އެމްޕީއެލްގެ ހިދުމަތްތައް ސަރުކާރުގެ އޮންލައިން ޕްލެޓްފޯމް "ޓްރޭޑިއަން" އަށް ބަދަލުކުރަން ފަށައިފި

މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ހިދުމަތްތައް، ސަރުކާރުން ގާއިމުކޮށްފައިވާ އޮންލައިން ޕްލެޓްފޯމް "ޓްރޭޑިއަން" އަށް ބަދަލުކުރަން ފަށައިފި އެވެ.

ވިޔަފާރިވެރިންނަށް ހިދުމަތްދޭ އިދާރާތަކާ އެއް ވިއުގަކުން ގުޅުވައިދޭ ޕްލެޓްފޯމު "ޓްރޭޑިއަން" ރަސްމީކޮށް އިފްތިތާހު ކޮށްފައިވަނީ މިދިޔަ އަހަރުގެ ސެޕްޓެމްބަރު މަހު އެވެ.

އެމްޕީއެލްއިން ރޭ ނެރުނު ބަޔާނެއްގައި ބުނީ، އިމްޕޯޓް އެކްސްޕޯޓާ ގުޅުން ހުރި އިދާރާތައް ގުޅާލުމަށް އުފައްދާފައިވާ ޓްރޭޑިއަން ޕްލެޓްފޯމް އަންނަ އާދީއްތަ ދުވަހު ބޭނުން ކުރަން ފަށަން މިދިޔަ ފެބްރުއަރީ މަހު ކެބިނެޓުން ނިންމާފައިވާ ކަމަށެވެ.

އެއާ އެކު، އެމްޕީއެލްގެ ބައެއް ހިދުމަތްތައް އެ ޕްލެޓްފޯމަށް ބަދަލުކުރަން ނިންމައި، އަންނަ ޖޫން މަހުން ފެށިގެން އެ ހިދުމަތްތައް ފޯރުކޮށްދޭނީ ހަމައެކަނި އެ ޕްލެޓްފޯމް މެދުވެރިކޮށް ކަމަށް އެމްޕީއެލް އިން ބުންޏެވެ.

ޖޫން މަހުން ފެށިގެން އެ ޕްލެޓްފޯމަށް ބަދަލުކުރަން ނިންމާފައިވާ ހިދުމަތްތަކުގެ ތެރޭގައި، ފޮރިން ވެސަލް ރަޖިސްޓްރީކުރުން، ވެސަލް އެރައިވަލް އިންފޮމޭޝަން (އީޓީއޭ) ހުށަހެޅުން އަދި ސީ ކާގޯ އިމްޕޯޓް މެނިފެސްޓް ހުށަހެޅުން ހިމެނެ އެވެ.

"ޓްރޭޑިއަން" ޕޯޓަލްގެ ދަށުން ރާއްޖޭގައި ވިޔަފާރިތަކަށް ހުއްދަތައް ދިނުމުގައި ހަރަކާތްތެރިވާ އިދާރާތައް ގުޅިގެން އެއް ޕޯޓަލެއްގެ ދަށުން ފަސޭހަކަމާއި އަދި އަވަސްކަމާ އެކު ހިދުމަތް ފޯރުކޮށްދިނުމުގެ މަގުފަހިވާނެ ކަމަށް ސަރުކާރުން ވަނީ މީގެކުރިން ބުނެފަ އެވެ.