ފުރަންދިޔަ ބިދޭސީއެއްގެ އަތުން ފެނުނު މިލިއަނަކަށްވުރެ ގިނަ ރުފިޔާގެ ބޭރު ފައިސާ ހަވާލުކުރަން ކޯޓުން ހުކުމް ކޮށްފި

ފުރަން ދިޔަ އިންޑިއާ މީހެއްގެ އަތުން މީގެ ފަސް އަހަރު ކުރިން ފެނުނު މިލިއަނަކަށް ވުރެ ގިނަ ދިވެހި ރުފިޔާއަށްވާ ބޭރު ފައިސާ އެ މީހާއާ ހަވާލުކުރަން ސިވިލް ކޯޓުން އިއްޔެ ހުކުމްކޮށްފި އެވެ.

ސެޕްޓެމްބަރު 15، 2019 ގައި މުރުގޭޝް ކަރުނަ ނިދީ ނަމަކަށް ކިޔާ މީހާ އަތުން 60،037 އެމެރިކާ ޑޮލަރުާއި 5،414 ޔޫރޯ (1،021،237ރ.) ފެނިގެން ކަސްޓަމްސް އިން ހިފެހެއްޓުމަށް ފަހު އެ ފައިސާ ހުރީ ފުލުހުންނާ ހަވާލުކޮށްފަ އެވެ.

މި ފައިސާތައް ހިފައިގެން ފުރަން އުޅުނު މީހާ ބުނެފައިވަނީ ފުލުހުން މައްސަލަ ތަހުގީގުކުރުމަށް ފަހު ދައުވާ ކުރުމަށް ޕްރޮސިކިއުޓާ ޖެނެރަލްގެ އޮފީހަށް ފޮނުވުމުން ދައުވާ ނުކުރަން ނިންމައި ފައިލް ކޮށްފައިވާ ކަަމަށާއި އެކަމަކު ފައިސާތައް ދޭން ފުލުހުން އިންކާރުކޮށްފައިވާ ކަމަށެވެ. އޭނާ ދައުވާކުރީ މި ފައިސާތައް ފުލުހުންގެ ބެލުމުގެ ދަށުގައި މިހާރު ބަހައްޓަންޖެހޭ ގާނޫނީ އެއްވެސް ސަބަބެއް ނެތް ކަމަށް ބުނެ އެވެ.

އޭނާ ޝަރީއަތުގައި ބުނެފައިވާ ގޮތުގައި ހިފެހެއްޓި ފައިސާތަކަކީ އެއާޕޯޓަށް ގޮސް ހުރިހާ ލިޔެކިޔުންތަކެއް ހުށަހަޅައި އޮންނަ އުސޫލުގެ ދަށުން ކަސްޓަމްސް އަށް ޑިކްލެއާކޮށްފައިވާ ހުރި އެއްޗެއް ކަމަށެވެ. މަނީ ލޯންޑަރިން އާއި ޓެރަރިޒަމަށް ފައިނޭންސް ކުރުމުގެ ތުހުމަތުކޮށް ފައިސާތައް ކަސްޓްމަސް އިން ހިފެހެއްޓީ އެ ފައިސާތައް ޑިކްލެއާކުރުމަށް ފަހު ފުރަން ތައްޔާރުވަނިކޮށް ކަމަށް ބުނެފައިވެ އެވެ.

މި މައްސަލަ ކަސްޓްމްސް އިން ފުލުހުންނަށް ހުށަހެޅުމުން ހިންގި ތަހުގީގުގައި، މުރުގޭޝް ވަނީ އެ ފައިސާތަކަކީ އެކި މީހުން އޭނާއާ ހަވާލުކޮށްފައިވާ ތަކެތި ކަމަށް ބުނެ އެކަން ސާބިތުކޮށްދޭން ލިޔެކިޔުން ހުށަހަޅައިފަ އެވެ. އަދި ފައިސާ ދިން އެންމެން ފުލުހުންނަށް ބަޔާން ވެސް ދިން ކަމަށް ބުންޏެވެ.

އެކަމަކު ފުލުހުން ބުނީ އެ ފައިސާ އަކީ މުރުގޭޝްގެ އެއްޗެއްކަން އެކަށީގެންވާ ގޮތެއްގައި ސާބިތުކޮށް ނުދެވޭ ކަމަށާއި އެހެންވެ ފައިސާތައް ހަވާލުކުރަންޖެހޭ ޝަރުއީ އަދި ގާނޫނީ ސަބަބެއް ވެސް ނެތް ކަމަށެވެ.

ހުކުމުގައި ބުނެފައިވާ ގޮތުގައި މުރުގޭޝް އަކީ އިންޑިއާގެ ކުންފުންޏެއް ކަމަށްވާ ކްރިޝްނާ އެގްޒިމް ޕާޗޭސްގެ މެނޭޖަރެއްކަން އެނގޭ ކަމަށެވެ. އެއީ ރާއްޖޭގެ ބައެއް ކުންފުނިތަކަށް މުދާ ފޮނުވައިދޭ ކުންފުންޏެއް ކަމަށާއި މުރުގޭޝް ރާއްޖެއަށް އަންނަނީ މުދާ ނުވަތަ ސާމްޕަލް ހިފައިގެން ކަމަށެވެ. އަދި ބައެއް ފަހަރު އިންޑިއާ ކުންފުނިން ރާއްޖޭގެ ކުންފުނިތަކަށް ފޮނުވާ މުދަލުގެ އަގު ލިބިގަތުމަށް ވެސް ރާއްޖެއަށް އަންނަ ކަމަށް ވެސް ތަހުގީގުގެ ލިޔުންތަކާއި ބަޔާންތަކުން އެނގޭ ކަމަށް ހުކުމުގައިވެ އެވެ.

މުރުގޭޝްގެ އަތުން ފެނުނު ފައިސާ ހިފަހައްޓާފައިވަނީ ޖިނާއީ އިޖުރާއަތުގެ ގާނޫނުގެ ދަށުން، ކޯޓު އަމުރަކުން ބަލައި ފާސްކުރުމުގެ ތެރޭގައި ނޫން ކަމަށް ވާތީ އެ ގާނޫނުގައި ބުނާ ހަމަތަކުގެ މައްޗަށް މި ފައިސާ ނުހިފެހެއްޓޭނެ ކަމަށް ވެސް ބުނެފައިވެ އެވެ. ހުކުމުގައި އެކަން ފާހަގަކުރީ ފައިސާ ހަވާލު ނުކުރަން ނިންމީ ހައި ކޯޓުގެ ހުކުމެއްގައި ގާނޫނުގެ އެ މާއްދާއާ ހަވާލާދީ ނިންމާފައިވާ ނިންމުމަކަށް ރިއާޔަތްކޮށްފައި ކަމަށް މުރުގޭޝްއަށް ފުލުހުން ލިޔުމުން ދިން ޖަވާބެއްގައި ބުނެފައި ވާތީ އެވެ.

އެހެންވެ ގާޒީ އަލީ އަބްދުﷲ ހުކުމް ކުރެއްވީ މުރުގޭޝްގެ އަތުން ފެނިގެން ހިފަހައްޓާފައިވާ ފައިސާ ފުލުހުން ނުދީ ހިފެހެއްޓޭނެ ގާނޫނީ އެއްވެސް އަސާސެއް ނެތް ކަމަށެވެ. އަދި އިއްޔެއިން ފެށިގެން 15 ދުވަސް ތެރޭ ފައިސާތައް ހަވާލުކުރަން ފުލުހުންނަށް ވަނީ އަމުރުކުރައްވައިފަ އެވެ.