އަމީނީ މަގުގެ ކޭބަލަކަށް ގެއްލުންވެ، އަނެއްކާވެސް ކަރަންޓް ކެނޑިއްޖެ

އަމީނީ މަގުގައި ތާރު އެޅުމަށްޓަކައި އެ މަގު ކޮނުމުގެ މަސައްކަތް ކުރަނިކޮށް ސްޓެލްކޯގެ ކޭބަލަކަށް އަނެއްކާވެސް ގެއްލުންވެ، އެ މަގުގެ ވަކި ސަރަހައްދަކުން މިއަދު ކަރަންޓް ކެނޑިއްޖެ އެވެ.

ސްޓެލްކޯ އިން ބުނީ އާރުޑީސީގެ މުވައްޒަފުން މަގު ކޮނުމުގެ ތެރޭގައި ކަރަންޓް ކެނޑުނީ، އަމީނީ މަގު ޝޮޕް އެންޑް ސޭވް ފިހާރަ ހުންނަ ސަރަހައްދުން ކަމަށެވެ.

ސްޓެލްކޯ އިން ފުރަތަމަ ބުނިގޮތުގައި އާ ކޭބަލެއް އަޅައި އަލުން ކަރަންޓް ދިނުމުގެ މަސައްކަތް ވަނީ ފަށައިފަ އެވެ. އެ މަސައްކަތް ނިންމަން ދެ ގަޑިއެއް ހާއިރު ވާނެ ކަމަށް އޭރު ބުންޏެވެ.

އެކަމަކު ފަހުން ސްޓެލްކޯގެ މީޑިއާ އޮފިޝަލް އަހުމަދު މުހައްމަދު ވިދާޅުވީ، އާ ކޭބަލެއް ނާޅައި، ގެއްލުންވި ކޭބަލް އަލުން ގުޅުވައިގެން ކަރަންޓް ދެވޭތޯ މަސައްކަތް މިހާރު ކުރަމުންދާ ކަމަށެވެ.

"ކޭބަލް ޖޮއިންޓެއް ހެދޭތޯ މަސައްކަތް މިހާރު ކުރަމުން ދަނީ. އެހެންވެއްޖިއްޔާ ހިދުމަތް އަލުން ދެވޭލެއް އަވަސް ވާނެ،" އޭނާ ވިދާޅުވި އެވެ.

ސްޓެލްކޯ އިން ހިއްސާ ކޮށްފައިވާ ފޮޓޯގައިވާ ގޮތުން ކޭބަލް ވަނީ މުޅިން ވަނީ ހަލާކުވެފަ އެވެ.

އަމީނީ މަގު ހެދުމުގެ މަސައްކަތަށް މަގު ކޮންނަނިކޮށް މީގެ ކުރިން ވެސް ވަނީ ކޭބަލް ހަލާކުވެ، ކަރަންޓްގެ ހިދުމަތް ކެނޑިފަ އެވެ. އެކަން ސްޓެލްކޯ އިން ވަނީ އާންމުންގެ ސަމާލުކަމަށް ވެސް ކުރިން ގެނެސްފަ އެވެ.