަތުރު ދައްކައިދޭ އެޕިސޯޑު މި މަހު ވަނީ ޔޫޓިއުބްގައި ސްޓްރީމް ކުރަން ފަށައިފަ އެވެ. އެ ވީޑިއޯއަށް މިހާތަނަށް 3.4 މިލިއަން ވިއުސް ލިބިފައިވެ އެވެ.