އަތޮޅު ކައުންސިލްތައް އުވާލަން ކުރިއަށް އޮތް ދައުރުގައި ގާނޫނުއަސާސީ އިސްލާހު ކުރަނީ!

ލާމަރުކަޒީ ނިޒާމުގެ ތެރޭގައި އަތޮޅު ކައުންސިލްތައް ނޯންނަ ގޮތް ހެދުމަށްޓަކައި އަންނަ އަހަރުގެ މާޗު މަހު ބާއްވާ ކައުންސިލް އިންތިހާބުގެ ކުރިން އަދި ރައްޔިތުންގެ މަޖިލިހުގެ ކުރިއަށް އޮތް ދައުރުގެ ތެރޭގައި ގާނޫނުއަސާސީ އިސްލާހު ކުރައްވާނެ ކަން ރައީސް ޑރ. މުހައްމަދު މުއިއްޒު މިރޭ އިއުލާން ކުރައްވައިފި އެވެ.

އެ މަނިކުފާނު އެކަން އިއުލާން ކުރެއްވީ އއ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި މަތިވެރީގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގަ އެވެ. ރައީސް ވިދާޅުވީ، މަހެއްހާ ދުވަހުގެ ޗުއްޓީއަކަށް ފަހު މަޖިލިހުގެ ކުރިއަށް އޮތް ދައުރު ފަށާއިރަށް އެ އިސްލާހު ފޮނުއްވާނެ ކަަމަށެވެ.

އަތޮޅު ކައުންސިލަކީ ލާމަރުކަޒީ ނިޒާމުގެ ތެރޭގައި ހިމަނާފައިވާ ބޭކާރު ފަށަލައެއް ކަން ފާހަގަކުރައްވަމުން އެ މަނިކުފާނު ވިދާޅުވީ "ކުރިއަށް އޮތް ލޯކަލް ކައުންސިލް އިންތިހާބުގައި ރައްޔިތުން ވޯޓުލާން ދާއިރު އަތޮޅު ކައުންސިލެއް ހޮވާކަށް ވޯޓެއް ލާކަށް ނުޖެހޭނެ" ކަމަށެވެ.

"އެ ފަށަލަ ދުއްވާލީމާ އިތުރަށް ރައްޔިތުން ބާރުވެރި ވަނީ. ކޮންމެ ރަށެއްގެ ރަށު ކައުންސިލް ދެން މަސައްކަތް ކުރާނީ ކަމާ ބެހޭ ވުޒާރާތަކާއި ކުންފުނިތަކާ ޑައިރެކްޓްލީ. އަތޮޅު ކައުންސިލެއް ބޭނުމެއް ނުވާނެ،" ރައީސް ވިދާޅުވި އެވެ.

ރައީސް ވިދާޅުވީ، އަތޮޅު ކައުންސިލްތަކަކީ ބޭކާރު ބައެއް ކަން ކޮންމެ ރަށެއްގެ ރަށު ކައުންސިލުން އެއްބަސްވާނެ ކަަމަށެވެ.

އެ މަނިކުފާނު ވިދާޅުވިގޮތުގައި އަތޮޅު ކައުންސިލްތައް އުވައިލެވެން އޮތީ ގާނޫނުއަސާސީ އިސްލާހު ކޮށްގެން ކަމަށް ވާތީ އެކަން އޮތީ ކުރާ ގޮތަށެވެ.

ރައީސް މުއިއްޒު ވިދާޅުވީ، ކައުންސިލްތަކުން ރައްޔިތުންނަށް ކޮށްދޭން ބޭނުންވާ ކަންކަމަށް މި ސަރުކާރުން ހުރަހެއް ނާޅާނެ ކަމަށާއި ސަރުކާރުން ބޭނުންވާ ކަމަކީ ޒިންމާދާރު ކުރުވާ ނިޒާމެއް ގާއިމްކޮށް، ޗެކް އެންޑް ބެލެންސް ވަރުގަދަ ކުރަން ކަމަށެވެ. އަދި ވިދާޅުވީ، ކައުންސިލަކުން ރައްޔިތުންނަށް ކަންކަން ކޮށްދޭން ބޭނުންވާ ބާރު މިނުގައި ކައުންސިލްގެ އަތުގައި ހިފައިގެން މި ސަރުކާރުން ކުރިއަށް ދާނެ ކަމަށެވެ.

