ޓީޓީ ފިރިހެން ޓީމަށް ދެކުނު އޭޝިއާގެ މުބާރާތަކުން ފުރަތަމަ ފަހަރަށް މެޑަލް

ދެކުނު އޭޝިއާގެ ކޮލިފައިން މުބާރާތުން ރާއްޖޭގެ ޓީޓީގެ އަންހެން އަދި ފިރިހެން ޓީމު ވެސް ލޯ މެޑަލް ހޯދައިފި އެވެ.

މިދިޔަ ބުދަ އަދި ބުރާސްފަތީގައި ނޭޕާލްގައި ކުރިއަށްދިޔަ މުބާރާތަކީ ވޯލްޑް ޗެމްޕިއަންޝިޕަށް ކޮލިފައިވުމަށް ކުޅުނު ދެކުނު އޭޝިއާގެ ކޮލިފައިން މުބާރާތެވެ.

އަންހެން ޓީމުގެ ކާމިޔާބަށް ވުރެ، މިފަހަރުގެ މުބާރާތުގައި ފާހަގަ ވީ ދިވެހި ފިރިހެން ޓީމުން ހޯދި ކުރި އެރުމެވެ. ފަސް ގައުމު ވާދަކުރި މުބާރާތަކީ ދެކުނު އޭޝިއާގެ މުބާރާތަކުން ރާއްޖޭގެ ފިރިހެން ޓީމުން ހޯދި ފުރަތަމަ މެޑައްޔެވެ.

ތަޖުރިބާކާރު ކުޅުންތެރިޔާ މޫސާ މުންސިފް އަހްމަދާއި ގައުމީ ޗެމްޕިއަން އަޚްޔާރު އަހްމަދު ހާލިދު، މުހައްމަދު ޝައްފާން އިސްމާއީލް އަދި ޒީސްތު ނަސީމު، ހިމެނުނު ޓީމުން ވަނީ ލަންކާ އާއި ބަންގްލަދޭޝް ވެސް ބަލިކޮށްފަ އެވެ. އެއީ ފިރިހެން ޓީމުން ލަންކާ ބަލި ކުރި ފުރަތަމަ ފަހަރެވެ.

މީގެ ކުރިން، ފާހަގަވެފައި އޮތީ ދިވެހި އަންހެން ޓީމުގެ ކުޅުމެވެ. އެކަމަކު ޓީޓީގެ ތަޖުރިބާކާރަކު ބުނީ އަންހެން ޓީމަށް ވުރެ ފިރިހެން ޓީމުގެ ކުޅުން އެ މުބާރާތުގައި ރަނގަޅު ކަމަށެވެ.

"އެންމެ ބޮޑު ސަބަބަކީ ފިރިހެން ޓީމުން އެ ފަންނަ ވާދަވެރިކަން. ވަކިވަކި ކުޅުންތެރިން ވެސް ވަރުގަދަ އަށް ކުޅެގެން ގައުމީ ޓީމުގައި ހިމެނެނީ. މި ޓީމުގައި ވަރަށް ޕޮޓެންޝިއަލް އެބައޮތް. ދެކުނު އޭޝިއާގެ މުބާރާތުން މިއަށްވުރެ ދުރަށް ދިއުމުގެ،" އޭނާ ބުންޏެވެ.

އިނގިރޭސިވިލާތުގައި އެމްބީބީއެސް ކިޔަވަމުންގެންދާ އާއިޝަތު ރަފާ ނާޒިމު ވެސް، ހޫނު މޫސުމުގެ ޗުއްޓިއާ ދިމާވާތީ ރާއްޖެ އައިސް، މިދިޔަ މަހު ބޭއްވި ގައުމީ ރޭންކިން މުބާރާތުގައި ވާދަކޮށް ގައުމީ ޓީމުން ޖާގަ ކަށަވަރު ކުރި އެވެ. ރޭންކިން މުބާރާތުން އޭނާ ދިޔައީ ދެވަނަ އަށެވެ.

ހަ އަހަރު ކުރިން ނޭޕާލްގައި ބޭއްވި ސައުތު އޭޝިއަން ގޭމްސްގައި ލޯ މެޑަލް ހޯދި އަންހެން ޓީމުގެ ކުޅުން މިފަހަރު ދަށެވެ.

"އަންހެން ޓީމުގެ ކުޅުން ދަށްވުމުގައި އެބަހުރި ސަބަބުތަކެއް. ރަފާ އާއި ދީމާއާ ވާދަކޮށްގެން ޓީމަށް އަރަން ކުރަންޖެހޭ މަސައްކަތް ބައެއް ކުޅުންތެރިންނަކަށް ނުކުރެވޭ. ބައެއް ކުޅުންތެރިންގެ ފަރާތުން އެ ކޮމިޓްމެންޓް ނުފެންނަނީ،" ތަޖުރިބާކާރު ބުންޏެވެ.

އޭނާ ބުނީ ކުރީގެ ކުޅުން ދައްކަން އަންހެން ޓީމުގެ ކުޅުންތެރިން ބުރަކޮށް މަސައްކަތް ކުރަން ޖެހޭ ކަމަށެވެ.

"އެހެން ނުނީ އައިއޯއައިޖީ [އިންޑިއަން އޯޝަން އައިލެންޑް ގޭމްސް] ގައި ވެސް އުނދަގޫވާނެ (ޓީމު އިވެންޓުން) މިހާރު ހޯދާފައި އޮތް ކާމިޔާބު ދަމަހައްޓަން،" އައިއޯއައިޖީގެ ޓީމު އިވެންޓުން 2023 ގައި ރަން މެޑަލް ދިފާއު ކުރި އަންހެން ޓީމާ ބެހޭގޮތުން ތަޖުރިބާކާރު ބުންޏެވެ.

ދެކުނު އޭޝިއާގެ ކޮލިފައިން މުބާރާތް ކާމިޔާބުކޮށް ވޯލްޑް ޗެމްޕިއަންޝިޕްގެ ޓީމު އިވެންޓަށް ކޮލިފައިވީ އިންޑިއާގެ އަންހެން ޓީމާއި ފިރިހެން ޓީމެވެ.