ހިޔާނާތަށް ތުހުމަތުވާ އެއްވެސް މުވައްޒަފެއް ރިޓަޔާއެއް ނުކުރޭ: ކަސްޓަމްސް

ކަސްޓަމްސް އޮފިސަރުންތަކެއްގެ އެކައުންޓުން 400 މިލިއަން ރުފިޔާ ދައުރުކުރި ކަމަށް ކުރެވޭ ތުހުމަތުގެ މައްސަލާގައި ހިމެނޭ މީހުން ރިޓަޔާ ކޮށްފައި ނުވާ ކަމަށް އެ އިދާރާއިން މިއަދު ބުނެފި އެވެ.

އިމްޕޯޓު ޑިއުޓީއަށް ދައުލަތަށް ފައިސާ ނެގުމުގެ ތެރޭގައި ރިޝްވަތުގެ އަމަލުތަކެއް ހިންގާފައިވާ ކަމަށް ތުހުމަތު ކުރެވޭ ކަންކަމާ ގުޅުން ހުރެގެން ކަސްޓަމްސްގެ ތިން އޮފިސަރެއްގެ މައްސަލަ ފުލުހުން އަންނަނީ ބަލަމުންނެވެ.

ނަމަވެސް އެ މައްސަލަ ފެންމަތިވުމުން ކަސްޓަމްސް އިން އެ މީހުން ރިޓަޔާ ކުރަން ފުރުސަތު ދިން ކަމަށް ތުހުމަތުކޮށް ސޯޝަލް މިޑިއާގައި އެ މީހުންގެ ފޮޓޯއާއެކު އަންނަނީ ދައުރުކުރަނުންނެވެ.

އެ މައްސަލާގައި ކަސްޓަމްސް އިން މިއަދު ބުނީ ކަސްޓަމްސްގެ ބައެއް އޮފިސަރުންނަށް ތުހުމަތު ކުރެވިގެން މަނީ ލޯންޑްރިން، ހިޔާނާތް އަދި ރިޝްވަތުގެ މައްސަލައެއް ފުލުހުން ތަހުގީގު ކުރަމުން އަންނަކަން ފުލުހުން އެ ހިދުމަތަށް އަންގާފައިވާ ކަމަށެވެ.

ނަމަވެސް ފުލުހުން މައުލޫމާތު ދީފައިވާ އެއްވެސް އޮފިސަރެއް ކަސްޓަމްސް އިން ރިޓަޔާ ކޮށްފައިވާ ނުވާ ކަމަށް އެ އިދާރާ އިން ބުންޏެވެ.

އެ މައްސަލަތަކާ ގުޅުން ހުރި ބައެއް ކަންކަން ރައްޔިތުންގެ މަޖިލިހުގެ 241 ކޮމިޓީ އަށް ވެސް ވަނީ ހުށަހަޅައިފަ އެވެ. އަދި ކޮމިޓީގެ ބައްދަލުވުންތައް ސިއްރު ކޮށްގެން، ސަރުކާރުގެ ކަމާ ގުޅުން ހުރި އިދާރާތަކުގެ ބައެއް އިސްވެރިންނާ ކޮމިޓީން ސުވާލު ކޮށްފައިވާ ކަމަށް އެނގިފައި ވެ އެވެ.

ޔުނިފޯމް އެޅި މުއައްސަސާތަކާ މެދު ވެސް އިތުބާރު ކޮށްގެން ބަލަން ތިބެވެން ނެތް ކަމަށާއި 241 ކޮމިޓީން ބަލަމުންދާ މައްސަލަތައް ނިމުމުން، މަސްތުވާތަކެތީގެ މައްސަލަ ފަދަ ކަންކަމުގައި ވެސް ހައްލުތަކެއް ހުށަހަޅުއްވާނެ ކަމަށް ރައްޔިތުންގެ މަޖިލީހުގެ ނައިބު ރައީސް އަހްމަދު ނާޒިމް މިދިޔަ ޑިސެމްބަރު މަހު ވިދާޅުވެފައި ވެ އެވެ.