މަގު ހަދާތީ އަމީނީމަގުގެ ދެ ސްޓޮޕަކަށް ބަސް ނުދާނެ

އަމީނީމަގު އަލުން ހެދުމުގެ މަސައްކަތަށް އެ މަގުގެ ބައެއް ބަންދުކޮށްފައިވާތީ ދެ ބަސް ސްޓޮޕްއަކަށް މިނީ ބަހުގެ ދަތުރުތައް ވަގުތީ ގޮތުން ހުއްޓާލައިފި އެވެ.

އެމްޓީސީސީން އިއްޔެ ކުރި އިއުލާނެއްގައި ބުނީ ރޫޓު 11 ގައި ހިމެނޭ ދަރުބާރުގެ އަދި ކުޑަކުދިންގެ ބަގީޗާ ކައިރީގައި ހަދާފައިވާ ބަސް ސްޓޮޕްތަކަށް ދަތުރުކުރުން މި ވަގުތަށް ހުއްޓާލިއަސް، އެ ރޫޓުގެ އެހެން ސްޓޮޕްތަކަށް ދަތުރުކުރާނެ ކަމަށެވެ.

މާލޭގައި ޕަބްލިކް ޓްރާންސްޕޯޓުގެ ހިދުމަތް ފެށީ މިދިޔަ ހަފުތާގެ ހޯމަ ދުވަހު އެވެ. މިހާތަނަށް 15،000 އަށްވުރެ ގިނަ މީހުން ވަނީ ބަހުގައި ދަތުރުކޮށްފަ އެވެ.

ބަހުގެ ދަތުރުތައް އޮންނާނީ ކޮންމެ ދުވަހެއްގެ ވެސް ފަތިހު 5:45 އިން ދަންވަރު 12:15 އަށެވެ. ބަސް ދަތުރުކުރުމަށް ތިން ރޫޓެއް ކަނޑައަޅާފައިވާއިރު، 40 ބަސް ހުއްޓި ވަނީ ހަދައިފަ އެވެ. އެ އިން ކޮންމެ ސަރަހައްދަކަށް ވެސް 10 މިނިޓާއި 15 މިނިޓާ ދެމެދު ބަސް ދަތުރުކުރާނެ ކަމަށް އެމްޓީސީސީން ބުނެ އެވެ.

އާރްޓީއެލްގެ 18 މިނީ ބަސް މާލޭގައި ދަތުރުކުރާނެ އެވެ. އޭގެ ތެރެއިން 8 ބަހަކީ 20 ސީޓާއެކު ފުރޮޅުލީ ގޮނޑީގައި އުޅޭ މީހުންނަށް ފަސޭހައިން އަރައިފޭބޭނެ ގޮތަށް ރޭމްޕް ހުންނަ ބަސްތަކެކެވެ. ބާކީ ބަސްތަކުގައި 22 ސީޓު ހުންނާނެ އެވެ. ހުރިހާ ބަހެއްގައި ވެސް އިތުރު 10 މީހުންނަށް ކޮއްޅަށް ތިބެވޭނެހެން ހޭންޑްލް ހުރެ އެވެ.

އަމީނީ މަގުގައި ތާރު އެޅުމަށް ހަވާލުކޮށްފައިވަނީ ސަރުކާރުގެ ކުންފުނި، އާރުޑީސީއަށެވެ.

މިދިޔަ ޖޫން ތިނެއްގައި އެ މަސައްކަތް ހަވާލުކުރީ 10 މަސް (210 ދުވަސް) ތެރޭގައި ނިންމަން ޖެހޭ ގޮތަށެވެ. އެއީ 84 މިލިއަން ރުފިޔާ އަށެވެ.