ތާރީހީ މެޑަލް، ޓީޓީ ކުރިމަގަށް މުހިންމު ކާމިޔާބެއް

އިސްލާމިކް ސޮލިޑާރިޓީ ގޭމްސްގެ ޓޭބަލް ޓެނިސްގެ އަންހެން ޓީމު އިވެންޓުން ލޯ މެޑަލް ހޯދި ރާއްޖޭގެ ޓީޓީ ޓީމުގެ އުމުރަކީ ނިސްަތުން ބަލާއިރު 19.75 އެވެ. މި ޓީމުގައި ތަޖުރިބާކާރު ނަމަކަށް ހުރީ ފާތިމަތު ޖުމާނާ ނިމާލެވެ.

ދެން ތިބި ތިން ކުޅުންތެރިން ކަމަށްވާ އައިޝަތު ރަފާ ނާޒިމް، ފާތިމާތު ދީމާ އަލީ އަދި މަލާކު މުއިއްޒު އަކީ ޒުވާން، ކުރިމަގު އޮތް ތިން ކުޅުންތެރިންނެވެ. ރާއްޖޭގެ ޓީމަށް ވުރެ އުމުރުގެ ގޮތުން ދޮށީ ކުޅުންތެރިން ހިމެނޭ ޓީމުތަކާ ދެކޮޅަށް ކުޅެ ލޯ މެޑަލް ހޯދުމަކީ ރާއްޖޭގެ ޓީޓީގެ ކުރިމަގަށް މުހިންމު ކާމިޔާބެއްގެ ގޮތުގައި ރާއްޖޭގެ ކޯޗެއްގެ ގޮތުގައި މަސައްކަތް ކުރެއްވި ޓީޓީއޭއެމްގެ ނައިބު ރައީސް އިބްރާހިމް ޝިއުރީ ދެކިލައްވަ އެވެ.

އޭނާ ވިދާޅުވި ގޮތުގައި މިހާރު އޮތް އަންހެން ޓީމުން ހާސިލު ކުރަމުން މިދަނީ މީގެ ކުރިން ރާއްޖޭގެ ޓީޓީގައި ހާސިލު ވެފައި ނެތް ކަންތައްތަކެވެ.

"މީގެ ކުރިން ނުވާ ކަންތައްތަކެއް މި ކުޅުންތެރިން މިހާ ޅަ އުމުރުގައި މި ލިބެނީ. މިއީ ވަރަށް ބޮޑު އެކްސްޕީރިއަންސެއް،" ކުރީގެ އެއްވަނަ ފިރިހެން ކުޅުންތެރިޔާ ވިދާޅުވި އެވެ.

އޭނާ ވިދާޅުވީ މި ކާމިޔާބު ލިބުމުގައި ކުޅުންތެރިން އަމިއްލަ އަށް ކުރި މަސައްކަތް ވެސް މުހިންމު ދައުރެއް އަދާ ކުރެ އެވެ. ކުޅުންތެރިންގެ ޅަ އުމުރުގައި ބެލެނިވެރިން އަމިއްލަ އަށް ވެސް ބޭރުގެ ޓްރެއިނިންތަކަށް ފޮނުވައިގެން ކުރަމުން ގެންދާ މަސައްކަތް ވެސް ޝިއުރީ ފާހަގަ ކުރި އެވެ. ޓީޓީ އެސޯސިއޭޝަންގެ މެނޭޖުމެންޓާ ޔޫތު ސްޕޯޓްސް މިނިސްޓްރީގެ ހިއްސާ ވެސް އަންހެން ޓީމުގެ މި ކާމިޔާބުގެ ފަހަތުގައި ހިމެނޭނެ ކަމަށް ޝިއުރީ ވިދާޅުވި އެވެ.

