އާސަންދައިން ބޭސް ލިބުން ދަތިވާ ނަމަ ރިޕޯޓުކުރަން އެދިއްޖެ

އާސަންދައިން ބޭސް ލިބުން ދަތިވާ ނަމަ އެކަން ރިޕޯޓުކުރަން މިއަދު އެދިއްޖެ އެވެ.

އެ ކުންފުނިން ސޯޝަލް މީޑިއާގައި ކުރި ޕޯސްޓެއްގައި ބުނީ، އާސަންދަ ސްކީމުން ބޭސް ނަގާއިރު އަމިއްލަ އަތުން ފައިސާ ދައްކަންޖެހޭ ނަމަ ނުވަތަ ބޭހެއް ނުލިބިއްޖެ ނަމަ އެ ޝަކުވާއެއް ހޮޓްލައިން 7951400 އަށް ވައިބާ ކުރަން އެދޭ ކަމަށެވެ.

އެގޮތަށް ރިޕޯޓު ކުރާއިރު ބޭސް ފިހާރައިގެ ނަމާ އެކު، ބޭސް ސިޓީ އަދި ބޭހުގެ ރަސީދު ފޮނުވަން ވެސް އާސަންދަ ކުންފުނިން އެދުނެވެ.

ބޭހަށް އާސަންދަ ދޭ އަގު މި ފަހުން ކުޑަކުރުމާ އެކު، އެކި ސަބަބުތަކާ ގުޅިގެން އެ ސްކީމުން ބައެއް ބޭސްތައް ދޫކުރުން ވަނީ ހުއްޓާލައިފަ އެވެ. އެކަމަކު، ހަމަ އެ ފާމަސީތަކުން އެ ބޭސްތައް ގަންނަން ލިބެ އެވެ.

ފާމަސޫޓިކަލް އެސޯސިއޭޝަންގެ ރައީސް އަހުމަދު މައުމޫން "މިހާރު" އަށް ކުރިން ވިދާޅުވީ، 250 ބޭހެއްގެ އަގު މިދިޔަ އަހަރުގެ ނޮވެމްބަރު މަހުން ފެށިގެން ކޮންޓްރޯލް ކުރުމުން ގިނަ ފާމަސީތަކުން ކަންބޮޑުވުން ފާޅުކޮށްފައިވާ ކަމަށެވެ.