ފަގީރުންނާއި މިސްކީނުންނަށް ޒަކާތު ފަންޑުން އެހީވުން ފުޅާކުރަނީ

ފަގީރުންނާއި މިސްކީނުންނަށް ޒަކާތުގެ ފަންޑުން އެހީތެރިކަން ދެވޭނެ ގޮތުގެ އިތުރު މަޝްވަރާތައް ފަށައި އެ ކަމާ ގުޅޭ ހާއްސަ ކަރުދާހެއް ކެބިނެޓަށް ހުށަހަޅަން ތައްޔާރު ވަމުން އަންނަ ކަމަށް އިސްލާމިކް އެފެއާޒް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.

އޭނާ އެހެން ވިދާޅުވީ، އިންޓަނޭޝަނަލް ޒަކާތު ކޮންފަރެންސް ފެށުމުގެ ޖަލްސާގައި ވާހަކަ ދައްކަވަމުންނެވެ.

މިނިސްޓަރު ވިދާޅުވީ، މިހާރު އެކުލަވައިލަމުން އަންނަނީ ފަގީރުންނާއި މިސްކީނުންގެ ދިރިއުޅުމުގެ އެކިއެކި ޟަރޫރަތްތައް ފުއްދައި ދޭނެ ގޮތުގެ ތަސައްވުރު ކަމަށެވެ. އެހެންވެ، ކެބިނެޓަށް ހުށަހަޅާނެ ކަރުދާހެއް ތައްޔާރު ކުރުމާ ގުޅޭ ކަންކަން ކުރިއަށް ދާ ކަމަށް ވިދާޅުވި އެވެ. އޭގެ ތެރޭގައި ބޭސްފަރުވާ އާއި ތައުލީމާއި ބޯހިޔާވަހިކަން ފަދަ ޟަރޫރަތްތައް ހިމެނޭ ކަމަށް މިނިސްޓަރު ވިދާޅުވި އެވެ.

"މިކަން އަޅުގަނޑުމެންނަށް ތަރައްގީ ކުރެވިއްޖެ ނަމަ އަޅުގަނޑަށް ޔަގީން ހެޔޮ މުޖުތަމައެއް ރާއްޖޭގައި އުފެދިގެން ދާނެ ކަން. ހަމަ އެހެންމެ ޒަކާތުގެ ބެހެނިވެރިންގެ ތެރޭގައި ހުރި ކޮންމެ ބަޔަކީ ވެސް ހަމަ ތަރައްގީ ކުރެވޭނެ ބައެއް،" ޝަހީމް ވިދާޅުވި އެވެ.

އޭނާ ފާހަގަކުރެއްވި ގޮތުގައި އިސްލާމްދީނުގެ ރުކުންތަކުގެ ތެރެއިން ޒަމާނާއި ހާލަތަށް ބަލައި ތަރައްގީ ކުރެވެން އޮތް ހަމައެކަނި ރުކުނަކީ ޒަކާތުގެ ކަންތައްތަކެވެ. އެހެންވެ، ޝަހީމް ވިދާޅުވީ، މުޅި ގައުމު ނުފުދިގެން އުޅޭ މިފަދަ ޒަމާނެއްގައި ފަގީރުންނާއި މިސްކީނުންގެ "މި ޒަމާނުގެ މަފްހޫމެއް" ކަނޑައަޅަންޖެހޭ ކަމަށެވެ.

"އެއީ މީހުންނަށް ދިރިއުޅޭނެ ތަނެއް ލިބުމަކީ އެއީ ޝަރޫރަތެއް ހަޔާތުގައި. އޭނާ އަށް ތައުލީމު ލިބުމަކީ ހަޔާތުގައި ޝަރޫރަތެއް މި ޒަމާނުގައި. އެހެންވީމާ މި ކަންކަމާ މެދު ވިސްނައި ފިކުރު ކުރަންޖެހޭ،" މިނިސްޓަރު ވިދާޅުވި އެވެ.

ޒަކާތާ ބެހޭ ބައިނަލްއަގްވާމީ ކޮންފަރެންސް ފެށުމުގެ ޖަލްސާގައި ޝަހީމް ވިދާޅުވީ، ޒަކާތާ ގުޅޭ ކަންތައްތަކުގައި ރާއްޖެއަކީ ދުނިޔޭގަައި އެންމެ ލީޑިން ގައުމަށް ވުމަކީ އަމާޒެއް ކަމަށާއި އެ ކަމަށް ގިނަ މަސައްކަތްތަކެއް މިހާރު ވެސް ކުރަމުން އަންނަ ކަމަށެވެ.

