ސަލްޓަން ޕާކު ސާފު ކުރުމާއި ޕްލޭނިންގެ މަސައްކަތް ކުރިއަށް އެބަދޭ: މިނިސްޓަރު

ސަލްޓަން ޕާކް ހައުސިން މިނިސްޓްރީ ދަށަށް ބަދަލުކުރި ފަހުން އެތަން ސާފުކޮށް ބެލެހެއްޓުމާއި އެތަން ތަރައްގީ ކުރުމަށް ބޭނުންވާ ޕްލޭނިންގެ މަސައްކަތްތައް ކުރަމުންދާ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބް ވިދާޅުވެއްޖެ އެވެ.

ސަލްޓަން ޕާކުގެ ބައެއް ތަންތަން މަރާމާތު ކުރުމަށްޓަކައި، އެތަންތަނަށް ނުވަދެވޭ ގޮތަށް މާލެ ސިޓީ ކައުންސިލުން ބަންދު ކުރީ މިދިޔަ އަހަރު ކުރީކޮޅު އެވެ. އޭގެފަހުން އެތަނުގެ އެއްވެސް މަސައްކަތެއް މިހާތަނަކަށް ނުކުރެ އެވެ.

އެކަމާގުޅިގެން މިނިސްޓަރު މުއްތަލިބް ކުރެއްވި ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ އެތަން ތަރައްގީ ކުރުމަށްޓަކައި މާލޭ ސިޓީ ކައުންސިލުގައި މިނިސްޓްރީން އެދިގެން އެ ޕާކު އެ މިނިސްޓްރީގެ ދަށަށް ބަދަލުކުރީ މިދިޔަ ފެބްރުއަރީ މަހުގެ 19 ވަނަ ދުވަހު ކަމަށެވެ.

އެތަން ހައުސިން މިނިސްޓްރީގެ ދަށަށް ބަދަލުކޮށްދޭން އެދުނީ ސަލްޓަން ޕާކްގެ ބައެއް ބަންދުކުރިތާ ގިނަ ދުވަސްތަކެއްވުމުގެ އިތުރުން އެތަން ވީރާނާވެ އަދި ކުށްކުރާ ފަރާތްތައް ބޭނުންކުރާ ތަނަކަށްވެފައިވާތީ އާއި މަދިރި އުފެދޭ ގޮތަށް އެ ތަން ދޫކޮށްލާފައިވާތީ ކަމަށް ވެސް މިނިސްޓަރު ވިދާޅުވި އެވެ.

މިނިސްޓްރީއާ އެ ތަން ހަވާލުކުރި ފަހުން މިދިޔަ ދެ މަސް ދުވަސް ތެރޭގައި ޕާކުތެރެ ސާފު ކުރުމާއި އެތަން ތަރައްގީ ކުރުމަށް ބޭނުންވާ ޕްލޭން ހެދުމުގެ މަސައްކަތް ކުރަމުންދާ ކަމަށް ވެސް މުއްތަލިބް ވިދާޅުވި އެވެ.

އޭގެ އިތުރުން އޭނާ ވިދާޅުވީ ޕާކުގެ ސާވޭ ކޮށްފައިވާ ކުރެހުމެއް ނެތުމުން އެ މަސައްކަތް ކުރަމުން އަންނަ ކަމަށް އޭނާ ވިދާޅުވި އެވެ. އަދި ޕާކުގެ ޑިވެލަޕްމަންޓް ޕްލޭން ފައިނަލްކުރެވި އެތަން ބައިތައް ތަރައްގީ ކުރުމުގެ މަސައްކަތް ވަރަށް އަވަހަށް ފެށޭނެ ކަމަށް މުއްތަލިބް ވިދާޅުވި އެވެ.

މިނިސްޓްރީން ސަލްޓަން ޕާކުގެ މަސައްކަތާ ހަވާލުވެފައި ވާއިރު، "ރައްޔިތުންނާ އެކު" ޕޮޑްކާސްޓުގައި ރައީސް ޑރ. މުހައްމަދު މުއިއްޒު ދާދިފަހުން ވިދާޅުވެފައިވަނީ ސަލްޓަންޕާކު އަލުން ތަރައްގީ ކުރާނީ އެންމެންނަށް ހިތްހަމަޖެހުން ލިބޭ ގޮތަށް ކަމަށެވެ.

ސަލްޓަންޕާކު މިހާރު އޮތް ގޮތަށް ތަރައްގީކުރީ ރައީސް މުއިއްޒު ހައުސިން މިނިސްޓަރަކަށް ހުންނެވި ދުވަސްވަރު އެވެ. ރައީސް ވިދާޅުވެފައިވަނީ ސަލްޓަން ޕާކު އަލުން ތަރައްގީ ކުރާނީ ހުރިހާ އުމުރުފުރައެއްގެ މީހުންނަށް ވެސް ބޭނުން ކުރެވޭނެ ގޮތަށް ކަމަށެވެ.