ލާމަރުކަޒީ ގާނޫނުގެ އިސްލާހުގެ ބިލް ތަސްދީގުކޮށްފި

ލާމަރުކަޒީ ގާނޫނަށް ސަރުކާރުން ހުށަހެޅި އިސްލާހުތަކުގެ ބިލް ރައީސް ޑރ. މުހައްމަދު މުއިއްޒު ރޭ ތަސްދީގު ކުރައްވައިފި އެވެ.

މި މަހުގެ ހަ ވަނަ ދުވަހު ބޭއްވި ރައްޔިތުންގެ މަޖިލިހުން ފާސްކުރި ބިލް ރައީސް މި ތަސްދީގު ކުރެއްވިއިރު، އެ ބިލް ތަސްދީގު ނުކުރައްވަން އެމްޑީޕީ އަދި 60 އަށް ވުރެ ގިނަ ކައުންސިލްތަކުން އެދި ބަޔާން ނެރެފައި ވެ އެވެ.

ނަމަވެސް މި ހަފުތާގައި ބ. އަތޮށް ކުރެއްވި ދަތުރުފުޅުގައި އިއްޔެ ރޭ ދަރަވަންދޫގައި ބޭއްވި ޖަލްސާގައި ރައީސް މުއިއްޒު ވިދާޅުވީ، ލާމަރުކަޒީ ގާނޫނަށް ގެނައި އިސްލާހުތަކުގެ ސަބަބުން ރައްޔިތުން އިތުރަށް މުއްސަނދިވެ، ބާރުވެރި ވާނީ ކަމަށެވެ.

"އަޅުގަނޑަށް އެނގޭ ލާމަރުކަޒީ ނިޒާމު އަލިފުން ޔާއަށް. ބައެއް ބޭފުޅުން ސަރުކާރުން ރައްޔިތުންގެ ފަޅީގައި އޮވެ ލާމަރުކަޒީ ނިޒާމަށް މި ގެންނަ އިސްލާހުތައް އެބަ ލޭބަލް ކުރޭ އެއީ ރައްޔިތުންނަށް ކޮށްދޭ ކަމެއް ނޫން ކަމަށް،" ރައީސް ވިދާޅުވި އެވެ.

އެ އިސްލާހުތަކުގެ ކޮންމެ މާއްދާއެއް ވަކިވަކިން ވިދާޅުވެ، އެ މަނިކުފާނު ވިދާޅުވީ އެ އިން ކޮންމެ އިސްލާހަކުން ބާރުވެރިވެ، މުއްސަނދިކަން ލިބޭނީ ރައްޔިތުންނަށް ކަމަށެވެ.

ގާނޫނަށް މި ފަހަރު ގެނައި އިސްލާހުތަކުގެ ތެރެއިން އެއް އިސްލާހުގައިވާ ގޮތުން ނަމަ ރަށްރަށުގެ ލޯކަލް އޮތޯރިޓީ ކުންފުނިތަކުން 10 މިލިއަން ވުރެ ދަށުގެ ވިޔަފާރި ނުކުރެވޭނެ އެވެ. އަދި ރޭ ތަސްދީގު ކުރެއްވި ބިލްގެ މާއްދާއާ ތައާރަޒުވާ ނަމަ އެ މާއްދާ އަށް ނުވަތަ އިސްލާހަށް އަމަލުކުރަން ފަށާތާ 90 ދުވަހުގެ ތެރޭގައި އެފަދަ ވިޔަފާރީގެ ހަރަކާތްތައް ހުއްޓާލަން ވާނެ ކަމަށް ބިލްގައި ބަޔާންކޮށްފައި ވެ އެވެ.

ރައީސް މުއިއްޒު ވިދާޅުވެފައި ވަނީ އެއީ ރަށްރަށުގެ ކުދި އަދި މެދުފަންތީގެ ވިޔަފާރިތައް އިތުރަށް ކުރިއަރުވަން ގެނައި އިސްލާހެއް ކަމަށެވެ. އެ މަނިކުފާނު ވިދާޅުވީ ލޯކަލް އޮތޯރިޓީ ކުންފުނިތަކުން 10 މިލިއަން ރުފިޔާ އަށް ވުރެ ބޮޑު އިންވެސްޓުމަންޓުތައް ހިންގައިގެން ލިބޭ ފައިދާއިން ރައްޔިތުންނަށް ކަންކަން ކޮށްދެވޭނެ ކަމަށެވެ.