"މައުންޓަންގެ ޕީކު މި ފެންނަނީ މެޑަލްގެ ސިފައިގައި އެކަމަކު އެގެ ތިރީގައި މިއޮތީ ބުރަ މަސައްކަތާއި ގުރުބާނީ. ކާމިޔާބު މި ލިބެނީ އެއް ދުވަހު ދެ ދުވަހުގެ މަސައްކަތަކުން ނޫން. ހަމަ ހުރެފަ ބަހައްޓާފަ އެއް ނޫން. ވަރަށް ގިނަ ދުވަހުގެ މަސައްކަތުން،" ޝީއުރީ ވިދާޅުވި އެވެ.

އިއްޔެ ސެމީ ފައިނަލުގައި އިރާން އަތުން ރާއްޖެ ބަލިވީ ސީދާ ތިން ގޭމުންނެވެ. އެ މެޗުގެ ސިންގަލްސްގެ ދެވަނަ ގާމްގައި އަިއޝަތު ރަފާ ނާޒިމު ވަނީ ނެދާ ޝަހްޝަވާރީ އާ ދެކޮޅަށް 2-2 ން ގޭމް އެއްވަރު ވެސް ކޮށްފަ އެވެ. ލަންޑަންގައި 2012 ގައި ބޭއްވި އޮލިމްޕިކް ގޭމްސް އަށް ކޮލިފައިވި ނެދާ ވަނީ ޑިސައިން ސެޓް ކާމިޔާބުކޮށް 32 ސެޓުން އެ މެޗު ހޯދާފަ އެވެ.

ފުރަތަމަ ސިންގަލްސް މެޗުގައި އިރާންގެ މަހްޝިދު އަޝްތަރީ އާ ދެކޮޅަށް ދީމާ ބަލިވީ ތިން ސެޓުންނެވެ. ޝިއުރީ ވިދާޅުވީޑިފެންސިވް ފަޅި ރަބަރުގައި ކުޅެން ޖެހުމުން ދީމާ އަށް ކުޅެން އުނދަގޫވި ކަމަށެވެ. އޭނާ ވިދާޅުވި ގޮތުގައި އެފަޅިން ދީމާ ކުޅެން ޖެހުމުން އިރާންގެ ކުޅުންތެރިޔާ އަށް ވީ ބޮޑު އެޑްވާންޓޭޖަކަަށެވެ.

"ރަބަރުގެ އެފަޅިން ކޫޅޭކަށް ވަރަށް ދިވެހި ކުޅުންތެރިންނަށް ވަރަށް ނުލިބޭ. އެ ފަޅިން ކުޅެން އެންމެ ފަރިތަ ކުޅުންތެރިޔަކަށް ދިވެހި ޓީމުގައި ހުރީ ވެސް ޖުމާނާ. ނަސީބު ދިމާ ކުރި ގޮތުން ރަފާ އަށް ޖެހުނީ އެ ފަޅި އިރާންގެ ކުޅުންތެރިޔާ އަށް އެޑްވާންޓޭޖަކަށް އެކަންވީ،" ޝިއުރީ ވިދާޅުވި އެވެ.

ޓީމު އިވެންޓްގެ ޗެމްޕިއަންކަން ހޯދީ ވެސް އިރާން އެވެ. އެ ޓީމުން ކާމިޔާބު ހޯދީ ފައިނަލުގައި ތުރުކީ ބަލި ކުރުމަށް ފަހު އެވެ. ބްރޯންޒް މެޑަލް އާއެކު ރާއްޖެ އަށް ލިބުނީ ތާރީހީ ކާމިޔާބެއް ކަމަށް ޝިއުރީ ވިދާޅުވި އެވެ.

"ބްރޯންޒް މެޑަލް އަކާއެކު ތާރީހުގެ ތެރެއަށް ވަދެގެން މިދިޔައީ އެކަމަށްޓަކައި ހަމަ ﷲ އަށް ހަމްދު ކުރަން،" އޭނާ ވިދާޅުވި އެވެ.