މުލީ އެއާޕޯޓަށް 540 މިލިއަން ހަރަދުވި، އެއީ އަތޮޅުގެ އާބާދީގެ ނިސްބަތުން ބޮލަކަށް 100،000ރ.: މިނިސްޓަރު

މ. މުލީ އެއާޕޯޓުގެ މަސައްކަތް ނިމުނުއިރު، އެ އެއާޕޯޓަށް ޖުމްލަ 540 މިލިއަން ރުފިޔާ ހަރަދުވި ކަމަށާއި އެއީ އެ އަތޮޅުގެ އާބާދީގެ ނިސްބަތުން ބަލާނަމަ ބޮލަކަށް 100،000 އެއްހާ ރުފިޔާ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް މިއަދު ވިދާޅުވެއްޖެ އެވެ.

ކުޑަ އާބާދީއެއް ދިރިއުޅޭ މ. އަތޮޅުގައި އުޅެނީ 5،490 މީހުން ކަމަށް 2022 ވަނަ އަހަރުގެ ބޯހިމެނުމުގެ ރިޕޯޓުގައިވެ އެވެ.

މުލި އެއާޕޯޓް ހުޅުވުމަށް މިއަދު ހެނދުނު މި ރަށުގައި ބޭއްވި ރަސްމިއްޔާތުގައި މުއްތަލިބް ވިދާޅުވީ މިއަދަކީ މ. އަތޮޅުގެ ރައްޔިތުންނާއި މުލީގެ ރައްޔިތުން ޒަމާންތަކެއް ވަންދެން އުއްމީދު ކުރަމުން އައި ހުވަފެނެއް ހަގީގަތަކަށް ވީ ދުވަސް ކަމަށެވެ. އަދި އެކި ސަބަބުތަކާ ހުރެ އެ އެއާޕޯޓުގެ މަސައްކަތް 11 އަހަރަށް ދިގުލައިގެން ގޮސްފައިވާ ކަމަށް އޭނާ ވިދާޅުވި އެވެ.

މުލި އެއާޕޯޓް އަޅަން ބިން ހިއްކަން ފެށީ 2014 ވަނަ އަހަރު އެވެ. އެކަމަކު، އެއާޕޯޓް އެޅުމުގެ މަޝްރޫއުގެ އަމަލީ މަސައްކަތް ފެށީ 2021 ވަނަ އަހަރު އެވެ. އެ މަސައްކަތް ކުރީ އެމްޓީސީސީއާ ހަވާލުކޮށްގެންނެވެ.

މުއްތަލިބް ވިދާޅުވީ މި އެއާޕޯޓް އަޅަން ބިން ހިއްކަން ފެށީ ރައީސް ޑރ. މުހައްމަދު މުއިއްޒު، ކުރީގެ ހައުސިން މިނިސްޓަރަކަށް ހުންނެވިއިރު ކަމަށެވެ. އަދި އެމަނިކުފާނު ރައީސް ކަމަށް ވަޑައިގެން، އެންމެ އިސްކަމެއް ދީގެން ނިންމަން އެންްގެވި މަޝްރޫއުތަކުގެ ތެރޭގައި އެ މަޝްރޫއު ހިމެނޭ ކަމަށް އޭނާ ވިދާޅުވި އެވެ.

"މި އެއާޕޯޓް މިއަދު މި ހުޅުވުނީ ރައްޔިތުންނަށް ތަރައްގީ ގެނެސްދިނުމަށް ކެތްމަދުވެފައި ހުރި ވެރިއެއްގެ ބުރަ މަސައްކަތުން،" މުއްތަލިބް ވިދާޅުވި އެވެ.

"ހާއްސަކޮށް ފާހަގަކޮށްލަން އެމްޓީސީސީގެ ވަރަށް ބުރަ މަސައްކަތުން ގާތްގަނޑަކަށް 18 މަސް ދުވަސް ތެރޭގައި މަސައްކަތް ނިންމައި އެއާޕޯޓް މި ހުޅުވުނީ."

މުއްތަލިބް ވިދާޅުވީ މި ސަރުކާރު ވެރިކަމަށް އައިއިރު އެއާޕޯޓުގެ ގިނަ މަސައްކަތްތަކެއް ރޭވިފައި ހުރި ނަމަވެސް، މަސައްކަތްތައް ކުރިއަށް ގެންދަން ހުއްދަ ނުލިބި ހުރި ކަމަށެވެ. އަދި ހުއްޓިފައި އޮތް މަޝްރޫއު އަލުން ފަށައި، މަސައްކަތް ނިމުނުއިރު މުޅި ޕްރޮޖެކްޓަކަށް 540 މިލިއަން ރުފިޔާ ހަރަދުވި ކަމަށް އޭނާ ވިދާޅުވި އެވެ.

"މިއީ މި އަތޮޅުގެ އާބާދީގެ ނިސްބަތަށް ބަލާ ނަމަ، ކޮންމެ ބޮލަކަށް 100،000ރ. ގެ އަދަދެއް،" އޭނާ ވިދާޅުވި އެވެ.

"މި އެއާޕޯޓާ އެކު މި އަތޮޅުގެ ޓޫރިޒަމް ކުރިއަރައިގެން ދާނެ ކަމަށް އުއްމީދު ކުރެވޭ. މިއީ ޓޫރިޒަމްގެ އެތައް އިންވެސްޓްމަންޓަކަށް ހުޅުވައިދިން ދޮރާށްޓެއް."

މުލި އެއާޕޯޓް މިއަދު ހުޅުއްވައި ދެއްވީ ރައީސް މުއިއްޒެވެ.

މުލި އެއާޕޯޓު މަޝްރޫއުގެ ދަށުން ވަނީ 14 ހެކްޓަރުގެ ބިން ހިއްކައި، 1،812 މީޓަރު ސަރަހައްދެއްގެ ގޮނޑުދޮށް ހިމާޔަތްކޮށްފަ އެވެ. އަދި ޕެސެންޖާ ޓާމިނަލަކާ އެކު، 1،200 މީޓަރު ދިގު އަދި 30 މީޓަރު ފުޅާ ރަންވޭއެއް ހަދާފައިވެ އެވެ.