ޖިންސީ ގޯނާގެ ތުހުމަތު އޮތް މީހަކު އަމިއްލަ ދަރިފުޅާއި އިތުރު ކުއްޖަކާ ބެހުނު މައްސަލައެއް ފެންމަތިވެއްޖެ

މީގެ 13 އަހަރު ކުރިން ކުޑަކުއްޖަކަށް ޖިންސީ ގޯނާކުރި މައްސަލައެއްގައި ހައްޔަރުކުރުމަށް ފަހު ދޫކޮށްލާފައި ހުރި މީހަކު އޭނާގެ އަމިއްލަ ދަރިފުޅާއި އިތުރު އެހެން ކުއްޖަކާ ބެހުނު މައްސަލައެއް ފެންމަތިވެއްޖެ އެވެ.

ރާއްޖޭގެ ދެކުނުގެ ރަށެއްގެ މި ފިރިހެން މީހާއަށް މިފަހަރު ތުހުމަތުކުރަނީ ގްރޭޑް 2 ގައި ކިޔަވާ އޭނާގެ އަންހެން ދަރިފުޅާއި އެ ރަށުގެ އެހެން އަންހެން ކުއްޖަކަށް ޖިންސީ ގޯނާކުރި ކަމަށެވެ. ތަކުރާރުކޮށް އޭނާގެ ފަރާތުން ޖިންސީ ގޯނާ ލިބެމުން ދިޔަ ކަމަށާއި "އެއީ ބައްޕަ ލޯބިން ކުރާ ކަމެއް" ކަމަށް ވިސްނައިދީ ސިއްރުކުރަން ދަރިފުޅަށް ކިޔައިދީފައިވާ ކަމަށް މައުލޫމާތު އެނގޭ މީހަކު "މިހާރު" އަށް ބުންޏެވެ.

އެނގިފައިވާ ގޮތުގައި މި މައްސަލަ ފަޅާއެރުމުން، އެ ރަށުގައި މިވަގުތު ޖެންޑާ މިނިސްޓްރީގެ ޓީމެއް ވެސް އަންނަނީ ހަރަކާތްތެރިވަމުންނެވެ. އަދި އެ ކުދިންގެ ޓެސްޓްތަކެއް ހަދާފައިވާ ކަމަށް ވެ އެވެ.

އެކަމަކު މި މައްސަލާގައި ޖެންޑާ މިނިސްޓްރީގެ ބަހެއް އަދި ނުލިބެ އެވެ.

އެ ރަށުން "މިހާރު" އަށް ވާހަކަ ދެއްކި މީހަކު ކިޔައިދިން ގޮތުގައި ޖިންސީ ގޯނާ ކުރި ކަމަށް ތުހުމަތުކުރެވޭ ފިރިހެން މީހާއަށް މީގެ ގާތްގަނޑަކަށް 13 އަހަރު ކުރިން ތުހުމަތު ކުރެވުނު މައްސަލާގައި ބަންދުގައި ބެހެއްޓުމަށް ފަހު އޭނާ އޭރު ދޫކޮށްލީ އެވެ. އޭނާގެ މައްޗަށް ދައުވާއެއް ނުކުރެ އެވެ.

އޭނާގެ މައްސަލަ އަމިއްލަ ދަރިފުޅުގެ ފަރާތުން ފެންމަތިވީ މީގެ ދެތިން ދުވަސްކުރިން ގެއަކަށް ކުޅެން ގޮސް އުޅެނިކޮށެވެ.

"މިކަމުގެ ޝައްކު ކުރެވުނު ހިސާބަކީ މި ކުއްޖާ، އެހެން މީހެއްގެ ގެއަކަށް ގޮސް އެގޭގެ ކުދިންނާ އެކު ކޮޓަރި ތެރޭގައި ކުޅެން އުޅުނީ. އެ ގޭގެ މީހާ އޮފީސް ނިންމާފައި އައިއިރު ކޮޓަރި ދޮރު ހުޅީ ތަޅުލާފައި. ޓަކި ޖެހުމުން ތިން ކުދިން އެއް ފަހަރާ ނިކުތީ. ދެން އޭނާ މި އެހީ އޭނާގެ ފިރިހެން ދަރި ކައިރީ ކީއްހޭ ކުރީ. ދެން ބުނި ކަމަށް ވަނީ އެ މީހުން ތިބީ ހަޒްބެންޑް ވައިފް ކުޅޭށޭ."

