ޓްރަމްޕަށް ސުލްހައިގެ އިނާމު ދޭން ޕާކިސްތާނުން ހުށަހެޅުމުން ފާޑުކިޔުން

އެމެރިކާގެ ރައީސް ޑޮނަލްޑް ޓްރަމްޕަށް ނޮބެލް ސުލްހައިގެ އިނާމު ދޭން ޕާކިސްތާނުން ހުށަހަޅާނެ ކަމަށް އިއުލާން ކުރުމުން އެ ގައުމުގެ ސަރުކާރާއި އަސްކަރިއްޔާއަށް ބޮޑެތި ފާޑުކިޔުންތައް އަމާޒުވެއްޖެ އެވެ.

އިންޑިއާ އާއި ޕާކިސްތާނާ ދެމެދު މިދިޔަ މަހު ފަހުކޮޅު ބަދަލުކުރި ހަމަލާތައް ހުއްޓުވުމުގައި ޓްރަމްޕް އަދާކުރެއްވި ދައުރު ފާހަގަކޮށް އޭނާގެ ނަން ނޮބެލް އިނާމަށް، ޕާކިސްތާނުން ނޮމިނޭޓް ކުރާނެ ކަމަށް އެ ގައުމުންގެ ސަރުކާރުން އިއުލާން ކުރީ އިއްޔެ އެވެ.

މިއަދު އެމެރިކާއިން ވަނީ ޕާކިސްތާނުގެ އަވައްޓެރި އިރާނުގެ ނިއުކްލިއާ ތިން މަރުކަޒަކަށް ހަމަލާ ދީ މަސްރަހު އިތުރަށް ގޯސް ކުރުވާފަ އެވެ.

ޕާކިސްތާނުގެ އަސްކަރިއްޔާގެ ވެރިޔާ އާސިމް މުނީރު ވަނީ އެމެރިކާ އަށް ވަޑައިގެން މިދިޔަ ބުރާސްފަތި ދުވަހު ވައިޓް ހައުސްގައި ޓްރަމްޕާ ބައްދަލު ކުރައްވާފަ އެވެ.

ހުކުރު ދުވަހު ޕާކިސްތާނުގެ ބޮޑުވަޒީރު ޝެހެބާޒް ޝަރީފް ވަނީ އެމެރިކާގެ ދިފާއީ ވަޒީރު މާކޯ ރޫބިޔޯއާ އެކު ފޯނު މެދުވެރިކޮށް މަޝްވަރާތަކެއް ކުރިއަށްގެންދަވާފަ އެވެ. ޕާކިސްތާނުގެ ބޮޑުވަޒީރުގެ އޮފީހުން ބުނީ ޓްރަމްޕާއި އާސިމް މުނީރުގެ މަޝްވަރާތަކާ މެދު ހިތްހަމަޖެހިވަޑައިގަންނަވާކަން ރޫބިޔޯ އަރިހުގައި ޝެހެބާޒް ވިދާޅުވި ކަމަށެވެ.

އާސިމް މުނީރަކީ، އަސްކަރީ އެންމެ އިސްވެރިޔާގެ މަގާމުގައި ހުންނަވައި އެމެރިކާގެ ރައީސަކާ ބައްދަލު ކުރެއްވި ޕާކިސްތާނުގެ ފުރަތަމަ ޖެނަރަލެވެ. އެ "ހާއްސަ ޝަރަފު" ޓްރަމްޕް ވަނީ ބުރާސްފަތި ދުވަހު އޭނާ އަށް ދެއްވާފަ އެވެ.

ޕާކިސްތާނުގެ ވެރިކަމުގެ ނިންމުންތަކުގައި އެ ގައުމުގެ އަސްކަރިއްޔާގެ ނުފޫޒު އޮންނަ ކަމަށް އަސްކަރިއްޔާ އަށް އަބަދުވެސް ތުހުމަތު އަމާޒު ވެ އެވެ. އާސިމް މުނީރު އެނބުރި ޕާކިސްތާނަށް ވަޑައިގަތް ފަހުން އެ ގައުމުގެ ސަރުކާރުން ނެރުނު ބަޔާނުގައި ބުނީ ނޮބެލް އިނާމު ކޮމިޓީ އަށް ޓްރަމްޕްގެ ނަން ޕާކިސްތާނުގެ ސަރުކާރުން ނޮމިނޭޓް ކުރާނެ ކަމަށެވެ.

ޕާކިސްތާނުގެ ނިންމުމަށް އެ ގައުމުގެ ގިނަ ބަޔަކު ދަނީ ފާޑުކިޔަމުންނެވެ. ނޮބެލް ޕީސް އެވޯޑަށް ނަން ހުށަހެޅުމުގެ ފުރުސަތު ސަރުކާރަކަށް ވެސް އަމިއްލަ ފަރުދަކަށް ވެސް އަދި ވަކިން ހިންގާ ޖަމާއަތަކަށް ވެސް އޮވެ އެވެ.

އެ ނޮމިނޭޝަންތައް ހުށަހަޅަން ޖެހޭނީ ނޯވޭގައި ހިންގާ ނޮބެލް އެވޯޑް ކޮމިޓީއަށެވެ.

ނޮބެލް އިނާމަކީ ދުނިޔޭގައި ދޭ އެންމެ ޝަރަފުވެރި އެއް އެވޯޑެވެ.