"ގުޑް ގަވަނަންސް އެކަނި އެޗީވް ކުރަން ބޭނުންވަނީ،" އެ މަނިކުފާނު ވިދާޅުވި އެވެ.

ރައީސް ވިދާޅުވިގޮތުގައި މި ސަރުކާރުން މަސައްކަތް ކުރަނީ ވަރަށް އިހުލާސްތެރިކަމާ އެކު، ރައްޔިތުންގެ ފަޅީގައި ތިބެގެން ރައްޔިތުން ބާރުވެރި ކުރުވާށެވެ.

"ހަމައެކަނި ޔަގީން ކުރަން ބޭނުންވަނީ ކުރިން މި ދެންނެވިހެން ޗެކް އެންޑް ބެލެންސް، ދެފުށް ފެންނަ ކަން، އެކައުންޓަބިލިޓީ، ކައުންސިލްތަކުން ކުރާ ކަންކަމަށް ޒިންމާދާރު ކުރުވުމާއި މި ކަންކަން. އެ ކަންކަން ކުރުމަށްޓަކައި ގެންނަންޖެހޭ އިސްލާހުތަކެއް ގެންނަނީ،" ކުރިއަށް އޮތް ތަނުގައި ވެސް ލާމަރުކަޒީ ގާނޫނަށް އިސްލާހުތަކެއް ގެންނާނެ ކަން ހާމަކުރައްވަމުން ރައީސް ވިދާޅުވި އެވެ.

އެ އިސްލާހުތަކުގެ ތެރޭގައި ކައުންސިލްތަކުގެ ސައިޒު ކުޑަކުރުން ވެސް ހިމެނެ އެވެ.

ސަރުކާރުން ލާމަރުކަޒީ ގާނޫނު އިސްލާހު ކުރަން މިހާރު ނިންމާފައި ވަނީ 2،000 އިން ދަށުގެ އާބާދީގެ ރަށްރަށުގައި ތިން މެމްބަރުންގެ ކައުންސިލެއް އަދި 2،000 އަށް ވުރެ އާބާދީ ބޮޑު ނަމަ ފަސް ކައުންސިލަރުން ތިއްބަވާ ގޮތަށެވެ. އަދި އަންހެނުންގެ ތަރައްގީ އަށް މަސައްކަތް ކުރާ ކޮމިޓީތަކަށް ވެސް ގެންގުޅެނީ އެ ރޭޝިއޯ އެވެ. އެކަމަކު، އަންހެނުންގެ ތަރައްގީ އަށް މަސައްކަތްކުރާ ކޮމިޓީތަކުގެ ރައީސާގެ މަގާމަށް މުޅި ރަށުގެ ރައްޔިތުން ވޯޓުލައިގެން މީހަކު އިންތިހާބު ކުރާނެ ކަމަށް ރައީސް ވިދާޅުވި އެވެ. އަދި އެއީ ފުލްޓައިމް ވަޒީފާއަކަށް ހަދަން ގާނޫނު އިސްލާހު ކުރާނެ ކަމަށް ރައީސް ވިދާޅުވި އެވެ.

"އެއީ އަންހެނުން ބާރުވެރި ކުރުވަން އަޅުގަނޑުމެން ކުރާ ކަމެއް. ވަރަށް ގިނަ ޑަބްލިއުޑީސީތަކަށް ދިމާވާ ވަރަށް ގިނަ މައްސަލަ ހައްލު ވާނެ މިކަން ކުރީމާ،" އެ މަނިކުފާނު ވިދާޅުވި އެވެ.

ނަމަވެސް، ސިޓީ ކައުންސިލްތަކަށް ގެންގުޅޭނީ ގާތްގަނޑަކަށް މިހާރު ވެސް އޮތް ނިޒާމު ކަމަށް ރައީސް މުއިއްޒު މިރޭ ވިދާޅުވި އެވެ.

ލާމަރުކަޒީ ގާނޫނަށް މި މަހުގެ ކުރީކޮޅު ވެސް އިސްލާހުތައް ގެނެސް މިދިޔަ ހަފުތާގައި ވަނީ އެ އިސްލާހުތަކަށް އަމަލުކުރަން ފަށައިފަ އެވެ.