އެމްޑީޕީގެ މަޖިލިސް މެންބަރުން ފިނޭންސް މިނިސްޓްރީއަށް ވަންނަން ހުރަސްއެޅުމުން ހޫނުވެއްޖެ

އެމްޑީޕީއަށް ނިސްބަތްވާ ރައްޔިތުންގެ މަޖިލީހުގެ މެންބަރުން ފިނޭންސް މިނިސްޓްރީ ކުރިމަތީގައި މިއަދު އިހްތިޖާޖްކޮށް، އެ މިނިސްޓްރީގެ އިމާރާތަށް ވަންނަން އުޅެނިކޮށް އެކަމަށް ފުލުހުން ހުރަސްއެޅުމުން ހޫނުވެއްޖެ އެވެ.

އިދިކޮޅު އެމްޑީޕީއަށް ނިސްބަތްވާ މަޖިލިސް މެންބަރުން މިއަދު ވަނީ ފިނޭންސް މިނިސްޓަރު މޫސާ ޒަމީރާ ބައްދަލު ކުރުމަށް އެ މިނިސްޓްރީ ހުންނަ އިމާރާތަށް ގޮސްފަ އެވެ. ނަމަވެސް، އެތަނުގެ ދޮރުކުރިމަތީ އެތުރިގެން ތިބެ ފުލުހުން ވަނީ މެންބަރުން އެތަނަށް ވަނުން ހުއްޓުވައިފަ އެވެ.

މެންބަރުންނާއެކު އެމްޑީޕީގެ ސަޕޯޓަރުން ވެސް އެ ސަރަހައްދަށް އެއްވިއިރު، ފުލުހުން ހުރަސްއަޅަމުން ދަނިކޮށް ބައެއް މެންބަރުން ވަނީ މިނިސްޓްރީގެ ތެރެއަށް ގަދަކަމުން ވަދެގެންފަ އެވެ. އޭރު ވެސް މިނިސްޓްރީ ބޭރުގައި ސަޕޯޓަރުން އިހުތިޖާޖު ކުރަމުންދިޔަ އެވެ.

މަޖިލިސް މެންބަރުން މިނިސްޓްރީއަށް ވަދެ މައުލޫމާތު ސާފުކުރުމުން، މިނިސްޓަރު ޒަމީރު މިވަގުތު ރާއްޖޭގައި ނޫޅުއްވާ ކަން އެނގުނެވެ. ނަމަވެސް، މެންބަރުން ވަނީ މިނިސްޓްރީގެ އިސް ފަރާތްތަކާ ބައްދަލުކުރަން ޑިމާންޑްކޮށްފަ އެވެ.

ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވި ގޮތުގައި މިނިސްޓަރު ފެންވަރުގެ ބޭފުޅަކު ނުވަތަ އެޑްވައިޒަރަކު އެ މެންބަރުންނާ ބައްދަލު ކުރައްވާނެ ކަމަށް މިނިސްޓްރީން ބުނެފައިވާ ކަމަށާއި ނަމަވެސް، މިހާތަނަށް އެފަދަ ބޭފުޅަކާ ބައްދަލު ކުރެވިފައިނުވާ ކަމަށެވެ.

މައުރޫފް ވިދާޅުވި ގޮތުގައި މިނިސްޓަރު ޒަމީރަށް 16 ވަރަކަށް ސުވާލު މިހާރު ވެސް މަޖިލިސް މެދުވެރިކޮށް ފޮނުވާފައިވާނެ ކަމަށާއި ނަމަވެސް، އެ ސުވާލުތަކަށް ޖަވާބު ދެއްވަން މިނިސްޓަރު މަޖިލީހަށް ހާޒިރުނުވާ ކަމަށެވެ. އަދި ކަންބޮޑުވުންތަކާ އެކު މިނިސްޓްރީއަށް ދާން ޖެހުނީ އެހެންވެ ކަމަށް އޭނާ ވިދާޅުވި އެވެ.

މެންބަރު ވިދާޅުވީ ރާއްޖޭގެ އަމިއްލަ ކުންފުނިތައް ދަނީ ފުނޑެމުން ކަމަށާއި ރާއްޖެއަށް ބޭރުން ހިލޭ އެހީއެއް ނުލިބޭ ކަމަށެވެ. އޭގެ ބަދަލުގައި ތަކެތީގެ އަގު ބޮޑުވެ، ކަރަންޓު ބިލު މައްޗަށް ގޮސް، ރައްޔިތުންނަށް އެތައް ތަކުލީފެއް ޖެހިފައިވާ ކަމަށް އޭނާ ވިދާޅުވި އެވެ.

"މާލީ ސިޔާސަތަށް އިތުބާރެއް ނެތް، މި ގައުމަށް ވާން މި އުޅޭ ގޮތެއް ނޭނގޭ. އެހެންވެ އެމްޑީޕީން މި ނުކުންނަނީ،" މައުރޫފް ވިދާޅުވި އެވެ.

މައުރޫފް ވިދާޅުވީ ރާއްޖޭގެ މާލީ ހާލަތު ސާފުކޮށްދޭން ފިނޭންސް މިނިސްޓަރު ޖެހޭ ކަމަށާއި އެކަން ރައްޔިތުންނަށް ބުނެ ނުދެވޭ ނަމަ، އެއީ ކަންބޮޑުވާން ޖެހޭ ކަމެއް ކަމަށެވެ. އަދި އެއީ ރައްޔިތުން ވެސް ހޯދަން ޖެހޭ މައުލޫމާތެއް ކަމަށް މެންބަރު ވިދާޅުވި އެވެ.