ރަސްމާލެ އަންޑަވޯޓާ ޓަނަލަކީ ރައީސްގެ އާދަޔާހިލާފު ވިޝަނެއް، ވަގުތު ނަގާނެ: މިނިސްޓަރު

ރައީސް ޑރ. މުހައްމަދު މުއިއްޒުގެ އެންމެ ބޮޑު މަޝްރޫއު ކަމަށްވާ ރަސްމާލެ ނިންމައި އަންޑަވޯޓާ ޓަނަލަކުން މާލެއާ ގުޅުވައިލުމަކީ އެ މަނިކުފާނުގެ އާދަޔާޚިލާފު ވިޝަނެއް ކަމަށާއި އެ މަޝްރޫއަށް މިނިސްޓްރީން ފަންނީ އެހީތެރިކަން ދިން ނަމަވެސް އާ ކަމަކަށް ވާތީ ވަގުތު ނަގާނެ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު މިއަދު ވިދާޅުވެއްޖެ އެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި "މިހާރު" އިން ކުރި ސުވާލަކަށް ޖަވާބު ދެއްވަމުން މިނިސްޓަރު ވިދާޅުވީ އަންޑަވޯޓާ ޓަނަލަކީ ރައީސް ގެންގުޅުއްވާ އާދަޔާހިލާފު ވިޝަނެއް ކަމަށެވެ. އެ ތަސައްވުރު ކާމިޔާބު ކުރައްވަން އެނގިވަޑައިގަތުމާއި އެކަމެއް ކުރެއްވުމަކީ ލީޑަރެއްގެ ހުންނަ ވަރަށް ހާއްސަ ސިފައެއް ކަމަށް މުއްތަލިބު ވިދާޅުވި އެވެ.

މިނިސްޓަރު ވިދާޅުވީ، ދެން އޮންނާނީ ރައީސް މުއިއްޒުގެ އެ ވިޝަނާ އެކު މަސައްކަތް ކުރުން ކަމަށެވެ.

މުއްތަލިބް ވިދާޅުވި ގޮތުގައި، އެއީ ރާއްޖެ އަށް ތަރައްގީ ގެންނަން ރައީސް އިންތިހާ އަށް ބޭނުންފުޅު ވާތީ ކުރެއްވި ތަސައްވުރެކެވެ.

"ވަގުތު ނަގާނެ އަދި ފައިނޭންޝަލީ ފީސިބަލް، ޓެކްނިކަލް ފީސިބިލިޓީ ބަލަން ޖެހޭނެ. މިއީ ރައީސްގެ ވަރަށް ބޯލްޑް ވިޝަންއެއް. އެކަން ހާސިލް ކުރަން އަޅުގަނޑުމެން މަސައްކަތް ކުރާނަމޭ، އެކަމަކު އެކަމަށް ޓައިމްލައިން ލައިގެން މިވެނި ތާރީހެއް ދީގެން ކުރަން އޮތް ކަމެއް ނޫން. އެ އަށް ވުރެ މާ އާދަޔާހިލާފު ކަމެއް އެއީ،" މިނިސްޓަރު ވިދާޅުވި އެވެ.

މުއްތަލިބް ވިދާޅުވީ ރަސްމާލެ އާއި މާލެ ގުޅުވާލައި އަންޑަވޯޓާ ޓަނަލް އެޅުމުގެ ޓެކްނޮލޮޖީ އަދި ނެތް ކަމަށެވެ.

"އެ އަކީ މި ވަގުތު ދުނިޔޭގައި ފެންނަން ހުރި ޓެކްނޮލޮޖީއެއް ނޫން. ދުނިޔޭގެ އެއްވެސް ތަނެއްގައި އޯޕަން ސީގައި ހަދާފައި ހުރި ތަނެއް އިންފްރާސްޓްރަކްޗާއެއް ނޫން،" މިނިސްޓަރު ވިދާޅުވި އެވެ.

"އެނގިވަޑައިގަންނަވާނެ އެމެރިކާ އިން ހަނދަށް ދާން ވެސް ޖޯން އެފް ކެނެޑީ އެންވިޝަން ކުރެއްވީ އެއްވެސް ބަޔަކު ހަނދަށް ގޮސްގެނެއް ނޫން. ލީޑަރެއްގެ ހުންނަ ވަރަށް ހާއްސަ ސިފައެއް އެއީ އެންވިޝަން ކުރަން އެނގިވަޑައިގެންނެވުން އެކަން ކުރަން ކެރުން."

މާލެ އާއި ރަސްމާލެއާ ދެމެދު އަންޑަވޯޓާ ޓަނަލެއް އެޅުމުގެ ތަސައްވުރު ރައީސް މުއިއްޒު ހާމަކުރެއްވީ މި އަހަރު ޖެނުއަރީ މަހު އެވެ. އެ މަނިކުފާނު ވިދާޅުވެފައިވަނީ ރަސްމާލެ އަށް ގުޅުވައިލުމަށްޓަކައި ވަރަށް ގާބިލު ކުންފުނިތަކާ ސަރުކާރުން މިހާރު މަޝްވަރާ ފަށާފައިވާ ކަމަށެވެ.

"މުޅި ދުނިޔޭގައި ވެސް ފުރަތަމަ ފަހަރަށް މިހާރު މި ޕްލޭން ކުރެވެނީ އަންޑަވޯޓާ ޓަނަލް، މާލެ އިން ރަސްމާލެ އަށް ގުޅުވާލުމުގެ މަސައްކަތް،" ރައީސް ވިދާޅުވެފައިވެ އެވެ.

އެ މަނިކުފާނު ވިދާޅުވީ އެ ޓަނަލްގައި ދުއްވާނީ ރޭލެއް ކަމަށާއި އެ ރޭލު ދަތުރުގައި ކަނޑުއަޑީގެ ރީތި މަންޒަރުތައް ފެންނާނެ ކަމަށެވެ.

"އެ މަސައްކަތް ކުރުމަށްޓަކައި އަޅުގަނޑުމެން މިހާރު ވާނީ އެކަމުގެ ގާބިލްކަން ހުރި ކުންފުނިތަކާ އެކީ ފީސިބިލިޓީ މަސައްކަތްތައް ފަށާފައި. މިއީ ޓޫރިޒަމްގެ ބޮޑު މަޝްރޫއެއް. މިއީ ރާއްޖޭގެ ޓޫރިސްޓުން އެތައް ގުނައަކަށް އިތުރުވެގެންދާނެ ކަމެއް. އަޅުގަނޑުމެން ކުރާނީ ދެކޮޅުޖެހޭ މަސައްކަތް،" މާލެ ސަރަހައްދުގެ މީހުން ދިރިއުޅޭނީ ލިންކު އެޅި ގުޅިފައިވާ ތަންތަނުގައި ކަމަށް ރައީސް ވިދާޅުވި އެވެ.