ހަނިފަރު ސަރަހައްދު ބަލަހައްޓާ ވޮޗްޓަވާއެއް ދަރަވަންދޫގައި ބަހައްޓަނީ

ސަރުކާރުން ހިމާޔަތް ކޮށްފައިވާ ބ. ހަނިފަރު ސަރަހައްދު ބަލަހައްޓާނެ "ވޮޗްޓަވާ" އެއް ދަރަވަންދޫގައި ބެހެއްޓެވުމަށް ރައީސް ޑރ. މުހައްމަދު މުއިއްޒު ރޭ ނިންމަވައިފި އެވެ.

މީގެ 12 އަހަރު ކުރިން 2013 ގައި އުފެއްދި ބ. އަތޮޅު ބަޔޮސްފިޔާ ރިޒާވް އޮފީހާއި ވޮޗްޓަވާ މިހާރު ހުންނަނީ އެ އަތޮޅު އޭދަފުށީގަ އެވެ.

ރައީސް ބ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި ރޭ ދަރަވަންދޫ ރައްޔިތުންނާ ބައްދަލުކުރައްވައި ވިދާޅުވީ އެއީ ލޯކަލް ޓޫރިޒަމް ފުޅާދާއިރާއެއްގައި ކުރަމުން އަންނަ ރަށެއް ކަމަށެވެ.

ދަރަވަންދޫއާ މާ ދުރުނޫން ހިސާބެއްގައި އޮންނަ ހަނިފަރު ސަރަހައްދަކީ ޓޫރިސްޓުންގެ މެދުގައި ވަރަށް މަގުބޫލު ސަރަހައްދެއް ކަމަށާއި އެއީ ޓޫރިޒަމަށް ވަރަށް މުހިންމު ތަނެއް ކަން ރައީސް މުއިއްޒު ފާހަގަކުރެއްވި އެވެ.

އެ ތަނުން ލިބޭ ފައިދާ އިތުރު ކުރުމަށް، އިތުރު ކަންކަން ކުރަން ނިންމަވާފައިވާކަން ހާމަކުރައްވަމުން ރައީސް ވިދާޅުވީ، ހަނިފަރު ސަރަހައްދު ބަހަލައްޓާނެ އިތުރު ވޮޗްޓަވާއެއް ދަރަވަންދޫގައި ބެހެއްޓުމަށް އަންނަ އަހަރުގެ ބަޖެޓުގައި ފައިސާ ހިމަނުއްވާނެ ކަމަށެވެ.

"މި ރަށުގައި ލޯކަލް ޓޫރިޒަމް ހިންގާ ފަރާތްތަކުން އެ ސަރަހައްދުގެ ބޭނުން ކުރުމުގައި މި ރަށަަށް ބޭނުންވާ ފަސޭހަތައް ހޯދައިދިނުމުގެ މަސައްކަތް އަޅުގަނޑުމެން ކުރިއަށް ގެންގޮސްދޭނެކަން އަޅުގަނޑު ދަންނަވަން،" އެ މަނިކުފާނު ވިދާޅުވި އެވެ.

ދޮންފަނާ އެންމެ ކައިރީގައި އޮންނަ ހަނިފަރު ސަރަހައްދު މިހާރު އޭދަފުށިން ބަލަހައްޓަމުން އަންނާތީ އިއްޔެ އެ ރަށު ކައުންސިލްގެ ރައީސް އަހުމަދު އިރުޝާދު ވަނީ އެކަމާ ކަންބޮޑުވުން ވެސް ފާޅުކުރައްވައިފަ އެވެ. އޭނާ ވަނީ އެ ތަން ބެލެހެއްޓުން ދޮންފަނު ކައުންސިލާ ހަވާލު ކޮށްދެއްވުމަށް ވެސް ރައީސް މުއިއްޒުގެ އަރިހުގައި އެދިވަޑައިގެންފަ އެވެ.

ބަޔޮސްފިޔާ ރިޒާވް އޮފީހުގެ ބެލުމުގެ ދަށުގައި އޮތް ހަނިފަރު ސަރަހައްދަށް ފީނަން ދާ ޓޫރިސްޓުންގެ އަތުން 10-20 ޑޮލަރުގެ ފީއެއް އެ އޮފީހުން ނަގަ އެވެ. ދިވެހިންގެ އަތުން ނަގަނީ ދެ ޑޮލަރެވެ. ގިނަ އަދަދެއްގެ މަންތާ އާއި ފެހުރިހި ފެންނަ އެ ސަރަހައްދަށް ދާ މީހުންގެ އަތުން ނަގާ ފީ ބޭނުންކުރަނީ ބ. އަތޮޅުގެ ވެށި ހިމާޔަތްކުރުމަށް ކުރާ މަސައްކަތްތަކަށެވެ.