އެއް ކާމިޔާބީއެއްގެ ގޮތުން މިނިސްޓަރު ފާހަގަކުރެއްވީ ރައްޔިތުންގެ މަޖިލިހަށް ސަރުކާރުން މިހާރު ހުށަހަޅާފައިވާ ޒަކާތު ބިލެވެ. އޭނާ ވިދާޅުވީ، އެ ބިލް ފަރުމާކުރީ "ދުނިޔޭގައި އެންމެ ފަހުގެ އިލްމީ ތަޖުރިބާގެ މައްޗަށް" ކަމަށެވެ.

"އެހެންކަމުން މީގެ އެތައް އަހަރެއް ކުރިން އެކި ގައުމުތަކުގައި މި ދާއިރާގައި ތަހުސީސް ކުރެވުނު ގާނޫނުތަކަށް ވުރެ ދިވެހިރާއްޖޭގައި ޒަކާތުގެ ބިލް ނުވަތަ ގާނޫނު ވަރަށް ފުރިހަމަ ވާނެ،" އިސްލާމީ މަރުކަޒުގައި ކުރިއަށް ގެންދާ ކޮންފަރެންސްގައި ޝަހީމް ވިދާޅުވި އެވެ.

އޭގެ ސަބަބެއް ކަމަށް މިނިސްޓަރު ވިދާޅުވީ، އެ ބިލްގައި އިދާރީ މެނޭޖުމަންޓާއި ޝަރުއީ ހަމަތައް ގުޅިލާމެހިފައި ވުމާއި އިންވެސްޓުމަންޓުތަކަށް ފުރުސަތު ދީފައިވުން ކަމަށެވެ. އަދި އެއީ ޒަކާތާ ބެހޭ އެހެން ގާނޫނުގައި ނެތް ސިފައެއް ކަމަށް އޭނާ ވިދާޅުވި އެވެ.

"ދިވެހިރާއްޖޭގެ ޒަކާތުގެ ގާނޫނު ވުޖޫދު ވެގެން މި އަންނަނީ އިދާރީ މެނޭޖުމަންޓު، އިދާރީ ގޮތުން ޒަކާތް ހަވާލުވެ، ބެހުމުގެ އިދާރީ އިންތިޒާމުތަކާއި ޝަރުއީ ކޮމިޓީ ގާނޫނުގައި އެބައޮތް. އިންވެސްޓްމަންޓު އެޑްވައިޒަރީ ކޮމިޓީ ގާނޫނުގައި އެބައޮތް. އިންވެސްޓް ކުރާނެ ހަމަތަކާއި ގޮތްތައް އަދި ކުރިއަށް ދެވޭނެ މަގުތަކަކީ ކޮބައިކަން ގާނޫނުގައި ބަޔާންކޮށްފައި އޮންނާނެ،" ޝަހީމް ވިދާޅުވި އެވެ.

އެހެންވެ، އެއީ ޒަކާތާ ގުޅޭ ކަންތައްތަކުގައި އާ އުސްމިނަކަށް ރާއްޖެ ގެންގޮސްދޭނެ ގާނޫނަކަށް ވާނެ ކަމަށް އޭނާ ވިދާޅުވި އެވެ. އަދި ރާއްޖޭގައި ޝަރުއީ، އިލްމީ އަސާސްތައް ވެސް ވެސް ބަޔާން ކޮށްފައި ވާނީ އެންމެ ފަހުގެ ތަޖުރިބާތައް ކަމަށް މިނިސްޓަރު ވިދާޅުވި އެވެ.

ޝަހީމް ވިދާޅުވިގޮތުގައި އެ ބިލް ކުރިއަށް އޮތް އޮކްޓޫބަރު މަހުގެ ތެރޭގައި ރައްޔިތުންގެ މަޖިލިހުން ފާސްކުރާނެ ކަމަށް އުންމީދު ކުރެވޭއިރު، އެ ގާނޫނު ތަރުޖަމާކޮށް އެހެން ގައުމުތަކަށް ވެސް ފޮނުވާނެ އެވެ.

އޭނާ ވިދާޅުވީ، ޒަކާތުގެ ބިލް އެކުލަވައިލުމުގައި މިދިޔަ އަހަރު ބޭއްވި އިންޓަނޭޝަނަލް ޒަކާތު ކޮންފަރެންސަށް އިލްމުވެރިން ދެއްވި ލަފަ އާއި އިރުޝާދުގެ ބޭނުން ހިފާފައިވާނެ ކަމަށެވެ.