ވައުދުވި ބޯހިޔާވަހިކަމުގެ ހުރިހާ މަޝްރޫއުތަކަށް ކޮންޓްރެކްޓަރުން ހޯދަން މި މަހު އިއުލާނުކުރާނަން: ރައީސް

ރާއްޖޭގެ އެކި ހިސާބުތަކަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދުމަށް ވައުދުވެވަޑައިގެންފައިވާ ހުރިހާ މަޝްރޫއުތަކުގެ އަމަލީ މަސައްކަތް ފެށުމަށް ކޮންޓްރެކްޓަރުން ހޯދުމަށް މި މަހު އިއުލާނުކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ކ. ގުޅީ ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިތުރުން ރައްޔިތުންނާ ބައްދަލުކުރެއްވުމަށް ރައީސް މިއަދު މެންދުރު ފަހު ވަނީ އެ ރަށަށް ވަޑައިގެންފަ އެވެ.

ރައްޔިތުންނާ ބައްދަލުކުރެއްވުމަށް ބޭއްވި ރަސްމިއްޔާތުގައި ރައީސް ވިދާޅުވީ، ކެމްޕެއިން ދުވަސްވަރު ރަށްރަށަށް ވަޑައިގެން އެ މަނިކުފާނު ވެވަޑައިގަތް ބޯހިޔާވަހިކަމުގެ ވައުދުފުޅު ހަގީގަތަކަށް ހެއްދުވުމުގެ ގޮތުން އެ މަޝްރޫއުތައް ހިންގާނެ ފަރާތްތައް ހޯދަން މިމަހު އިއުލާނުކުރާނެ ކަމަށެވެ.

"އަޅުގަނޑު ވައުދުވެފައި ހުރި ހުރިހާ ބޯހިޔާވަހިކަމުގެ މަޝްރޫއުއެއް، ރަށްރަށުގައި އަޅުގަނޑު ކުރިއަށް ގެންދިއުމަށް ކެމްޕެއިން ތެރޭގައި މެނިފެސްޓޯގައި ހުރި ހުރިހާ ބޯހިޔާވަހިކަމުގެ މަޝްރޫއުއެއް ހިންގައިދޭނެ ފަރާތެއް ހޯދަން، އަމަލީ ގޮތުން މަސައްކަތްކުރާނެ ކޮންޓްރެކްޓަރުން ހޯދަން އެބަ އަޅުގަނޑުމެން އިއުލާންކުރަން މި ޖެނުއަރީ މަސް ތެރޭގަ،" ރައީސް ވިދާޅުވި އެވެ.

ރައީސް ވިދާޅުވި ގޮތުގައި އެއީ މާލެ ފިޔަވައި ހުރިހާ ސަރަހައްދަކަށް އެ މަނިކުފާނު ވައުދުވެވަޑައިގެންފައިވާ ބޯހިޔާވަހިކަމުގެ މަޝްރޫއުތަކެވެ. އެކި ފަރާތްތަކާ މަޝްރޫއުތައް ހަވާލުކުރެވޭ ތަރުތީބުން އެ މަޝްރޫއުތައް ކުރިއަށް ދާނެ ކަމަށް ރައީސް ވިދާޅުވި އެވެ.

އެ މަނިކުފާނު ވިދާޅުވި ގޮތުގައި މިއަހަރު ވެގެންދާނީ އެއް އަހަރެއްގެ ތެރޭގައި އެންމެ ގިނަ ބޯހިޔާވަހިކަމުގެ މަޝްރޫއުތައް ހިންގާނެ އަހަރަށެވެ.

މާލޭ ސަރަހައްދުގައި ކުރިއަށްދާ ބޯހިޔާވަހިކަމުގެ މަޝްރޫއުތައް މިހާރެކޭ އެއްގޮތަށް ކުރިއަށް ދާނެކަން ފާހަގަކުރައްވައި ރައީސް ވިދާޅުވި ގޮތުގައި ރަސްމާލެ ހިއްކުމުގެ ސްޕީޑު އަވަސް ކުރުމަށް އިތުރު ޑްރެޖަރުތައް ގެންދިއުމުގެ މަސައްކަތްތައް ވެސް އެބަ ކުރެވެ އެވެ.

މާލޭ ސަރަހައްދުގައި 15،000 ހައުސިން ޔުނިޓާއި ރަށްރަށުގައި 12،000 ހައުސިން ޔުނިޓާ އެކު ޖުމްލަ 27،000 ހައުސިން ޔުނިޓްގެ މަސައްކަތް މި އަހަރު ކުރިއަށް ދާނެކަން ކަމަށް ރައީސް ކުރިން ވިދާޅުވެފައިވެ އެވެ.

ރައީސް ވިދާޅުވެފައިވާ ގޮތުގައި މިއަހަރަށް ހުށަހެޅި ބަޖެޓަކީ ވެސް ބޯހިޔާވަހިކަމުގެ ބަޖެޓެކެވެ. މިގޮތުން، މި އަހަރަށް ފާސްކޮށްފައިވާ ދައުލަތުގެ ބަޖެޓުގައި ގެދޮރު ބިނާކުރަން އެކަނި ވެސް 1.5 ބިލިއަން ރުފިޔާ އަދި ހައުސިން ލޯނަށް އެއް ބިލިއަން ރުފިޔާ ވަނީ ބަޖެޓުގައި ކަނޑައަޅަައިފަ އެވެ.