މަޑިވަރު ފިނޮޅު ހިމާޔަތްކޮށް، ރަސްދޫ ރައްޔިތުންނަށް ފައިދާވާ ގޮތަށް ތަރައްގީ ކޮށްދޭނަން: ރައީސް

އއ. ރަސްދޫ ފަޅުތެރޭގައި އޮންނަ މަޑިވަރު ފިނޮޅު ހިމާޔަތްކޮށް، އެތަނުން އެ ރަށު ރައްޔިތުންނަށް ފައިދާ ލިބޭގޮތަށް ތަރައްގީ ކޮށްދެއްވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

އއ. އަތޮޅަށް އެމަނިކުފާނު ކުރައްވާ ދަތުރުފުޅުގައި ރަސްދޫ ރައްޔިތުންނާ ބައްދަލު ކުރައްވައި، ވިދާޅުވީ އެ ރަށު ރައްޔިތުން ބޭނުންވާ މަޑިވަރުފަޅު ތަރައްގީކޮށް ދެއްވާނެ ކަމަށް ރިޔާސީ އިންތިހާބުގެ ކެމްޕޭނުގައި ވައުދުވެވަޑައިގެންފައިވާތީ އެކަން ކޮށްދެއްވާނެ ކަމަށެވެ.

"ރަށުގެ ޓޫރިޒަމް އަދި ރައްޔިތުންގެ ބޭނުމަށް އޮތް މަޑިވަރު ފިނޮޅު ތިބޭފުޅުން ބޭނުންވާ ގޮތަށް ހަދައިދިނުމަކީ އަޅުގަނޑުގެ ވައުދެއް. އެތަނުގައި ޖިއޯބޭގް ޖަހައި ތަރައްގީކޮށްދީ، އެތަން ހިމާޔަތްކޮށް، ތިބޭފުޅުން ޓޫރިޒަމް ބޭނުމަށް ބޭނުންކުރެވޭނެ ގޮތަށް ހައި ޕްރިއޯރިޓީގައި މަސައްކަތްކޮށްދޭނަން،" ރައީސް ވިދާޅުވި އެވެ.

މަޑިވަރު ފިނޮޅަކީ ރާއްޖެ އަންނަ ޓޫރިސްޓުންގެ މެދުގައި ޑައިވިން އަދި ސްނޯކްލިންއަށް މަގުބޫލު ޕޮއިންޓުތަކެއް ހިމެނޭ ސަރަހައްދެކެވެ.

މަޑިވަރު ފިނޮޅު ސަރަހައްދު ސަރުކާރުން ހިމާޔަތް ކޮށްފައި ވަނީ އޮކްޓޯބަރު، 2018 ގަ އެވެ. އޭގެ ފަހުން 2019 ގައި އެ ފަޅު ކައިރިން ވިޔަފާރި އުސޫލުންނާއި އަމިއްލަ ބޭނުމަށް މަޑިވަރު ފިނޮޅާ ދުރުން ވެލި ނަގާތީ، އެ ސަރަހައްދުން ވެލި ނެގުމަކީ މަނާ ކަމެއް ކަމަށް އެންވަޔަރްމެންޓަލް ޕްރޮޓެކްޝަން އޭޖެންސީ (އީޕީއޭ) އިން އެންގި އެވެ. އަދި 2021 ގައި އެ އަތޮޅުގައި އޮންނަ ވެލިގަނޑު އައިލެންޑް ރިސޯޓުން މަޑިވަރު ފަޅުގެ ބައެއް ގަވައިދާ ހިލާފަށް ހިއްކަމުންދާ ކަމަށް ބުނެ، ރަސްދޫ ރައްޔިތުން އިހުތިޖާޖު ވެސް ކުރި އެވެ.