ހުރުމާއި ކެއުން ވެސް ލިބޭ ގޮތަށް އެމްޓީސީސީން ވަޒީފާގެ 60 ފުރުސަތު

އެމްޓީސީސީން ވަޒީފާގެ 60 ފުރުސަތު ހުޅުވާލައިފި އެވެ.

އޭގެ ތެރޭގައި ހިމެނެނީ ޓެކްނިކަލް އެސިސްޓެންޓުގެ މަގާމަށް ހުޅުވާލާފައިވާ 20 ފުރުސަތާއި ކާޕެންޓަރުންގެ މަގާމަށް ހުޅުވާލާފައިވާ 20 ފުރުސަތާއި މޭސަންގެ މަގާމަށް ހުޅުވާލާފައިވާ 20 ފުރުސަތެވެ.

އެ ކުންފުނިން ހުޅުވާލާފައިވާ ޓެކްނިކަލް އެސިސްޓަންޓުގެ މަގާމަށް، އަސާސީ ތައުލީމު ހާސިލްކޮށްފައިވާ ނަމަ ޝަރުތު ހަމަވާނެ އެވެ. އެ މަގާމަށް ހުށަހަޅާފައިވާ މުސާރަ އަކީ 10،000ރ. އެވެ. ކާޕެންޓަ އާއި މޭސަންގެ މަގާމަށް ދެ އަހަރު ދުވަހުގެ ތަޖުރިބާ ހުރެއްޖެ ނަމަ އެ މަގާމަށް ޝަރުތު ހަމަވާނެ އެވެ. އެ ދެ މަގާމަށް ހުށަހަޅާފައި ވަނީ 11،400ރ. އެވެ.

އެމްޓީސީސީން ބުނީ އެ ތިން މަގާމަށް ވެސް އިތުރު ގަޑީގައި ކުރާ މަސައްކަތަށް ހަމަޖެހިފައިވާ އުސޫލުން އިތުރު ގަޑީގެ ފައިސާ ދޭނެ ކަމަށާއި ސްޓާފް މެޑިކަލް އިންޝުއަރެންސްގެ އިތުރުން ޕެންޝަން ސްކީމުގައި ހިމަނާނެ ކަމަށެވެ. އަދި ކެއުމާއި ހުރުމުގެ އިންތިޒާމް ކުންފުނީގެ ހަރަދުގައި ހަމަޖައްސާނެ ކަމަށް ވެސް ބުންޏެވެ.

މި ތިން މަގާމަށް މާދަމާގެ ނިޔަލަށް އެމްޓީސީސީގެ ވެބްސައިޓު މެދުވެރިކޮށް ހުށަހެޅޭނެ އެވެ.