އިރާނުގެ އިސް ލީޑަރު ހާމަނާއީ އަވަހާރަ ކޮށްލަން އިޒްރޭލުން ރޭވި!

އިރާނުގެ އެންމެ އިސް ލީޑަރު އާޔަތުﷲ އަލީ ހާމަނާއީ އަވަހާރަ ކޮށްލަން އިޒްރޭލުން ރޭވި ކަމަށް ރިޕޯޓްތައް ބުނެފި އެވެ.

އެމެރިކާ އާއި އިޒްރޭލްގެ މަސްދަރުތަކާ ހަވާލާދީ، ރޮއިޓަސް އިން ބުނީ ހާމަނާއީ އަވަހާރަ ކޮށްލުމުގެ އަސްކަރީ ޕްލޭން އިޒްރޭލުން ކުރިއަށް ނުގެންދިޔައީ އެމެރިކާގެ ރައީސް ޑޮނަލްޑް ޓްރަމްޕް އެކަމާ ދެކޮޅު ހެއްދެވުމުން ކަމަށެވެ.

އިޒްރޭލްގެ އެތެރޭގެ ރިޕޯޓްތައް ބުނާގޮތުގައި ހާމަނާއީ އަވަހާރަ ކޮށްލަށް އިޒްރޭލަށް ފުރުސަތު ލިބުނެވެ. އެކަމަކު، އެކަން ނުކުރަން ޓްރަމްޕް އިޒްރޭލްގެ އޮފިޝަލުންނަށް ވިސްނަވައި ދެއްވި ކަމަށް ރޮއިޓަސް އިން ބުންޏެވެ.

"މި ހަމަލާތަކުގައި އެމެރިކާގެ މީހަކު އިރާނުން މަރާލިތަ؟ ނޫން. އިރާނުން އެ ކަހަލަ ކަމެއް ނުކުރާހާ ހިނދަކު އެ މީހުންގެ ސިޔާސީ ލީޑަޝިޕާ ދިމާކުރަން ޖެހޭ ކަމަކަށް އަހަރެމެން ނުދެކެން،" އެމެރިކާގެ ސަރުކާރުގެ އޮފިޝަލަކާ ހަވާލާދީ ރޮއިޓަސްއިން ބުންޏެވެ.

އިރާނުގެ ރައީސްކަން ވެސް ކުރިން ކުރެއްވި އުމުރުން 86 އަހަރުގެ ހާމަނާއީ އަވާހަރަކޮށްލަން ފުރުސަތު ލިބުނުތޯ އިޒްރޭލް ބޮޑުވަޒީރު ބަންޖަމިން ނަތަންޔާހޫއާ "ފޮކްސް ނިއުސް" އިން ސުވާލު ކުރުމުން އޭނާ ވަނީ އެކަމާ ބެހޭގޮތުން ވާހަކަ ދައްކަން ދެކޮޅު ހަދައިފަ އެވެ.

އޭނާ ބުނީ ބައެއް ދޮގު ވާހަކަތައް ވެސް ފެތުރިފައިވާ ކަމަށެވެ.

"ހިނާގަފއިވާ ނެތް ކަންތައްތަކުގެ ވާހަކަތައް ވެސް ފަތުރާފައި އެބަހުރި ދޮގުގެ ގޮތުގައި. ތިކަމާ ބެހޭގޮތުން ވާހަކަ ދައްކާކަށް އެކަމުގެ ތެރެއަށް ވަންނާކަށް އަހަރެން ބޭނުމެއް ނޫން،" ހާމަނާއީ އަވަހާރަ ކޮށްލަން ފުރުސަތު ލިބުނުތޯ ފޮކްސްގެ އިންޓަވިއުގައި ސުވާލު ކުރުމުން ނަތަންޔާހޫ ބުންޏެވެ.

"ނަމަވެސް ޔަގީންކަން އަރުވަން، އަހަރެމެން އަޅަންޖެހޭ ފިޔަވަޅުތައް އަޅާނަނަށް. އަހަރެމެން ކުރަންޖެހޭ ކަންކަން ކުރާނަން. އަހަރެން ގަބޫލުކުރާ ގޮތުގައި އެމެރިކާ އަށް ވިސްނޭނީ އެމެރިކާ އަށް އެންމެ މަސްލަހަތު ހުރި ގޮތަށް،" ނަތަންޔާހޫ ބުންޏެވެ.