މަންދީގެ ގަޔަށް ކަޅުތެޔޮ ޖަހައިފި

އެމްޑީޕީގެ އިސް އެކްޓިވިސްޓެއް ކަމަށްވާ މަރިޔަމް ޒުބެއިރު (މަންދީ) ގެ ގަޔަށް ބަޔަކު ރޭ ކަޅުތެޔޮ ޖަހައިފި އެވެ.

ގަލޮޅު ދެކުނު ދާއިރާގެ މެމްބަރު މީކާއިލް ނަސީމުގެ މަންމަ، މަންދީ ގަޔަށް ކަޅު ތެޔޮ ޖެހީ ރޭ ބޭއްވި އެމްޑީޕީގެ ސިލްސިލާ މުޒާހަރާގައި ބައިވެރިވުމަށް ފަހު، ސައިކަލުގައި ގެއަށް ދިޔަ މަގުމަތީގަ އެވެ.

ކަޅުތެޔޮ ޖެހި މީހުން ދިޔައީ މަޖީދީ މަގުން ފެށިގެން، ސައިކަލެއްގައި އޭނާގެ ފަހަތުން ފާރަލަމުން ކަމަށް ވެ އެވެ.

ހެލްމެޓް އަޅައިގެން އަދި މާސްކު ވެސް އަޅައިގެން ތިބި އެ މީހުން، މަންދީއަށް ހަމަލާދިން މައްސަލާގައި ފުލުހުން ބުނީ އެކަމުގެ ރިޕޯޓު ލިބުނީ ރޭ ދަންވަރު 1:06 ގައި ކަމަށެެވެ.

އެ މައްސަލަ ތަހުގީގުކުރަމުންދާ ކަމަށް ވެސް ފުލުހުން ބުންޏެެވެ.

މަންދީގެ ގަޔަށް ބަޔަކު ކަޅުޔެތޮ ޖެހިއިރު ރައީސް ޑރ. މުހައްމަދު މުއިއްޒުގެ ދަރިކަލަކަށް ނިސްބަތްކޮށް ވާހަކަ ދެއްކި މައްސަލާގައި މަންދީގެ މައްޗަށް ދައުވާކުރަން އެ މަނިކުފާނުގެ އާއިލާ އިން ވަނީ ނިންމަވައިފަ އެވެ.

އެމްޑީޕީގެ މުޒާހަރާއެއްގައި މަންދީ ވަނީ ރާއްޖޭގައި ވޭޕް ބޭނުންކުރުން މަނާކުރީ ރައީސްގެ ދޮށީ ފިރިހެން ދަރިކަލުން ވޭޕް ބޭނުންކުރުމުން ކަމަށް ބުނެފަ އެވެ. އެކަމަކު ރައީސްގެ އާއިލާއިން އެ ތުހުމަތުތައް ދޮގު ކުރައްވަ އެވެ.

"މި ފުރުސަތުގައި އުމައިރަކީ ވޭޕް ނުވަތަ ދުންފަތުގެ އިސްތިއުމާލު ވެސް އެއްވެސް ގޮތަކަށް ކުރާ ނޫނީ ކޮށްފައިވާ ކުއްޖެއް ނޫން ކަމުގައި ތިޔަ އެންމެހާ ބޭފުޅުންގެ މައުލޫމާތަށްޓަކައި ވަރަށް ސާބިތުކަމާ އެކު ދަންނަވަމެވެ،" ބަޔާނުގައި ފަސްޓް ލޭޑީ ސާޖިދާ މިދިޔަ ހޮނިހިރު ދުވަހު ނެރުއްވި ބަޔާނުގައި ވިދާޅުވި އެވެ.