ޝަރީއަތެއް ލަސްވުމުން، ހައި ކޯޓުގެ ފަނޑިޔާރު ދީބާނާޒުގެ މައްސަލައެއް ބަލަނީ

ހައި ކޯޓުގެ ފަނޑިޔާރު ދީބާނާޒް ފަހުމީގެ ސުލޫކީ މައްސަލައެއް ޖުޑީޝަލް ސާވިސް ކޮމިޝަން (ޖޭއެސްސީ) އިން ބަލަން ފަށައިފި އެވެ.

"މިހާރު" އަށް އެނގިފައިވާ ގޮތުގައި ހައި ކޯޓުގެ ފަނޑިޔާރު ދީބާނާޒްއާ ގުޅޭ ގޮތުން ޖޭއެސްސީއަށް ހުށަހެޅި ޝަކުވާއަކާ ގުޅިގެން އެ މައްސަލަ ބަލަން އެ ކޮމިޝަނުން ވަނީ ނިންމައިފަ އެވެ.

އެއީ ޝަރީއަތެއް ނުހިންގައި، ލަސްކޮށްފައިވާ ކަމަށް ބުނެ ހުށަހަޅާފައިވާ ޝަކުވާއެއް ކަމަށް މައުލޫމާތު ލިބެ އެވެ. ނަމަވެސް، އެއީ ކޮން މައްސަލައެއްގެ ޝަރީއަތެއް ކަމެއް ސާފެއް ނުވެ އެވެ.

ފަނޑިޔާރުންނާ ގުޅޭގޮތުން ބަލާ މައްސަލަތަކުގެ ތަފްސީލް ޖޭއެސްސީން ހާމައެއް ނުކުރެ އެވެ. އެހެންވެ، މިކަމާ ގުޅޭގޮތުން ކޮމިޝަނެއްގެ ބަހެއް ނުލިބެ އެވެ.

ހައި ކޯޓުގެ ފަނޑިޔާރު ކަމަށް ދީބާނާޒް އައްޔަންކުރީ 2022 ވަނަ އަހަރުގެ ތެރޭގަ އެވެ. ހައި ކޯޓުގެ ފަނޑިޔާރުކަމުގެ މަގާމަށް އައްޔަން ކުރެއްވިއިރު އޭނާ ހުންނެވީ ކްރިމިނަލް ކޯޓުގެ ގާޒީއެއްގެ ގޮތުގަ އެވެ.

ފަނޑިޔާރު ދީބާނާޒަކީ ކްރިމިނަލް ކޯޓަށް އެންމެ ފުރަތަމަ އައްޔަންކުރި އަންހެން ގާޒީ އެވެ. އެ ކޯޓުގެ ފަނޑިޔާރުކަމުގެ މަގާމަށް ދީބާނާޒް ފަހުމީ އައްޔަން ކުރީ 2020 ވަނަ އަހަރުގެ ތެރޭގަ އެވެ.