ހައި ކޯޓުގެ ފަނޑިޔާރުންގެ ބެންޗުން ހުސްވި ދެ މަގާމަށް 17 ބޭފުޅަކު ކުރިމަތިލައްވައިފި

ހައި ކޯޓުގެ ފަނޑިޔާރުންގެ ބެންޗުން ހުސްވެފައިވާ ދެ މަގާމަށް 17 ބޭފުޅަކު ކުރިމަތިލައްވައިފި އެވެ.

ހައި ކޯޓުގެ ފަނޑިޔާރުންގެ ބެންޗުން ދެ މަގާމެއް ހުސްވީ އެ ކޯޓުގެ އިސް ފަނޑިޔާރު ހުސައިން ޝަހީދާއި ފަނޑިޔާރު މުހައްމަދު ސަލީމް ސުޕްރީމް ކޯޓުގެ ފަނޑިޔާރު ކަމަށް އައްޔަން ކުރެއްވުމުންނެވެ. ހައި ކޯޓުން ހުސްވި ދެ މަގާމަށް ކުރިމަތިލުމުގެ މުއްދަތު އިއްޔެ ވަނީ ހަމަވެފަ އެވެ.

ހުސްވި ދެ މަގާމަށް ކުރިމަތިލެއްވި ބޭފުޅުންގެ ތެރޭގައި މިހާރުގެ ފަނޑިޔާރުންނާއި ކުރީގެ ބައެއް ފަނޑިޔާރުންނާއި ޖުޑީޝަލް ސާވިސް ކޮމިޝަން (ޖޭއެސްސީ) ގެ މިހާރު މެމްބަރު އަލީ އަބްދުއްލަތީފާއި ބައެއް ވަކީލުން ވެސް ހިމެނިވަޑައިގަންނަވަ އެވެ.

މިހާރުގެ ފަނޑިޔާރުންގެ ތެރެއިން ޑްރަގް ކޯޓުގެ ގާޒީ އާދަމް އާރިފާއި ސިވިލް ކޯޓުގެ ގާޒީ ހާފިޒާ އަބްދުއްސައްތާރާއި އެ ކޯޓުގެ ގާޒީ ހަސަން ފަހީމް ކުރިމަތިލެއްވިއިރު، ކުރީގެ ފަނޑިޔާރުންގެ ތެރެއިން ހައި ކޯޓުގެ ކުރީގެ އިސްފަނޑިޔާރު ޝުޖާއު އުސްމާނާއި ކުރީގެ މެޖިސްޓްރޭޓް މުހައްމަދު ރާޣިބާއި ކްރިމިނަލް ކޯޓުގެ ކުރީގެ ގާޒީ އިބްރާހިމް އަލީ އާއި ސިވިލް ކޯޓުގެ ކުރީގެ ގާޒީ އަބްދުﷲ ޖަމީލް މޫސާ ވެސް ކުރިމަތިލެއްވި އެވެ.

މީގެ އިތުރުން ހޯމް މިިނިސްޓްރީގެ ޑެޕިއުޓީ މިނިސްޓަރު މުހައްމަދު ޝަހީދު ވެސް އެ މަގާމަށް ކުރިމަތިލެއްވި އެވެ.

ހައި ކޯޓުގެ ދެ ފަނޑިޔާރަކު ސުޕްރީމް ކޯޓުގެ ބެންޗަށް އައްޔަން ކުރެއްވީ އެ ކޯޓުގެ ފަނޑިޔާރުންގެ ގޮތުގައި ތިއްބެވި ޑރ. އަޒްމިރަލްދާ ޒާހިރާއި ފަނޑިޔާރު މަހާޒް އަލީ ޒާހިރުގެ މައްޗަށް ސުލޫކީ މައްސަލައެއް ސާބިތުވާ ކަމަށް ނިންމައި، އެ ބޭފުޅުން މަގާމުން ވަކިކުރުމުންނާއި އަދި އެ ކޯޓުގެ ފަނޑިޔާރު ހުސްނުއްސުއޫދު އިސްތިއުފާ ދެއްވުމުންނެވެ.