ބޮޑެތި ސާޖަރީތައް ގިނައިން ހެދީ އަންހެނުންގެ

ރާއްޖޭގައި ވޭތުވެދިޔަ ދެ ތިން އަހަރުގެ ތެރޭގައި އެންމެ ގިނައިން ހަދާފައިވަނީ އަންހެނުންގެ ބަލިތަކާ ގުޅޭ ބޮޑެތި ސާޖަރީތައް ކަމަށް ހެލްތު މިނިސްޓްރީގެ ތަފާސްހިސާބުން ދައްކައިފި އެވެ.

އެ މިނިސްޓްރީން އިއްޔެ އާއްމުކުރި ސާޖަރީގެ ނަމްބަރުތައް ދައްކާ ގޮތުން، 2022 އާއި 2023 ވަނަ އަހަރު ޖުމްލަ 40،325 އޮޕަރޭޝަން ކޮށްފައިވެ އެވެ. އެއީ 2022 ވަނަ އަހަރު 19،732 އަދި ޖެހިގެން އައި އަހަރު 20،593 ސާޖަރީ އެވެ.

މައުލޫމާތުތައް ދައްކާގޮތުން، 2022 ވަނަ އަހަރު ބޮޑު 8،808 ސާޖަރީ ހެދި އެވެ. އެއީ 3،116 ފިރިހެނުންނާއި 5،692 އަންހެނުންނެވެ. އޭގެ ތެރެއިން މާބަނޑު މީހުންނާއި އަންހެނުންގެ ބަލިތަކާ ގުޅޭގޮތުން 3،434 ސާޖަރީ ހެދި އެވެ. އެ ސްޕެޝަލިޓީގައި ކުދި 694 އޮޕަރޭޝަން ކުރި އެވެ.

ހިސާބުތަކުގައިވާ ގޮތުން، 5،699ފިރިހެނުންނާއި 3،929 އަންހެނުން ކުދި ސާޖަރީތައް ކޮށްފައިވެ އެވެ.

އެ އަހަރު ދެ ވަނައަށް އެންމެ ގިނައިން ކުރި މޭޖާ ސާޖަރީއަކީ ކަށީގެ ސާޖަރީ އެވެ. އެއީ، 1،929 އެވެ. އެ ކެޓަގަރީގައި ކުދި 946 ސާޖަރީ ހެދި އެވެ.

ތިން ވަނައަށް އެންމެ ގިނައީ ޖެނެރަލް ސާޖަރީގައި ހިމެނޭ ބޮޑެތި އޮޕަރޭޝަންތަކެވެ. އެ ކެޓަގަރީގައި 1،815 ސާޖަރީ އަދި ޖެނެރަލް ސާޖަރީގައި ކުދި 4،629 އޮޕަރޭޝަން ކުރި އެވެ.

މިނިސްޓްރީގެ ތަފާސްހިސާބު ދައްކާ ގޮތުން 2022 ވަނަ އަހަރު މާލޭގައި 16،089 އޮޕަރޭޝަންކުރި އެވެ. ދެ ވަނައަށް އެންމެ ގިނަ މީހުން އޮޕަރޭޝަންކުރި ހދ. އަތޮޅުން 818 މީހުން ފަރުވާ ހޯދި އެވެ. ތިން ވަނައަށް އެންމެ ގިނައީ އައްޑު އަތޮޅުގަ އެވެ. އެއީ 718 މީހުންނެވެ.

އެ އަހަރު ޖުމްލަ ސާޖަރީތަކުގެ 76 ޕަސެންޓް ކޮށްފައިވަނީ ޓާޝަރީ ހޮސްޕިޓަލްތަކުގަ އެވެ. އަދި މާލެ ސަރަހައްދުން ބޭރުގައި ޖުމްލަ 2،925 ސާޖަރީ ހެދި އެވެ. އޭގެ ތެރޭގައި ކުދި 1،500 ސާޖަރީ އަދި ބޮޑެތި 1،425 ސާޖަރީ ހިމެނެ އެވެ.

