ފުރަތަމަ ފަހަރަށް ލަންކާ ބަލިކޮށް ގައުމީ އަންހެން ޓީޓީ ޓީމަށް ތާރީހީ މޮޅެއް

އަންހެން ޓީޓީގެ ޓީމު އިވެންޓުގައި ރާއްޖޭން ފުރަތަމަ ފަހަރަށް ލަންކާގެ މައްޗަށް ކާމިޔާބު ހޯދައިފި އެވެ.

ކަޒަކިސްތާނުގައި މިހާރު ކުރިއަށްދާ އޭޝިއަން ޗެމްޕިއަންޝިޕުގެ ގުރޫޕް ސްޓޭޖުގައި އިއްޔެ ލަންކާގެ މައްޗަށް ސީދާ ތިން ގޭމުން ހޯދި މޮޅަކީ، އަންހެން ޓީމު އިވެންޓުގައި ލަންކާގެ މައްޗަށް ރާއްޖޭން ހޯދި ފުރަތަމަ މޮޅެވެ.

ރާއްޖޭގެ ވަކިވަކި ކުޅުންތެރިން، އިންޑަވިޖުއަލް އިވެންޓްތަކުގައި ލަންކާގެ މައްޗަށް ކުރި ހޯދަ އެވެ. މެއި މަހު ނޭޕާލްގައި ބޭއްވި ދެކުނު އޭޝިއާގެ އޮލިމްޕިކް ކޮލިފައިން މުބާރާތުން ރާއްޖޭގެ ފާތިމާތު ދީމާ އަލީ އެ ގޭމްސް އަށް ކޮލިފައިވީ ފައިނަލުގައި ލަންކާގެ އެއްވަނަ ކުޅުންތެރިޔާ ބިމަންދީ ބަންޑަރާ ބަލި ކުރުމަށް ފަހު އެވެ.

އެކަމަކު ޓީމު އިވެންޓްތަކުގައި އަންހެން ޓީމަށް އޮންނަނީ އިއްޔެއާ ހަމައަށް ލަންކާގެ މައްޗަށް ކުރި ހޯދޭ ގޮތް ނުވެފަ އެވެ. ނޭޕާލްގައި ޑިސެމްބަރު 2019 ގައި ބޭއްވި ސައުތު އޭޝިއަން ގޭމްސްގެ ޓީޓީގެ އަންހެން ޓީމު އިވެންޓް ފައިނަލަށް ވެސް ރާއްޖެއަށް ނުދެވުނީ، ސެމީ ފައިނަލުގައި ލަންކާ އަތުން ބަލިވުމުންނެވެ.

ކަޒަކިސްތާނުގެ އަސްތާނާގައި ކުޅުނު މެޗުން ދިވެހި ޓީމު ކުރި ހޯދުން ވީ ތާރީހީ މޮޅަކަށެވެ. މެޗު ރާއްޖޭން ކާމިޔާބު ކުރީ ސީދާ ތިން ގޭމުންނެވެ.

މެޗުގެ ފުރަތަމަ ގޭމްގައި ރާއްޖޭގެ އާއިޝަތު ރަފާ ނާޒިމު ވަނީ ލަންކާގެ ކްލައްޕްވަވަދޫ ލަސަންޔާއާ ދެކޮޅަށް ކުޅުނު ގޭމް ސީދާ ތިން ސެޓުން މޮޅުވެފަ އެވެ. އެ ގޭމްގެ ސެޓްތައް ރަފާ ގެންދިޔައީ 12-10، 11-8، 11-8 ންނެވެ.

ދެވަނަ ގޭމްގައި ރާއްޖޭގެ ފާތިމަތު ދީމާ އަލީ ވަނީ ލަންކާގެ ހަލަވަތަގެ ޝަމަލަޝާއާ ދެކޮޅަށް ކުޅުނު ގޭމް ވެސް ސީދާ ތިން ސެޓުން ގެންގޮސްފަ އެވެ. އެ ގޭމް ދީމާ ކާމިޔާބު ކުރީ 11-9، 11-9 އަދި 11-4 ންނެވެ.

ހޯމަ ދުވަހު ކިރިގިސްތާނާ ދެކޮޅަށް ކުޅުނު މެޗުގައި ވެސް ރާއްޖެއަށް ލީޑް ނަގައިދިން މިޝްކާ މުހައްމަދު އިބްރާހިމް، އިއްޔެ ލަންކާއާ ދެކޮޅަށް ކުޅުނު މެޗުގެ ތިންވަނަ ގޭމަށް ނުކުމެ، މެޗު ރާއްޖެ އަށް ކާމިޔާބުކޮށް ދިނީ 3-1 ސެޓުންނެވެ. މިޝްކާ އެ ގޭމް ކާމިޔާބު ކުރީ 13-11، 11-7، 9-11 އަދި 11-2 ންނެވެ.

