އިތުރު ޑްރެޖަރުތައް ގެންގޮސް، ރަސްމާލެ ހިއްކުން އަވަސްކުރަނީ

މި ސަރުކާރުގެ ބޯހިޔާވަހިކަމުގެ ބިޔަ މަޝްރޫއު، "ރަސްމާލެ" ހިއްކުމަށް އިތުރު ޑްރެޖަރުތައް ގެންގޮސް، އެ މަސައްކަތް މި އަހަރު ތެރޭގައި ތިން ގުނަ އަވަސް ކުރައްވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ކ. ގުޅި އަށް މިއަދު ހަވީރު ވަޑައިގެން، އެ ރަށު ރައްޔިތުންނާ ބައްދަލުކުރައްވައި ރައީސް ވިދާޅުވި ގޮތުގައި، ރަސްމާލެ އަކީ، އެއް ސަރަހައްދަކުން ބޯހިޔާވަހިކަމުގެ މައްސަލައަށް ހައްލު އަންނާނެ މަޝްރޫއެކެވެ.

ނަމަވެސް، ފުށިދިއްގަރުފަޅު ފަޅުގައި ރަސްމާލެ ތަރައްގީ ކުރަން ބޭނުންވާ ބިން ހިއްކުމުގެ މަސައްކަތް، މި ސަރުކާރަށް ވާރުތަވި އިގުތިސާދީ ދަތިކަމުގެ ތެރޭގައި ބޭނުންވާ އަވަސްމިނުގައި ކުރިއަށް ގެންދެވިފައިނުވާ ކަމަށް އެ މަނިކުފާނު ވިދާޅުވި އެވެ.

"...އިތުރު ބައެއް ފަރާތްތަކުން، ބައެއް ކޮމްޕެނީތަކުން ޑްރެޖަރު މޮބިލައިޒް ކުރުވައިގެން، އެއް ފަހަރާ އެތައް ބައެއްގެ މަސައްކަތްތައް ފެށުމަށް އަޅުގަނޑުމެން މަސައްކަތް މި ކުރަނީ. އެހެންވީމާ ސްޕީޑު ދެ ގުނަ، ތިން ގުނައަށް ބާރުވާނެ،" ރައީސް މުއިއްޒު ވިދާޅުވި އެވެ.

ރަސްމާލެ މަޝްރޫއަކީ، އެ މަނިކުފާނު ވިދާޅުވި ގޮތުގައި، މި ސަރަހައްދުގެ އިތުރުން މުޅި ރާއްޖޭގެ ބޯހިޔާވަހިކަމުގެ މައްސަލަ އާއި އިގުތިސާދީ ގޮތުން ވެސް ފަހި ފުރުސަތުތަކެއް ލިބޭނެ މަޝްރޫއެކެވެ.

"އެހެންވީމާ، މި މަޝްރޫއު އަކީ، އަޅުގަނޑުމެން ވަރަށް ޔަގީނން ކަމާއެކީގައި ދެކޭ ކަމެއް. އެއީ ރާއްޖެއަށް އަދި ހާއްސަކޮށް މި ސަރަހައްދަށް ވަރަށް ބޮޑު ފައިދާއެއް ވާނެ ކަމެއް،" މި ފެށި 2025 ވަނަ އަހަރަކީ ބޯހިޔާވަހިކަމުގެ އަހަރަކަށް ހައްދަވާނެ ކަމުގެ ޔަގީންކަން ތަކުރާރު ކުރައްވައި ރައީސް ވިދާޅުވި އެވެ.

ބޯހިޔާވަހިކަމުގެ ބޮޑު ހައްލަކަށް ފުށިދިއްގަރުފަޅު ފަޅު ހިއްކަން ސަރުކާރުން ޑިސެމްބަރު 18، 2023 ހަވާލުކުރީ ކެޕިޓަލް މެރިން އެންޑް އިންވެސްޓްމަންޓް (ސީއެމްސީ)އާ އެވެ.

ސަރުކާރުން ކަނޑައެޅި ޝެޑިއުލާ އެއްގޮތަށް އެ ކުންފުނިން މަސައްކަތް ކުރިއަކަށް ނުގެންދެވުނެވެ. އެހެންވެ އެއްބަސްވުން ބާތިލްކޮށް، އިތުރު ފުރުސަތެއް ނުދޭން ނިންމީ އެވެ. އެއީ، މާލެ ސަރަހައްދުން ކޮންޓްރެކްޓަރަކަށް ބިންތަކެއް ނުދީ، ކޮންޓްރެކްޓަރުން މެދުވެރިވެގެން ފައިސާ ހަމަޖައްސައިގެން ޕްރޮޖެކްޓް ކުރިއަށް ގެންދަން ސަރުކާރުން ބޭނުންވާތީ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް ވިދާޅުވެފައިވެ އެވެ.

އެ ފަޅު ހިއްކުން މެދުކެނޑިފައި އޮންނަތާ ގާތްގަނޑަކަށް ހަ މަސް ފަހުން އެ މަސައްކަތް އަލުން ފަށާފައިވާކަމަށް އެޗްޑީސީން ބުނީ މިދިޔަ އަހަރުގެ ނޮވެމްބަރު މަހުގެ ތެރޭގަ އެވެ.

ފުށިދިއްގަރު ފަޅަކީ ރައީސް މުއިއްޒުގެ ބޯހިޔާވަހިކަމުގެ "ޓޯޓަލް ސޮލިއުޝަން"ގެ ސިޔާސަތުގެ ދަށުން އެންމެ ބޮޑު އިސްކަމެއް ދީގެން ތަރައްގީކުރަން ނިންމާފައިވާ ތަނެވެ. ހިއްކާ ބިމުގެ ބަދަލުގައި ބިން ދޭ މޮޑަލަށް މި ސަރުކާރުން އެއްބަސްވީ، އެ ފަޅު ހިއްކަން މި އަހަރުގެ ބަޖެޓުގައި ހިމެނި 400 މިލިއަން ރުފިޔާ، އެމްޑީޕީގެ މެޖޯރިޓީ އޮތް މަޖިލީހުން އޭރު އުނިކުރުމުންނެވެ.

ދައުލަތުން ހަރަދެއް ކުރުމުގެ ބަދަލުގައި ބިންތަކެއް ދޭ ގޮތަށް 8 މަސް ތެރޭ މަސައްކަތް ނިންމަން އެ ކުންފުންޏާ ހަވާލުކުރިއިރު އެ ތާވާލާ އެެއްގޮތަށް މަސައްކަތް ކުރި ނަމަ މިދިޔަ އޮގަސްޓް މަހުގެ ތެރޭގައި އެތަން އެއްކޮށް ހިއްކާ ހިމެނޭނެ އެވެ.

ރައީސް ވިދާޅުވެފައިވާ ގޮތުގައި ރަސްމާލޭގައި ގޯއްޗާއި ފްލެޓް ހިމެނޭ ގޮތަށް 65،000 ހައުސިން ޔުނިޓް ސަރުކާރުން އިމާރާތް ކުރާނެ އެވެ.