ގުޅިފަޅު އިތުރަށް ހިއްކަން ބޭނުންވާ ފައިސާ އަދިވެސް ހަމަނުޖެހޭ: މުއްތޮލިބް

ގުޅިފަޅު އިތުރަށް ހިއްކުމަށް ބޭނުންވާ ފައިސާ އަދިވެސް ހަމަނުޖެހޭ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް މިއަދު ވިދާޅުވެއްޖެ އެވެ.

ރައީސް އޮފީހުގައި މެންދުރު ފަހު ބޭއްވި ޕްރެސް ކޮންފަރެންސްގައި މުއްތަލިބް ވިދާޅުވީ މި ސަރުކާރުން އެމްޓީސީސީއާ ހަވާލުކޮށްގެން ގުޅިފަޅުން އިތުރަށް ހިއްކަން ނިންމާފައިވާ 85 ހެކްޓަރުގެ ބިން ހިއްކުމަށް މިހާތަނަށް ފައިސާ ހަމަޖެހިފައި ނުވާ ކަމަށެވެ. އެ ފައިސާ ހަމަޖެއްސުމަށް މަސައްކަތް ކުރަމުން އަންނަ ކަމަށް ވެސް އޭނާ ވިދާޅުވި އެވެ.

"ހަމައެއާ އެކު. ފާހަގަކޮށްލަން ސަރުކާރުން އިތުރަށް ހިއްކަން ބޭނުންވާ 85 ހެކްޓަރުގެ ބިން ހިއްކުމަށް އަޅުގަނޑުމެން އެމްޓީސީސީއާ އެކު އެމްއޯޔޫއެއްގައި ސޮއިކޮށް ފައިނޭންސް ހޯދުމުގެ މަސައްކަތްކުރީ. ނަމަވެސް އަޅުގަނޑުމެންނަށް އަދި ސީދާ އެ ފައިނޭންސް ކުރުމުގެ ސާފު މަގެއް ފެންނަން ނެތުމާ އެކު، އެ މަސައްކަތް އަދި ނުފެށި އޮތީ،" މުއްތަލިބް ވިދާޅުވި އެވެ.

"އަޅުގަނޑުމެންގެ ޓާގެޓަކީ އެކި ގޮތްގޮތަށް މަސައްކަތް ކޮށްގެން ނަމަވެސް ވީހާ ވެސް އަވަހަކަށް މި ދެންނެވި 85 ހެކްޓަރުގެ މަސައްކަތް ކުރިއަށް ގެންދިއުން."

އެނގިފައިވާ ގޮތުގައި ގުޅިފަޅުން އިތުރަށް ހިއްކަން ނިންމާފައިވާ ސަރަހައްދަކީ ވަރަށް ފުންކޮށް އޮންނަ ތަނަކަށް ވާތީ، އެތަން ހިއްކުމަށް ވަރަށް ބޮޑު ހަރަދެއް ހިނގާނެ އެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ވަނީ ނެދަލެންޑްސްގެ ބޮސްކާލިސް ކުންފުންޏާ ހަވާލުކޮށްގެން ގުޅިފަޅުން 150 ހެކްޓަރުގެ ބިން ހިއްކައިފަ އެވެ. އެ މަސައްކަތް ނިމުނީ މި އަހަރު އެވެ.

ނަމަވެސް، ރައީސް ޑރ. މުހައްމަދު މުއިއްޒު ވަނީ ގުޅިފަޅުން އަދި އިތުރު 85 ހެކްޓަރުގެ ބިން ހިއްކަން ނިންމަވައިފަ އެވެ. މި ސަރުކާރުން ވަނީ ގުޅިފަޅުގެ ލޭންޑް ޔޫސް ޕްލޭން ވެސް އެއްކޮށް ބަދަލުކޮށްފަ އެވެ.

މުއްތަލިބު މިއަދު ވިދާޅުވި ގޮތުގައި، ތިލަމާލެ ބްރިޖާ އެކު ގުޅިފަޅުން ތިލަފުއްޓަށް ހަދަން ޖެހޭ މަގު ހެދުމަށް ބޭނުންވާ ބިން ވެސް ވަރަށް އަވަހަށް އެ މަސައްކަތްކުރާ އެފްކޮންސް ކުންފުންޏާ ހަވާލުކުރާނެ އެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ވަނީ ގުޅިފަޅުން މާލޭ ރައްޔިތުންނަށް ގޯތި ދޭން ވެސް ނިންމައިފަ އެވެ.

ކުރީގެ ސަރުކާރުން ދޭން ނިންމި ގޯތިތަކާއި މި ސަރުކާރު އައި ފަހުން ގިރާވަރުފަޅުން ގުޅިފަޅަށް ބަދަލުކުރި ގޯތިތަކާ އަދި ގުޅިފަޅުގެ ލޭންޑް ޔޫސް ޕްލޭނަށް ބަދަލު ގެނެސްފައި ވާތީ އެތަނުން ގޯތި ލިބުނު މީހުންގެ މެދުގައި އަލުން ގުރުއަތުލާން ވަނީ ނިންމައިފަ އެވެ. ގުޅިފަޅުން މާލޭ މީހުންނަށް ލިބުނު ގޯތިތަކުގެ ގުރުއަތުލުން މާދަމާ ފަށަން ވަނީ ހަމަޖައްސައިފަ އެވެ.

ލޭންޑް ޔޫސް ޕްލޭނަށް ގެނައި ބަދަލާ އެކު، ގުޅިފަޅުން ޖުމްލަ 3،520 ގޯތި ދޫކުރަން ވަނީ ނިންމައިފަ އެވެ. ހުޅުމާލެ އާއި ގުޅިފަޅު އަދި ގިރާވަރުފަޅު ހިމެނޭ ގޮތަށް މާލޭ މީހުންނަށް މި ސަރަހައްދުން 9،000 އަށް ވުރެ ގޯތި ދޫކުރަން ކުރީގެ ސަރުކާރުން އޮތީ ނިންމައިފަ އެވެ.