ހުރިހާ ރަށެއްގެ މަގު ހެދުމުގެ މަސައްކަތް އަންނަ އަހަރު ކުރިއަށް ދާނެ: ރައީސް

ރާއްޖޭގެ ގިނަ ރަށްރަށުގެ މަގުތައް ޒަމާނީ ފެންވަރަށް ހެދުމުގެ މަޝްރޫއު އަންނަ އަހަރުގެ ތެރޭގައި ސަރުކާރުން ކުރިއަށް ގެންދާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

އެ މަނިކުފާނު އެހެން ވިދާޅުވީ، ނ. އަތޮޅަށް މިއަދު ހެނދުނު ފެއްޓެވި ދަތުރުފުޅުގައި އެ އަތޮޅު މާފަރު ރައްޔިތުންނާ ވާހަކަފުޅު ދައްކަވަމުންނެވެ.

ރައީސް ފާހަގަކުރެއްވި ގޮތުގައި، އުމްރާނީ ބޮޑެތި މަޝްރޫއުތަކުގެ ގޮތުގައި ރާއްޖޭގެ ހުރިހާ ރަށެއްގެ މަގުތައް ޒަމާނީ ފެންވަރަށް ހެދުމަކީ އެ މަނިކުފާނުގެ ވައުދުފުޅެކެވެ. އެހެންވެ، އެހެންވެ، ޕްލޭންތަކަށް ފަހު އޭގެ އަމަލީ މަސައްކަތް އަންނަ އަހަރު ކުރިއަށް ދާނެ ކަމަށް ވިދާޅުވި އެވެ.

އޭގެ ތެރޭގައި މާފަރުގެ މަގުތައް ހަދަން ފެށުން މި އަހަރަށް ޕްލޭން ކޮށްފައިވާ ކަމަށާއި އެ ރަށުގެ ތަރައްގީ އަށް ސަރުކާރުން އެންމެ އިސްކަންދޭ އެއް ދާއިރާއަކީ ސިއްހީ ދާއިރާ ކަމަށް ރައީސް ވިދާޅުވި އެވެ. ރައްޔިތުން ބޭނުންވާ މިންވަރަށް ޒަމާނީ ފެންވަރުގެ ސިއްހީ މަރުކަޒެއް ގާއިމް ކޮށްދެއްވާނެ ކަމުގެ ޔަގީންކަން ވެސް އެ މަނިކުފާނު ދެއްވި އެވެ.

ކައުންސިލާއި އެ ރަށު ސްކޫލުން އެދުނު ގޮތަށް ހަތަރު ކްލާސް ރޫމް އަޅައި ފުޓްސަލް ދަނޑު ހެދުމުގައި ލަސްވެފައިވާ ލަސްވުމަށް ހައްލު ގެނެސް، އެ މަޝްރޫއު ހިމެނޭހެން ކުޅިވަރުގެ ގިނަ ވަސީލަތްތައް ތަރައްގީ ކޮށްދެއްވާނެ ކަމަށް ވެސް ރައީސް ވިދާޅުވި އެވެ.