އެ ވާހަކަތަކާ މެދު ޝައްކު އުފެދިގެން އަންހެން މީހާ ވަނީ އެ ކުދިންނާ ވާހަކަ ދައްކައިފަ އެވެ. ފަޅާއެރީ އެ ހިސާބުން ކަމަށް ވެ އެވެ.

އެ ކުއްޖާ ލައްވައި ބައްޕަ "ކުރުވާ ހުރިހާ ކަމެއް" އަންހެން މީިހާއަށް ކިޔައިދިން ކަމަށް އެ ރަށުން ވާހަކަ ދެއްކި މީހާ ބުންޏެވެ. އެ ވާހަކަ އެއްވެސް މީހެއްގެ ގާތުގައި ނުބުނީ ބައްޕަ ޖަލަށް ގެންދާނެތީ ކަމަށް ވެސް އެ ކުއްޖާ ބުނި ކަމަށް ވެ އެވެ.

އެ ފިރިހެން މީހާ ދެން ޖިންސީ ގޯނާކޮށްފައިވާ ކަމަށް ތުހުމަތުވަނީ، މި މައްސަލަ ފަޅާއެރި އަންހެން މީހާގެ ގޭގައި ކުޅެން އުޅުނު އެހެން އަންހެން ކުއްޖަކަށެވެ. މި މައްސަލަ ފުލުހުންނާއި ޖެންޑާއަށް ހުށަހެޅީ އަންހެން މީހާ ކަމަށް ވެ އެވެ.

އެ ރަށުން ވާހަކަ ދެއްކި މީހުން ބުނި ގޮތުގައި ކުދިން ކިޔައިދިން ވާހަކަތަކަށް ބަލާއިރު، އެ މީހާއަކީ ދޫކޮށްލާފައި ބަހައްޓަން ހެޔޮވާ ވަރުގެ މީހެއް ނޫނެވެ.

"އޭނާގެ އަމިއްލަ ދަރިއާ ބެހިފައި ހުރި ކަމަށް އެ ކިޔަނީ ވަރަށް ބޮޑަށް. އަދި ލޯބިން ކުރާ ކަމެއް ކަމަށް ކިޔައިދީފައި އޮތީ،" އެކަކު ބުންޏެވެ.

މި ހުރިހާ ކަމެއް ހިނގިއިރު އެ ކުއްޖާގެ މަންމައަށް އެކަން ނޭނގޭތޯ އެހުމުން އެ މީހާ ބުނީ އެކަން އަދި ޔަގީން ނުވާ ކަމަށެވެ.

އެ މައްސަލަ ފެންމަތިވިޔަސް އެ މީހާ ހައްޔަރުނުކުރާތީ އާއި އޭނާގެ ފަރާތުން އެހެން ކުއްޖަކު ޖިންސީ ގޯނާގެ ޝިކާރައަކަށް ވެދާނެތީ ރަށުން ވާހަކަ ދެއްކި މީހާ ކަންބޮޑުވުން ފާޅުކުރި އެވެ.

މި މައްސަލާގައި، ކައުންސިލުން ބުނީ ކުދިންތަކަކަށް ޖިންސީ ގޯނާކުރި މައްސަލައެއްގެ ވާހަކަ ދެކެވުނަސް ސައްހަ މައުލޫމާތެއް ނޭނގޭ ކަމަށެވެ. އެހެންވެ، އިތުރު މައުލޫމާތެއް ނުދެ އެވެ.

ކުދިންގެ ރައްކާތެރިކަމަށް ރަށުގެ ނަން އާއްމު ނުކުރި ނަމަވެސް "މިހާރު"އަށް އެނގިފައިވާ ގޮތުގައި އެކަން ހިނގީ ކުޑަކުދިންނަށް ޖިންސީ ގޯނާކުރުމުގެ ގިނަ މައްސަލަތަކެއް މީގެ ކުރިން ވެސް ފެންމަތިވެ ތަހުގީގުތައް ހިންގި ރަށެއްގަ އެވެ.