ގުޅިފަޅުގެ މަގުތައް ހެދުމާއި އަސާސީ ހިދުމަތްތައް ގާއިމްކުރަން ޗައިނާގެ ކުންފުންޏަކަށް

ގުޅިފަޅުގެ މަގުތައް ހެދުމާއި މުނިސިޕަލް ވަސީލަތްތައް ގާއިމް ކުރަން ޗައިނާގެ ކުންފުންޏަކާ އެކު ސަރުކާރުން އެއްބަސްވުމެއްގައި މިއަދު ސޮއިކޮށްފި އެވެ.

ގުޅިފަޅު ހިއްކާފައި އޮތްބައިންނާއި އަލަށް ހިއްކައިގެން މާލޭގެ ރައްޔިތުންނަށް ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ވަނީ ގޯތިތައް ދޫކޮށްފަ އެވެ. ނަމަވެސް، މިހާތަނަށް އެ ތަނުގެ އަސާސީ ހިދުމަތްތައް ވަނީ ގާއިމް ނުކޮށެވެ.

ގުޅިފަޅުގެ މަގުތައް ހެދުމާއި މުނިސިޕަލް ވަސީލަތްތައް ގާއިމް ކުރަން މިއަދު ހަވާލުކުރީ ޗައިނާގެ މެޝިނަރީ އިންޖިނިއަރިން ކޯޕަރޭޝަން (ސީއެމްއީސީ) ކުންފުންޏާ އެވެ.

ރައީސް އޮފީހުގައި ބޭއްވި ރަސްމިއްޔާތެއްގައި އެ އެއްބަސްވުމުގައި ސޮއިކުރެއްވުމަށް ފަހު، ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވީ، އެއީ ރައީސް ޑރ. މުހައްމަދު މުއިއްޒު މިދިޔަ އަހަރުގެ ޖެނުއަރީ މަހު ޗައިނާއަށް ކުރެއްވި ފުރަމާނަ ދަތުރުފުޅުގައި ސީއެމްއީސީއާ އެކު ހެދި އެމްއޯޔޫގެ ދަށުން އެކުލަވައިލި އެއްބަސްވުމެއް ކަމަށެވެ.

މި މަޝްރޫއުގެ ދަށުން ސީއެމްސީން ގުޅިފަޅުގައި ގާއިމްކުރަން ނިންމާފައިވާ ކަންކަން؛

- އިލެކްޓްރިސިޓީ ޑިސްޓިބިޝަން ނެޓްވޯކް ގާއިމްކުރުން.

- ފެނާއި ނަރުދަމާ އަދި ފެން ހިނދާ ނިޒާމް ގާއިމްކުރުން.

- މަގުތައް ޒަމާނީ ފެންވަރަކަށް ހެދުން.

- ގޭސް ސްޓޯރޭޖް އަދި ޑިސްޓިބިއުޝަން ނެޓްވޯކް ގާއިމް ކުރުން.

މިނިސްޓަރު ވިދާޅުވީ ގުޅިފަޅުގައި އަސާސީ ހިދުމަތްތައް ގާއިމް ކުރުމުގެ މަސައްކަތް ފެށުމަކީ މާލޭގެ ތޮއްޖެހުން ހައްލު ކުރަން އިސްކަން ދޭ ކަމުގެ ރަމްޒެއް ކަމަށެވެ. މާލެ ސަރަހައްދުގައި ދިރިއުޅޭ މީހުންގެ ދިރިއުޅުން ފަސޭހަކުރުމަކީ ރައީސް މުއިއްޒު ވަރަށް ބޮޑު އިސްކަމެއް ދެއްވާ ކަމެއް ކަމަށް އޭނާ ވިދާޅުވި އެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ވަނީ ނެދަލެންޑްސްގެ ބޮސްކާލިސް ކުންފުންޏާ ހަވާލުކޮށްގެން ގުޅިފަޅުން 150 ހެކްޓަރުގެ ބިން ހިއްކަން ފަށައިފަ އެވެ. އެ މަސައްކަތް ނިމުނީ މިދިޔަ އަހަރު އެވެ.

ރައީސް މުއިއްޒު ވެރިކަމާ ހަވާލުވެވަޑައިގެން ގުޅިފަޅުން އަދި އިތުރު 85 ހެކްޓަރުގެ ބިން ހިއްކަން ނިންމަވައިފަ އެވެ. އެއާ އެކު، ގުޅިފަޅުގެ ލޭންޑް ޔޫސް ޕްލޭން ވެސް ވަނީ އެއްކޮށް ބަދަލުކޮށްފަ އެވެ.

ލޭންޑް ޔޫސް ޕްލޭނަށް ގެނައި ބަދަލާ އެކު، ގުޅިފަޅުން 3،520 ގޯތި ދޫކުރަން ވަނީ ނިންމައިފަ އެވެ. ހުޅުމާލެ އާއި ގުޅިފަޅު އަދި ގިރާވަރުފަޅު ހިމެނޭ ގޮތަށް މާލޭ މީހުންނަށް މި ސަރަހައްދުން 9،000 އަށް ވުރެ ގޯތި ދޫކުރަން ކުރީގެ ސަރުކާރުން އޮތީ ކަނޑައަޅައިފަ އެވެ.