ފަރަށް އެރި ދޯންޏެއް އަޑިއަށް، ދަތުރުކުރި މީހުން ސަލާމަތް ކޮށްފި

މާލެ އިން މުދާ ބަރުކޮށްގެން ތިން މީހުންނާ އެކު ތ. ވޭމަންޑުއަށް ދަތުރުކުރި ދޯންޏެއް ފަރަށް އަރައި އަޑިއަށް ހިނގައްޖެ އެވެ.

''އަލްމަޖްރާ'' ނަމަކަށް ކިޔާ ދޯނި އެރީ މ. ދިއްގިރި ކައިރި ފަރަކަށެވެ.

ފުލުހުން ބުނީ އެ ދޯނި ފަރަށް އަރައި ދިޔަވެ، އަޑިއަށްދާ ކަމުގެ މައުލޫމާތު ލިބުނީ މިއަދު ފަތިހު 5:34 ހާއިރު ކަމަށެވެ.

އެ ރިޕޯޓު ލިބުމުން ވ. އަތޮޅު ފުލުހުން އެ ސަރަހައްދަށް ދިޔައިރު، އެ ދޯނިން ދަތުރުކުރި ތިން މީހުން ފެނުނީ ފަރުމަތީގައި ތިއްބަ އެވެ. އެ މީހުން ފުލުހުންގެ ލޯންޗަށް ނަގައި ފެލިދުއަށް ގެންގޮސްފައިވާ ކަމަށް ފުލުހުން ބުންޏެވެ.

އެއީ ދިވެއްސަކާއި ބަންގްލަދޭޝްގެ ދެ މީހެކެވެ.

ފުލުހުން ބުނި ގޮތުގައި ތިން މީހުންގެ ހާލު ވެސް ރަނގަޅެވެ.

އެ ދޯނީގައި ގިނަ އަދަދަކަށް ފީވީސީ ފިލަ އާއި އިމާރާތްކުރުމާ ގުޅުން ހުރި ގިނަ ސާމާނުތަކެއް ހުރި ކަމަށް ދޯނީގައި ތިބި މީހުންނާ ހަވާލާދީ ފުލުހުން ބުންޏެވެ. މުދަލާ އެކު ދޯނި މިހާރު ވަނީ އަޑިއަށް ގޮސްފަ އެވެ.

ދޯނީގައި ހުރި ތަކެތި އޮޔާދާތީ، އެ ސަރަހައްދުން ދަތުރުކުރާއިރު ސަމާލުވުމަށް ފުލުހުން ވަނީ އިލްތިމާސް ކޮށްފަ އެވެ.

ހުޅަނގު މޫސުން ފެށި، މި ދުވަސްވަރު ރާއްޖެ އަށް މޫސުން ގޯހެވެ. އަންނަ ބުރާސްފަތި ދުވަހުގެ ނިޔަލަށް މުޅި ރާއްޖެއަށް ވިއްސާރަކުރާނެ ކަމަށް މެޓުން ވަނީ ލަފާކޮށްފަ އެވެ. އެހެންވެ ދަތުރުފަތުރުކުރުމުގައި މޫސުމަށް ސަމާލުކަން ދޭން މެޓުން ވަނީ އިލްތިމާސްކޮށްފަ އެވެ.