ނިއުރޯ ސާޖަރީގެ 87 ޕަސެންޓް ކޮށްފައިވަނީ އަމިއްލަ ހޮސްޕިޓަލްތަކުގަ އެވެ. ހިތުގެ 95 ޕަސެންޓް އޮޕަރޭޝަންކުރީ ސަރުކާރުގެ ހޮސްޕިޓަލްތަކުގަ އެވެ. އެ މުއްދަތުގައި އެންމެ ގިނައިން ސާޖަރީ ހެދީ 35-64 އަހަރާ ދެމެދުގެ މީހުންނެވެ. އެއީ 7،569 މީހުންނެވެ.

ފިރިހެނުން އެންމެ ގިނައިން ފަރުވާ ހޯދި ކަމަށް، ހެލްތު މިނިސްޓްރީގެ ތަފާސްހިސާބުން ދައްކަނީ ހިތުގެ ސާޖަރީ އެވެ. އެއީ 1،791 އެވެ.

ޖެހިގެން އައި 2023 ވަނަ އަހަރު ވެސް ބޮޑެތި ސާޖަރީތައް ގިނައިން ކޮށްފައިވަނީ އަންހެނުންނެވެ. އެ އަހަރު 6،601 އަންހެނުންނާއި 3،935 ފިރިހެނުން ވަނީ މޭޖާގެ އެކި ސާޖަރީތައް ހަދައިފަ އެވެ. ކުދި ސާޖަރީތައް 6،366 ފިރިހެނުން އަދި 3،691 އަންހެނުން ހަދާފައިވެ އެވެ.

އެ އަހަރު މާބަނޑު މީހުންނާއި އަންހެނުންނާ ގުޅޭ ކަންކަމުގައި 3،650 ބޮޑެތި ސާޖަރީ އަދި އެ ސްޕެޝަލިޓީގައި ކުދި 678 ސާޖަރީ ހެދި އެވެ.

ދެ ވަނައަށް އެންމެ ގިނައިން ހެދީ މޭޖާ ސާޖަރީ އެވެ. އެއީ 2،600 މީހުންނެވެ. އެ ސްޕެޝަލިޓީގައި ކުދި 4،322 ސާޖަރީ ހެދި އެވެ.

ތިން ވަނައަށް، 2023 ވަނަ އަހަރު ވެސް އެންމެ ގިނައިން ހެދީ ކަށީގެ އޮޕަރޭޝަންތަކެވެ.

އެ އަހަރުގެ ތެރޭގައި އެންމެ ގިނައިން ހެދީ ޖެނެރަލް ސާޖަރީގައި ހިމެނޭ ކުދި އޮޕަރޭޝަންތަކެވެ. އެއީ 4،322 މީހުންނެވެ. ދެ ވަނައަށް އެންމެ ގިނައިން ހެދި ކުދި ސާޖަރީ، ހިތުގެ ބައްޔާ ގުޅޭ ޕްރޮސީޖާތައް 1،944 މީހުން ހެދި އެވެ. ކަށީގެ އޮޕަރޭޝަންތައް ހިމެނެނީ ތިން ވަނައިގަ އެވެ.

ދެހާސް ތޭވީސް ވަނަ އަހަރު އެންމެ ގިނަ މީހުން ސާޖަރީ ހެދީ މާލޭގަ އެވެ. އެއީ 16،163 މީހުންނެވެ. ދެ ވަނަ އަށް އޮޕަރޭޝަން ކުރި އައްޑު އަތޮޅުގައި 1،031 ސާޖަރީ ހެދި އެވެ.

އެ އަހަރު ފިރިހެނުން އެންމެ ގިނައިން ކޮށްފައިވަނީ ކަށީގެ ސާޖަރީތަކެވެ.