ލާމަރުކަޒީ ގާނޫނަށް ދެން ގެނައި އިސްލާހުތަކުގެ ތެރޭގައި ހިމެނެނީ ފެނާއި ކަރަންޓު ފަދަ އަސާސީ ބޭނުންތަކަށް ދޫކުރާ ބިންތަކާއި އިމާރާތްތަކުން ކައުންސިލްތަކަށް ކުލި ނުނެގުމާއި ކައުންސިލްތަކުން އާމްދަނީ ހޯދަން ކުރާ މަސައްކަތްތަކުން ސަރުކާރަށް ޓެކްސް ދެއްކުމާއި ކައުންސިލްތަކުގެ އެކައުންޓުތަކުގައި ހުންނަ ފައިސާގެ މައުލޫމާތު ފިނޭންސް މިނިސްޓްރީ އާއި އެލްޖީއޭ އިން އެދިއްޖެ ނަމަ ދޭން ލާޒިމް ކުރުމެވެ.

ކައުންސިލްތަކުގެ ފަހު އަހަރު ކައުންސިލްގެ އިދާރާތަކަށް މުވައްޒަފުން ނެގުމާއި ބިންތައް ދޫކުރުމުގައި ފިނޭންސް މިނިސްޓްރީ އާއި އެލްޖީއޭގެ ހުއްދަ ހޯދަން ޖެހޭ އިސްލާހެއް ވެސް މި ބިލްގައި ވެ އެވެ. އެ ކަމަކު އެ ހުއްދަ ނަގަން ޖެހޭނީ ހިނގަމުން އަންނަ ކައުންސިލްތަކުގެ ދައުރު ހަމަވާން އެއް އަހަރު ގުނަން ފަށާ ހިސާބުންނެވެ.

ލާމަރުކަޒީ ގާނޫނަށް ގެނައި އިސްލާހުތައް ދިފާއު ކުރައްވަމުން ރައީސް މުއިއްޒު ދަރަވަންދޫގައި އިއްޔެ ރޭ ވިދާޅުވީ، އެއީ އެ ނިޒާމު "ހަރުދަނާކުރުމަށް، ޗެމްޕިއަން ކުރުމަށް" ގެންނަންޖެހޭ އިސްލާހުތަކެއް ކަމަށެވެ.

މި އިސްލާހުތަކާ ގުޅިގެން ހދ. ކުޅުދުއްފުށީ މޭޔަރު މުހައްމަދު އާތިފު ވިދާޅުވެފައި ވަނީ ލާމަރުކަޒީ ގާނޫނުގެ އިސްލާހުތަކުގެ ބިލް ތަސްދީގުކުރާ ވަގުތުން ފެށިގެން ކުޅުދުއްފުށީ ސިޓީ ކައުންސިލަށް އަހަރަކު 3.9 މިލިއަން ރުފިޔާ ގެއްލުން ވާނެ ކަމަށެވެ. އެއީ އަސާސީ ބޭނުންތަކަށް އެ ސިޓީން ދޫކޮށްފައިވާ ތަންތަނުން ކައުންސިލަށް ކުލި ނެގުނެއް ހުއްޓާލުމުންނެވެ.

ރައީސް ވިދާޅުވީ، އަސާސީ ބޭނުންތަކަށް ދޫކޮށްފައިވާ ބިންތަކާއި އިމާރާތްތަކުން ކައުންސިލްތަކަށް ކުލި ނެގުން ހުއްޓާލުމުން ހިދުމަތްތަކުގެ އަގު ހެޔޮވެ، އޭގެ ފައިދާ ވެސް ލިބޭނީ ސީދާ ރައްޔިތުންނަށް ކަމަށެވެ.