އަމީނީ މަގުގެ ތާރުގަނޑުގެ ހަލާކުވެ ނުރައްކާ ހާލަތަކަށް

އަމީނީ މަގުގައި ތާރު އަޅައިގެން އަލުން ހެދުމަށް ފަހު، މިދިޔަ އަހަރުގެ ފަހުކޮޅު ހުޅުވި ބައި ވަރަށް ބޮޑަށް ހަލާކުވެ، ދުއްވާ އެއްޗިއްސަށް ނުރައްކާވާ ހިސާބަށް ހިނގައްޖެ އެވެ.

އާރުޑީސީއާ ހަވާލު ކޮށްގެން ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އަމީނީ މަގު ހަދަން ފެށީ ޖުލައި 2022 ގަ އެވެ. ފިޔަވަހިތަކަށް ބަހާލައިގެން ކުރިއަށް ގެންދިޔަ މަސައްކަތުގެ އެންމެ ފަހު ބައި ނިންމައި އެ މަގު އެއްކޮށް ހުޅުވީ މި އަހަރުގެ ކުރީކޮޅު އެވެ.

އެ މަގުގައި އިސްކަންދަރު ކޮއްޓާ ހިސާބުން ސްޓޭޑިއަމް ފަޅީގެ ބޮޑުބައެއްގެ ތާރުގަނޑު އޮތީ އަޑިގުޑަންވެފަ އެވެ. ތާރުގަނޑުގެ ބައެއް ހިސާބުތަކުން ވަރަށް ބޮޑަށް އަޑިވެ، ވަޅުގަނޑުތައް ހެދިފައި ހުރި އިރު މަގުގެ މެދަށް ވުރެ އެއް ފަރާތުގެ ތާރުގަނޑު މާބޮޑަށް އޮތީ އަޑިވެފަ އެވެ.

މަރާމާތުކުރުން ފަދަ މުނިސިޕަލް މަސައްކަތްތައް ކުރަން ހަވާލުކޮށްފައި އޮންނަނީ ސިޓީސް، ލޯކަލް ގަވަމެންޓް އެންޑް ޕަބްލިކް ވޯކްސް މިނިސްޓްރީ އަދި ސިޓީ ކައުންސިލާ އެވެ.

މިނިސްޓަރު އާދަމް ޝަރީފް ވިދާޅުވީ މަރާމާތުކުރުން ފަދަ ކަންކަމަކީ ސީދާ މިނިސްޓްރީގެ މެންޑޭޓުގައި ހިމެނޭ ކަމެއް ނޫން ކަމަށެވެ. އެކަން ކުރަން ޖެހޭނީ ސިޓީ ކައުންސިލާ ގުޅިގެން ކަމަށާއި އަމީނީ މަގު މަރާމާތު ކުރާނެ ކަމަށް ވިދާޅުވިއަސް އެކަން ފަށާނެ ދުވަހެއް ވިދާޅެއް ނުވެ އެވެ.

ތާރުއަޅައިގެން އަމީނީ މަގު މަރާމާތުކުރަން ދައުލަތުގެ ބަޖެޓުން 84 މިލިއަން ރުފިޔާ ހަރަދުކޮށްފައިވެ އެވެ.

ޗައިނާގެ ހިލޭ އެހީގައި މާލެ އާއި ވިލިމާލޭގެ ހުރިހާ މަގުތައް ތާރު އަޅައިގެން ރަނގަޅު ފެންވަރަކަށް ހެދުމުގެ މަސައްކަތް އަންނަ އަހަރުގެ ކުރީކޮޅު ފަށާނެ ކަމަށް ރައީސް ޑރ. މުހައްމަދު މުއިއްޒު ވަނީ މި ހަފުތާގައި އިއުލާން ކުރައްވައިފަ އެވެ. ޖުމްހޫރީ ދުވަހުގެ ރަސްމީ ޖަލްސާގައި އެ މަނިކުފާނު ވިދާޅުވީ، އެއީ ބޮޑު މަޝްރޫއަކަށް ވާތީ މަސައްކަތް އެއްކޮށް ނިންމަން ހަތަރު ވަރަކަށް އަހަރު ހޭދަވާނެ ކަމަށެވެ.

މާލެ އާއި ވިލިމާލޭގެ މަގުތައް ހެދުމަށް ޑިޒައިން ތައްޔާރުކުރުމުގެ ކުރިން ހަދަން ޖެހޭ ސާވޭގެ މަސައްކަތަށް ޗައިނާގެ ޓީމެއް މި މަހުގެ ކުރީކޮޅު ވަނީ ރާއްޖެ އައިސްފަ އެވެ.