ރާއްޖޭގައި ކުދިންނަށް ޖިންސީ ގޯނާކުރާ މީހުންގެ މައުލޫމާތު އިންޓަޕޮލްގެ ގައުމުތަކަށް އަންގަން ފަށައިފި

ރާއްޖޭގައި ކުޑަކުދިންނަށް ޖިންސީ ގޯނާކުރާ މީހުންގެ ތެރެއިން ތެރެއިން ހުކުމް ތަންފީޒުކޮށް ނިމިގެން މުޖުތަމައަށް ދޫކޮށްލާފައިވާ މީހުންގެ މައުލޫމާތު އިންޓަޕޯލްގެ ގައުމުތަކަށް ލިބޭ ގޮތަށް ގްރީން ނޯޓިސް ނެރެން ފަށައިފި އެވެ.

ފުލުހުން މިއަދު ނެރުނު ބަޔާނުގައި ބުނީ ކުޑަކުދިންނަށް ޖިންސީ ގޯނާކުރާ މީހުންނާމެދު ހާއްސަ އުސޫލުތަކަކަށް އަމަލުކުރުމުގެ ގާނޫނުގެ 57 ވަނަ މާއްދާގެ ދަށުން، ކުދިންނަށް ޖިންސީ ގޯނާކުރާ މީހުންގެ ދަފްތަރު ރާއްޖޭގައި އާންމުކޮށްފައިވާ ކަމަށެެވެ.

އޭގެ ތެރެއިން ހުކުމް ތަންފީޒުކޮށް ނިިމި، މުޖްތަމައުއަށް ދޫވެފައިވާ މީހުންގެ މައްޗަށް އިންޓަޕޮލް ގްރީން ނޯޓިސް ނެރެފައިވާ ކަމަށް ފުލުހުން ބުންޏެވެ. އޭގެ ތެރޭގައި ހިމެނެނީ ޖުމްލަ 43 މީހެކެވެ. އެއީ 25 ދިވެހިންނާއި 18 ބިދޭސީން ކަމަށް ފުލުހުން ބުންޏެވެ.

އިންޓަޕޮލް ގްރީން ނޯޓިސްއަކީ އާންމު ސަލާމަތަށް ނުރައްކާވެދާނެ ފަރާތްތަކާ ބެހޭގޮތުން އިންޓަޕޯލްގެ މެމްބަރު ގައުމުތަކަށް އިންޒާރު ދިނުމަށް ބޭނުންކުރާ ނިޒާމެކެވެ.

ފުލުހުން ބުނީ ކުދިންގެ ރައްކާތެރިކަން ކަށަވަރުކުރުމަށް އެފަދަ ކުށްކުށަށް އަރައިގަންނަ މީހުންގެ މައުލޫމާތު ކަމާ ގުޅޭ ފަރާތްތަކާ ހިއްސާކުރުމަކީ މުހިއްމު ކަމެއް ކަމަށެވެ. އަދި އެ މައުލޫމާތު ބައިނަލްއަގްވާމީ ފެންވަރުގައި ހިއްސާ ކުރުމުން އެފަދަ މީހުންގެ ހަރަކާތްތައް އެހެން ގައުމުތަކުން ވެސް ބަލައި ރައްކާތެރިކަމަށް އަޅަންޖެހޭ ފިޔަވަޅުތައް އަޅާނެ ކަމަށް ފުލުހުން ބުންޏެވެ.

ފުލުހުން ބުނީ އެފަދަ މީހުންނަށް ވަޒީފާ ދިނުމުގައި ރިއާޔަތްކުރަންޖެހޭ ހާއްސަ ކަންތައްތަކާ ގުޅޭ މައުލޫމާތު ވެސް އޭގެ ސަބަބުން އެހެން ގައުމުތަކަށް ލިބޭނެ ކަމަށެވެ.

ފުލުހުން ބުނި ގޮތުގައި ބިދޭސީ މަސައްކަތު މީހުންނަކީ ވަޒީފާ ހޯދުމަށް އެކި ގައުމުތަކަށް ބަދަލުވާ މީހުން ކަމަށް ވާއިރު، އެހެން ގައުމަކަށް ގޮސް ވަޒީފާއަށް އެދޭއިރު ގްރީން ނޯޓިސްއެއް ނެރެފައިވާ ނަމަ، ކުޑަކުދިންނާ ގުޅުން އޮންނަ ދާއިރާތަކުގެ ވަޒީފާ އެ މީހަކަށް ދިނުން ހުއްޓުވައި މޮނިޓާކުރަން ފުރުސަތު ލިބޭ ކަމަށެވެ.