ރާއްޖޭން އިއްޔެ ކުޅުނު ދެވަނަ މެޗުގައި މޮންގޯލިއާ އަތުން ބަލިވީ ސީދާ ތިން ގޭމުންނެވެ.

ރާއްޖޭގެ ފިރިހެން ޓީމުން ވެސް ވަނީ ގުރޫޕް ސްޓޭޖުގައި ދެ މެޗުން މޮޅުވެފަ އެވެ. ޕާކިސްތާނާ ދެކޮޅަށް ފިރިހެން ޓީމު ކުރި ހޯދި މެޗަކީ، ޓީމު އިވެންޓްގައި ފިރިހެން ޓީމަށް ޕާކިސްތާނާ ދެކޮޅަށް ކުރި ހޯދުނު ފުރަތަމަ މެޗެވެ.

މެޗު ދިވެހި ޓީމުން ކާމިޔާބު ކުރީ 3-2 ގޭމުންނެވެ.

ފުރަތަމަ ގޭމްގައި ޕާކިސްތާނުގެ ތައިމޫރު ހާން އަތުން، ރާއްޖޭގެ އަޚްޔާރު އަހްމަދު ހާލިދު ބަލިވީ 3-2 ސެޓުންނެވެ. ތައިމޫރު ސެޓް ގެންދިޔައީ 11-8، 6-11، 7-11، 11-2 އަދި 11-7 ންނެވެ.

ރާއްޖެ އަށް އަނެއް ދެ ސެޓް ހޯދައިދީ، މޫސާ މުންސިފް އަހްމަދު ލީޑް ނަގައި ދިނެވެ. މެޗުން ރާއްޖެ މޮޅުކޮށްދިން ގޭމް ވެސް ކާމިޔާބު ކުރީ މުންސިފެވެ. ދެވަނަ ގޭމްގައި އޭނާއާ ދެކޮޅަށް ނުކުތީ ޕާކިސްތާނުގެ މުހައްމަދު ހާން އެވެ. މުންސިފް އެ ގޭމް ކާމިޔަބު ކުރީ 3-2 ގޭމުންނެވެ. އެއީ 12-11، 11-9، 11-5 10-12 އަސި 12-10 ންނެވެ.

އަނެއް ގޭމްގައި މުންސިފް ޝާހް ސައީދުއާ ދެކޮޅަށެވެ. އެ ގޭމް، 11-7، 8-11، 8-11، 11-4 އަދި 11-3 ން މުންސިފް ކާމިޔާބު ކުރީ 3-2 ސެޓުންނެވެ.

ދެން ވިދިގެން އައި ގެމުން ވެސް އަޚްޔާރު ބަލިވީ 3-1 ސެޓުންނެވެ. އޭނާއާ ދެކޮޅަށް ނުކުތީ މުހައްމަދު ހާން އެވެ.

އެ މެޗުން ރާއްޖެ މޮޅުކޮށްދިން ގޭމްގައި މުންސިފާ ދެކޮޅަށް ނުކުތީ ތައިމޫރް ހާން އެވެ. އެ ގޭމް މުންސިފް ކާމިޔާބު ކުރީ 3-1 ސެޓުންނެވެ. ފުރަތަމަ ސެޓުން މުންސިފް 12-10 ން ބަލިވި ނަމަވެސް އަނެއް ތިން ސެޓް 13-11، 11-7 އަދި 11-9 ކާމިޔާބު ކުރި އެވެ.

ފިރިހެން ޓީމުން ވަނީ އޮމާންއާ ދެކޮޅަށް ކުޅުނު މެޗުން މޮޅުވެފަ އެވެ. އެ މެޗު ކާމިޔާބު ކުރީ ސީދާ ތިން ގޭމުންނެވެ.

ތިން ގޭމުން މޮޅުވީ ރާއްޖޭގެ ޓީމުގައި ހިމެނުނު ތިން ކުޅުންތެރިންގެ މަސައްކަތުންނެވެ. މުހައްމަދު ޝައްފާން އިސްމާއީލާއި މުންސިފް އަދި އަޚްޔާރު ވެސް ވަނީ ތިން ގޭމް ވެސް ކާމިޔާބުކޮށް ރާއްޖެ މޮޅުކޮށްދީފަ އެވެ.

ގުރޫޕް ސްޓޭޖުގައި ރާއްޖޭގެ އަންހެން އަދި ފިރިހެން ޓީމު ވެސް މޮޅުވީ ދެ މެޗުންނެވެ. އަނެއް ދެ މެޗުން ބަލިވުމުން، މުބާރާތުގެ އަނެއް ސްޓޭޖަށް ރާއްޖެއަކަށް ނުދެވުނެވެ.