ޣައްޒާގައި ހާލުގައި ޖެހިފައިވާ މީހުން ތިބޭ ސްކޫލަކަށް ހަމަލާދީ 31 މީހަކު ޝަހީދުކޮށްލައިފި

ފަލަސްތީނުގެ ޣައްޒާގައި އިޒްރޭލުގެ ހަމަލާތަކުގެ ސަބަބުން ހާލުގައި ޖެހިފައިވާ މީހުންގެ ވަގުތީ ހިޔާއެއްގެ ގޮތުގައި ބޭނުންކުރަމުން އަންނަ ސްކޫލަކަށް އިޒްރޭލުން މިއަދު ހަމަލާދިނުމުން 31 މީހަކު ޝަހީދުވެފައިވާ ކަމަށާއި އޭގެ ތެރޭގައި ކުޑަކުދިން ވެސް ހިމެނޭ ކަމަށް ޣައްޒާގެ ސިވިލް ޑިފެންސް އެޖެންސީން ބުނެފި އެވެ.

އެ އެޖެންސީގެ ތަރުޖަމާނު މަހްމޫދު ބައްސާލް އޭއެފްޕީއަށް ވިދާޅުވީ ޣައްޒާ ސިޓީގެ އިރު އުތުރުގައި އޮންނަ ތުއްފާހްގެ ދާރުލް އަރުޣާމް ސްކޫލަށް ދިން ހަމަލާގައި ޝަހީދުވި މީހުންގެ ތެރޭގައި އަންހެނުންނާއި ކުޑަކުދިން ވެސް ހިމެނޭ ކަމަށެވެ. އަދި އެތަނުން ހަ މީހަކު ނުފެންނަ ކަމަށް ވެސް ވިދާޅުވި އެވެ.

މި ހަމަލާގައި 100 އަށް ވުރެ ގިނަ މީހުން ޒަހަމްވެފައިވާ ކަމަށް ބައްސާލް ވަނީ ކުރިން ވިދާޅުވެފަ އެވެ.

"ހަމަލާއަށް ފަހު އަދި ނުފެންނަ މީހުންގެ ތެރޭގައި އެއްމާބަނޑު ދެ ކުދިންނަށް ބަލިވެ އިން މީހަކު ވެސް ހިމެނޭ،" އޭނާ ވިދާޅުވި އެވެ.

މިފަދަ ތަންތަނަށް ހަމަލާ ދިނުމަށް ފަހު އިޒްރޭލުން އާންމުކޮށް ބުނާ ގޮތަށް މިފަހަރު ވެސް ބުނީ ހަމަލާ ދިނީ ހަމާސްގެ ކޮމާންޑް ސެންޓަރަކަށް ކަމަށެވެ. އެކަމަކު މިއީ ސްކޫލަށް ދިން ހަމަލާ ކަމަކަށް އިޒްރޭލުން ސާފުކޮށެއް ނުބުނެ އެވެ.

"ޓެރަރިސްޓުން މި ކޮމާންޑް އެންޑް ކޮންޓްރޯލް ސެންޓަރު ބޭނުންކުރީ އިޒްރޭލުގެ އާންމުންނާއި އައިޑީއެފްގެ ސިފައިންނާ ދެކޮޅަށް ހަމަލާތައް ރާވައި ހިންގަން،" އިޒްރޭލުގެ އަސްކަރިއްޔާއިން ބުންޏެވެ.

އިޒްރޭލު ސިފައިން ބުނީ ސްކޫލަށް އަމާޒުވި ހަމަލާއަކީ "ކޮމާންޑު ސެންޓަރަށް" ދިން ހަމަލާކަން ކަށަވަރުނުކުރެވޭ ކަމަށެވެ.

އޮކްޓޫބަރު 7، 2023 ގައި އިޒްރޭލުން ޣައްޒާއަށް ދޭން ފެށި ހަމަލާތަކަށް ފަހު ފަލަސްތީނުގެ އެތައް ހާސް ބަޔަކު ވަނީ ރައްކާތެރިކަން ހޯދަން ސްކޫލްތަކާއި އެފަދަ އެހެން ފެސިލިޓީތަކުގައި ހިމާޔަތް ހޯދައިފަ އެވެ.

ހަމާސް ޖަމާއަތުން ހިންގާ ޣައްޒާގެ ހެލްތު މިނިސްޓްރީން މިއަދު ދުވަހު ބުނި ގޮތުގައި މިމަހުގެ 18 ވަނަ ދުވަހު އިޒްރޭލުން ޣައްޒާއަށް އަލުން ހަމަލާތައް ދޭން ފެށި ފަހުން ފަލަސްތީނުގެ ބިމުގައި މިހާތަނަށް 1،163 މީހުން ޝަހީދުވެފައިވާ ކަމަށެވެ. އަދި އޮކްޓޫބަރު 7 ގެ ހަމަލާގެ ފަހުން ޝަހީދުވި މީހުންގެ ޖުމުލަ އަދަދު 50،523 އަށް އަރާފައިވާ ކަމަށް ބުންޏެވެ. -- އޭއެފްޕީ