ސިވިލް ސާވިސް ދުވަސް: ނާސިހް އެދިވަޑައިގަތީ ދެފުށް ފެންނަ ހިދުމަތްތަކެއް ދިނުމަށް

ސިވިލް ސާވިސްގެ ހުރިހާ ފަންތިތަކާއި ހުރިހާ ގިންތިތަކުގައި މަސައްކަތްކުރާ ސިވިލް ސާވަންޓުންގެ މުސާރަ ބޮޑުކުރުމަކީ ވަރަށް ބޮޑު އުންމީދެއް ކަމަށާއި އެއާ އެކު، ދެފުށް ފެންނަ ހިދުމަތްތަކެއް ދިނުމަށް ސިވިލް ސާވިސް ކޮމިޝަން (ސީއެސްސީ) ގެ ރައީސް މުހައްމަދު ނާސިހް މިއަދު ސިވިލް ސާވަންޓުންނަށް ގޮވާލައްވައިފި އެވެ.

މިއަދު ފާހަގަކުރާ ދިވެހި ސިވިލް ސާވިސް ދުވަހުގެ މުނާސަބަތުގައި ދެއްވި ހިތާބެއްގައި އޭނާ ވިދާޅުވީ، މުސާރައިގެ ހަމަހަމަކަމާއި ކުރިއެރުން ލިބުމަކީ ސިވިލް ސާވަންޓުން ހިތްހަމަޖެހިގެން ތިބެ އުފެއްދުންތެރި މަސައްކަތެއް ކުރުމަށް އެޅޭ ބާރަކަށް ވާނެ ކަމަށެވެ. ހާއްސަކޮށް ސިވިލް ސާވިސް އަށް ގާބިލް މީހުން ހޯދުމުގައި ދިމާވާ ދަތިތަކަށް ހައްލެއް ލިބޭނެ ކަަމަށް ނާސިހް ވިދާޅުވި އެވެ.

ބައިނަލްއަގްވާމީ މަސައްކަތްތެރިންގެ ދުވަސް ވެސް މިއަދު ފާހަގަކުރާއިރު، ސީއެސްސީގެ ރައީސް އިލްތިމާސް ކުރެއްވީ، އާންމުންނަށް ހިދުމަތް ދިނުމުގައި ސިވިލް ސާވިސް ގާނޫނާއި ގަވާއިދާއި ސުލޫކީ މިންގަނޑުގައި ހިފަހައްޓައިގެން ތިބެ، އިހުލާސްތެރިކަމާ އެކު ހިދުމަތް ކުރުމަށެވެ.

"...ސިވިލް ސާވިސްއަކީ ރައްޔިތުން ބަލައިގަންނަ އިތުބާރު ކުރެވޭ ހިދުމަތަކަށް ހެދުމަށް ސަމާލުކަން ދިނުމަށް ވެސް އިލްތިމާސް ކުރަމެވެ،" ނާސިހް ވިދާޅުވި އެވެ.

ދެން އޭނާ އެދިވަޑައިގަތީ ކޮންމެ އިދާރާއެއްގެ "ސާވިސް ޗާޓަރު" ގައި ބަޔާންކުރާ ހިދުމަތްތައް އެ މިންވަރަށް އަދި ބަޔާންކުރާ ފެންވަރަށް، ކަނޑައަޅާ މުއްދަތުގައި ދިނުމަށް ސަމާލުކަން ދިނުމަށެވެ.

"އަޅުގަނޑުމެންގެ ލަނޑުދަނޑިތަކަށް ވާސިލުވުމަށްޓަކައި އެކަކު އަނެކަކަށް އެހީތެރިވެދިނުމާ އެކު، ގުޅިގެން މަސައްކަތް ކުރުމުގެ ސަގާފަތެއް އަށަގަންނަވައި ފެންވަރު ރަނގަޅު، އަވަހަށް ލިބިގެންދާ ހިދުމަތްތަކެއް ފޯރުވޭނެ ފަދަ ހުނަރުވެރި މުވައްޒަފުންނަށް ވުމަށް އަތުކުރި އަޮޅާލައި އަޒުމްތައް ވަރުގަދަ ކުރަމާތޯ،" ސީއެސްސީގެ ރައީސްގެ ހިތާބުގައި ވިދާޅުވި އެވެ.

އޭނާ ފާހަގަކުރެއްވި ގޮތުގައި ދިވެހި މަސައްކަތްތެރިންގެ ބޮޑު ހިއްސާއެއް އޮންނަ ދިވެހި ސިވިލް ސާވިސްއަކީ ސަރުކާރުގެ ހިދުމަތްތައް ރައްޔިތުންނަށް ފޯރުވައިދިނުމުގައި އަމަލީ ގޮތުން މަސައްކަތް ކުރުމަށް ގާނޫނީ ގޮތުން އުފައްދާފައިވާ މުއައްސަސާ އެވެ. އެހެންވެ، ސަރުކާރުގެ ސިޔާސަތުތައް ތަންފީޒު ކުރުމުގެ ކަންކަން ކުރުމާއި ރައްޔިތުން ބަލައިގަންނަ ގޮތަށް ހިދުމަތް ދިނުމަށް ނާސިހް އެދިވަޑައިގަތެވެ. ހާއްސަކޮށް ސާފު ސީދާ އަދި ދެފުށް ފެންނަ ގޮތްތައް ހިޔާރުކޮށް، މައްސަލަތައް ހައްލު ކުރުމުގެ ވިސްނުމުގައި މަސައްކަތް ކުރުމަކީ މުހިންމު ކަމެއް ކަމަށް އޭނާ ވިދާޅުވި އެވެ.

"ޒަމާނަށް އަންނަމުން މިދާ ބަދަލުތަކަށާއި ޓެކްނޮލޮޖީ އަށް އަންނަ ކުރިއެރުންތަކުގެ ސަބަބުން ހިދުމަތް ދިނުމުގެ ވައްޓަފާޅި އަށް މިވަނީ ބޮޑެތި ބަދަލުތަކެއް އައިސްފައި. ނަތީޖާއެއްގެ ގޮތުން، ހިދުމަތުގެ އާންމު މިންގަނޑެއްގެ ގޮތުގައި ރައްޔިތުން ބަލައިގަންނަ މިންގަނޑު މިއަދު މިވަނީ ބޮޑު ތަނުން އުފުލިފައި،" ނާސިހް ވިދާޅުވި އެވެ.