އޭޝިއާގެ ޓީޓީ ޔޫނިއަންގެ ކައުންސިލަށް ޓީޓީއޭއެމްގެ ރައީސް އަލީ ރަޝީދު

އޭޝިއަން ޓޭބަލް ޓެނިސް ޔޫނިއަން (އޭޓީޓީޔޫ) ކައުންސިލަށް ރާއްޖޭގެ ޓީޓީ އެސޯސިއޭޝަން (ޓީޓީއޭއެމް) ގެ ރައީސް އަލީ ރަޝީދު (އައްޔަ) އިންތިހާބުކޮށްފި އެވެ.

ކަޒަކިސްތާނުގެ އާސްތާނާގައި ކުރިއަށްދިޔަ ކޮންގްރެސްގައި، އޭޓީޓީޔޫގެ ކައުންސިލަށް އަލީ އިންތިހާބުވީ ދެކުނު އޭޝިއާ ސަރަހައްދުންނެވެ. ދެކުނު އޭޝިއާ ސަރަހައްދުގެ ކައުންސިލް ދެ މެންބަރުން ތިއްބަވަ އެވެ. ދެން އިންތިހާބުވީ އިންޑިއާގެ މަންދޫބެކެވެ.

ދެކުނު އޭޝިއާ ސަރަހައްދުން އޭޓީޓީޔޫގެ ނައިބު ރައީސްކަން ކުރައްވަނީ ނޭޕާލްގެ ޝަންކަރު ގައުތަމް އެވެ.

އޭޓީޓީޔޫގެ ރައީސްކަމަށް މިފަހަރު ވެސް އިންތިހާބު ކުރީ ގަތަރުގެ ޚަލީލް އަލް މޮހަންނާދީ އެވެ.

ރައީސްކަމަށް ދެ ވަނަ ދައުރަކަށް އިންތިހާބު ވުމަށް ފަހު ޚަލީލް އަލް މޮހަންނާދީ ވިދާޅުވީ ޓީޓީގެ ގުރާސްރޫޓް ވަރުގަދަ ކުރުމަށް އޭޓިޓީޔޫ އިން ޓީޓީ އެކަޑަމީއެއް އުފައްދަން ނިންމާފައިވާ ކަމަށެވެ. އެ އެކަޑަމީ ހިންގާނީ އޭނާގެ އަމިއްލަ ގައުމު، ގަތަރުގެ އެސްޕަޔާ ސްޕޯޓްސް އެކަޑަމީއާ ގުޅިގެން ކަމަށް ވެސް ވިދާޅުވި އެވެ.

އޭޓީޓީޔޫގެ ކޮންގްރެސްގައި ވަނީ އޭޝިއާގެ ކުރިއަށް ހުރި މުބާރާތްތައް ބާއްވާނެ ގައުމުތައް ކަނޑައަޅާފަ އެވެ. އުތުރު ކޮރެއާގައި ވެސް އޭޝިއާގެ މުބާރާތް ބޭއްވުމަށް އެ ޔޫނިއަންއިން ވަނީ ނިންމައިފަ އެވެ.