ހައި ކޯޓުގެ އިސް ފަނޑިޔާރުކަމަށް ފުރުސަތު ހުޅުވާލައިފި

ހައި ކޯޓުގެ އިސް ފަނޑިޔާރުކަމަށް ކުރިމަތިލުމުގެ ފުރުސަތު ޖޭއެސްސީން މިއަދު ހުޅުވާލައިފި އެވެ.

އެ ކޯޓުގެ އިސް ފަނޑިޔާރުގެ މަގާމު ހުސްވީ މިހާތަނަށް އެ މަގާމުގައި ހުންނެވި ހުސައިން ޝަހީދު ސުޕްރީމް ކޯޓުގެ ފަނޑިޔާރުކަމަށް އިއްޔެ އައްޔަން ކުރުމުންނެވެ. އެހެންވެ، ހައި ކޯޓު ހިންގުން ވަގުތީ ގޮތުން މިއަދުން ފެށިގެން ހަވާލުކޮށްފައި ވަނީ ފަނޑިޔާރު މުހައްމަދު ފައިސަލްއާ އެވެ.

ޖޭއެސްސީން މިއަދު ވަނީ ފަނޑިޔާރު ޝަހީދުގެ ބަދަލުގައި ފަނޑިޔާރަކު ހޯދަން ވެސް އިއުލާން ކޮށްފަ އެވެ.

ހައި ކޯޓަށް އިސް ފަނޑިޔާރު ހޮވަނީ، އެ ކޯޓުގައި ތިއްބަވާ ފަނޑިޔާރުންގެ ތެރެއިންނެވެ.

އިސް ފަނޑިޔާރުގެ މަގާމަށް ކުރިމަތިލުމުގެ ފުރުސަތު ޖޭއެސްސީން ހުޅުވައިލީ މި މަހުގެ 29 ވަނަ ދުވަހުގެ މެންދުރު 12 އާ ހަމައަށެވެ.

ހައި ކޯޓުގެ އިސް ފަނޑިޔާރުގެ އަސާސީ މުސާރައަކީ މަހަކު 47،000ރ. އެވެ. އޭގެ އިތުރުން ލިވިން އެލަވަންސަށް މަހަކު 18،000ރ. އަދި ރިސްކު އެލަވަންސްގެ ގޮތުގައި މަހަކު 3،300ރ. ލިބިވަޑައިގަންނަވާނެ އެވެ. މުސާރަ އާއި ފައިސާގެ އިނާޔަތުގެ އިތުރުން ރައްޔިތުންގެ މަޖިލިހުން ކަނޑައަޅާފައިވާ ގޮތުގެ މަތިން ހެލްތު އިންޝުއަރެންސާއި ފޯނު އެލަވަންސް ދޭނެ އެވެ.

ހައި ކޯޓުގެ ފަނޑިޔާރުގެ މަގާމަށް ހުށަހެޅުމުގެ ސުންގަޑިއަކީ އަންނަ އޭޕްރީލް 10 ގެ ހެނދުނު 10 ގެ ކުރި އެވެ.

ހައި ކޯޓުގެ ފަނޑިޔާރުންގެ ޝަރުތުތަކުގެ ތެރޭގައި ހިމެނެނީ އުމުރުން 25 އަހަރު ވުމާއި އިސްލާމީ ޝަރީއާ ނުވަތަ ގާނޫނު ނުވަތަ ގާނޫނާއި އިސްލާމީ ޝަރީއާ އިން ފުރަތަމަ ޑިގްރީ ހާސިލް ކޮށްފައި ވުމާއި ފަނޑިޔާރުކަމުގައި ނުވަތަ ގާނޫނީ ވަކީލެއްގެ ގޮތުގައި މަދުވެގެން ފަސް އަހަރުގެ ތަޖުރިބާ ހުރުމެވެ. މީގެ އިތުރުން ވެސް ޝަރުތުތައް ހިމަނާފައި ވެ އެވެ.

ހައި ކޯޓުގެ ފަނޑިޔާރެއްގެ އަސާސީ މުސާރައަކީ މަހަކު 45،700ރ. އެވެ. އޭގެ އިތުރުން ލިވިން އެލަވަންސަށް މަހަކު 18،000ރ. އާއި ރިސްކު އެލަވަންސަށް މަހަކު 3،3000ރ. ލިބިވަޑައިގަންނަވާނެ އެވެ. ދެން ލިބިވަޑައިގަންނަވާނީ ރައްޔިތުންގެ މަޖިލިހުން ކަނޑައަޅާ ގޮތެއްގެ މަތިން ހެލްތު އިންޝުއަރެންސާއި ފޯނު އެލަވަންސެވެ.

ހައި ކޯޓުގައި މިހާރު 10 ފަނޑިޔާރުން ތިއްބަވަ އެވެ.