ރާއްޖޭގެ އެކި ސަރަހައްދުތަކުގައި ކުޅިވަރުގެ 77 މަޝްރޫއެއް ހިންގަން ހަވާލު ކޮށްފި

ދަރާއްޖޭގެ އެކި ސަރަހައްދުތަކުގައި ކުޅިވަރުގެ 77 މަޝްރޫއެއް ހިންގަން، ސްޕޯޓްސް މިނިސްޓްރީން ކުންފުނިތަކާ އެކު ސޮއި ކޮށްފި އެވެ.

ސްޕޯޓްސް މިނިސްޓްރީން މިއަދު އިއުލާން ކުރި މަޝްރޫތަކުގެ ތެރޭގައި ހިމެނެނީ އައުޓްޑޯ ޖިމް، ފިޓްނަސް އާއި ރެކްރިއޭޝަން ސެންޓަރުތައް، ފުޓްސަލް އާއި ފުޓްބޯޅަ ދަނޑުތަކުގެ އިތުރުން ބެޓްމިންޓަން އަދި ވޮލީބޯޅަ ކޯޓުތަކެވެ.

މި މަޝްރޫތައް ހިންގަން އެ މިނިސްޓްރީން ހަވާލު ކުރީ، އެމްޓީސީ، އާރްޑީސީ އަދި ފެނަކަ އާ އެވެ.

އެ މިނިސްޓްރީން ބުނީ މިއަދު ސޮއި ކުރި އެ މަޝްރޫތަކަކީ ކުޅިވަރު މެދުވެރިކޮށް ރައްޔިތުންގެ މެދުގައި އެކުވެރިކަން އުފައްދައި މޮޅު ކުޅުންތެރިން އުފެއްދުމުގެ މަސައްކަތް، ދެ އަހަރުތެރޭ މަގުފަހ ކުރުމަށް ރައީސް ޑރ. މުހައްމަދު މުއިއްޒު ވެވަޑައިގެންފައިވާ ވައުދު ފުއްދުމަށް އެޅުނު މުހިންމު ފިޔަވަޅެއް ކަމަށެވެ.

މިދިޔަ ދޮޅު އަހަރުތެރޭ އެ މިނިސްޓްރީން ވަނީ ވަކިވަކި ރަށްރަށުގައި ކުޅިވަރުގެ އެކި މަޝްރޫތައް ހިންގުމަށް ޕްރައިވެޓް ކުންފުނިތަކާ ހަވާލުކޮށްފަ އެވެ. މިއީ އެއްފަހަރާ މިހާ ގިނަ އަދަދެއްގެ ކުޅިވަރާގެ މަޝްރޫތައް ހިންގަން ހަވާލު ކުރި ފުރަތަމަ ފަހަރެވެ.